بسم الله الرحمن الرحيم
في السلك

*ايها الناس
*لا اطلب منكم ان يكون انتمائكم الرياضي صوفي الطبع
*بمعني ان تحب كيان لا تنتمي له
*فاهلنا الصوفيه بطرقهم المختلفه
*وبانتماءاتهم المتعدده
*يحبون بعضهم البعض
*بل ويقدمون الاخر عليهم
*انه تواضع كبير وادب تمتاز به الصوفيه التي يعود الفضل اليها في تربية اهل السودان
*ولكن اطلب منكم ان تنتموا رياضيا لمن تريدون الانتماء له
*وتحبون انتماءاتكم بجنون واخلاص
*وان تتباهوا بانجازات وانتصارات كياناتكم التي تنتمون اليها
*فقط اطالبكم باحترام الآخر
*وعدم المساس بقامات ومقامات اناس لهم اوضاعهم ومكاناتهم المحترمه عند اهل انتماءاتهم
*مع اصراري علي دوام المناكفات البريئه التي تعطي للرياضه طعم
*وتجعل من المجتمع الرياضي مجتمعا مميزا يقبل النصر والهزيمه بصدر رحب
*ايها الناس
*تفلتات بدأت في الظهور من جديد
*والمتصفح لصفحات الشبكه العنكبوتيه والقروبات
*يجد ان الامر قد وصل نقطه بعدها الانفجار لامحال
*والانفجار يعني خراب مالطا
*يعني تفلت الوسط الرياضي وضياع مميزاته
*والوسط الرياضي ليس كذلك
*فشاعرنا الدكتور عمر محمود خالد عبر عنا بقوله
*نحنا في الوسط الرياضي لا بنخاصم لا بنعادي
*ايها الناس
*الانتماء بتفلت يضر بالوطنيه
*والقوميه هي العنوان
*لا لجماعه ولا لكيان
*لان عدم احترام الآخر يؤدي الي عدم الاعتراف بالآخر في كل المواقع
*ومن تلك المواقع المنتخب
*فانتمائنا لانديتنا بتفلت وتشدد
*يقود الي تلاشي الانتماء القومي
*والنظرة للمنتخبات بمنظار الانتماء الضيق تضيع علينا طعم الوطنيه
*فالانتماء لقبيله باي حال
*لا يعتبر خصما علي الانتماء الاكبر للوطن الكبير
*ايها الناس
*تعالوا نفرمل شويه
*لننقي الوسط الرياضي من كترابات التشدد التي المت به
*فمثلا لايمكن ان نقرأ ونسمع هتافا يقول
*الشعب يريد اخراج الشغيل
*والشغيل وقتها  يضع صقر الجديان علي صدره مدافعا عنه
*ولكنه الانتماء الضيق هو الذي قاد الناس لذلك الهتاف
*فيجب ان يستوي الامر لدينا
*لو جاب قون المنتخب بكري المدينه او كاريكا
*يجب ان نفرح كلنا
*فالمقام مقام بكري لاعب المنتخب وكاريكا لاعب المنتخب ونحن شعب المنتخب
*ولكنه ليس مقام الجاب القون لاعبنا والصرج الكورة مدافعكم
*ايها الناس
* بالنسبه لينا الهلالابي هو منو ؟؟؟
*وبالنسبه للهلالاب المريخابي هو منو ؟؟؟
*بالنسبه لينا الهلالابي هو يا ابو يا اخو يا ابن يا عم يا خال يا صديق عزيز
*وبالنسبه للهلالابي المريخابي هو يا ابو يا اخو يا ابن يا عم يا خال يا صديق عزيز
*فهل يعقل ان يخسر الانسان اخاه  لمجرد انتماء كروي ؟؟؟
*ان كان كذلك
*خلاص
*نصحي من النوم بدري نكتل الهلالاب في بيوتنا
*ويصحوا الهلالاب بدري يكتلوا المريخاب في بيوتهم
*ويبقي جمهور ابو روف هو اكبر جمهور نادي
*يلموا فيهو جماهير بيت المال يلحقوهوا امات طه
*وهكذا
*الي ان نصفي كل الانتماءات الرياضيه والانديه
*ايها الناس
*قليل من التعقل يقودنا لبر الامان
*ويعطي الرياضه معناها السامي الذي وجدناها عليه واحببناها فيه
*ايها الناس
*وتبقي بعد كل ذلك المناكفات البريئه الجميله
*التي لا تخدش انسان ولا تسئ لبشر
*عليكم الله
*لو ما البلد دي فيها هلالاب كان فرحنا بي جوياتنا قدر ده ؟؟؟
*ولو ما البلد دي فيها مريخاب كان الهلالاب اتحرجوا من صفرهم الدولي ده ؟؟؟
*الاهله اعطوا انجازنا الجوي طعما
*والشفوت ولدوا في الاهله احراجا جعلهم يصرون علي فراق الصفر الدولي
*يبقي المناكفات ممكن تكون حث علي السعي والجد والانجاز
*فقط بدون اساءه
*ايها الناس
*ماقلت الاهله يحبوا المريخ
*ولا قلت المريخاب يحبوا الهلال
*فقط يتبادلوا الاحترام بيناتهم
*اسي عليكم الله
*لو ما الهلال كان عرفنا انو النسور اتظلمت في بلنتيين عديل كده ؟؟؟
*غير كورة النسور ضد الهلال
*اتحدي مريخابي عرف النسور لاعبه متين تاني
*وكذلك الحال
*الاهله بعد قون حسن كمال فينا
*مريخ الفاشر بلبس شنو ماعرفوهوا
*الا يوم مريخ كوستي شطب سيمبو في استاد الهلال
*اليوم داك عرفوا الله واحد
*ايها الناس
*يبقي كلو زول يحب ناديهو زي ماعايز
*ويقدم ليهو
*فقط يحترم الآخر
*عشان تحترمنا الكورة
*وتصعد بينا لمصاف الابطال
*ايها الناس
*حقو نحاول يمكن نقدر
*المهم
*ماشاء الله الاذاعه الرياضيه اعلاناتها كتااااااار
*لكن اللفت نظري
*الشفع بريدوا دعايه معينه
*اول من تجي بغنوا معاها
*الدعايه بتقول
*جونيور سيد اللبن
*جونيور ده دحين ما اسم برازيلي ؟؟؟؟
*وجونيور سيد اللبن
*لحنها جميل
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان قلت يا والينا
*المدارس تفتحها لينا
*اول شئ المراوح في فصول الزنكي ركبها لينا
*طبعا ما عشمانين تكندشها لينا
*حيشان المدارس شجرها لينا
*بين كلو طالب وطالبه مسافه خليها لينا
*اعمل كليك بين كلو طالب وطالب يا والينا
*وجموع اطفالنا من السحائي تطعمها لينا
*وما دايرين نتكلم عن الترحيل يا والينا
سلك كهربا
ننساك كيف ورمضان والمدارس والخريف كلهن جايات في الصيف
خريف في الصيف ؟؟؟؟؟ صعبتوها علينا يا والينا
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.