عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
1
يا شيخنا سمح الزىْ
سيب الكلام النىْ
خليك أمين في القول
الشعب ماهو جِنىْ
وما هو البيتغشى
بى صوت أبو التَىْ تَىْ.
2
شعبن ملان بالدين
من قام صغير وصِبىْ
يعرف طريق الله
من دون وسيط ووصَىْ
عامر جوامعو صلاة
ومنورا بالضـىْ
وأساس جوامعو عـريق
وتاريخ كنايسو نِدىْ
بت وهب أو مريم
ما دين ضلالة وغــــىْ
الدين في جسمنا روح
والدين عشِى ْ وغِدىْ
شيخ في الخلاوي بِكىْ
ودموعو صابات رىْ.
2
يا شيخا سمح الزى
مالك سكتِا زمان
والشعب قاسى الويل
وضاق العذاب ألوان
اتكممت أفواه
واتشوهت أبدان
وكانت كتايب الويل
مشرورة زى شيطان
وبقت بيوت الموت
مفتوحة للشجعان
وأيدي الكرام غُلَتْ
واتقدم الغبيان
وساحت أسود بلدان
في غربة كل مكان
واتراجع الأحرار
واتقدم الغبيان
وأتوارى كل جسور
واتقدمت فيران
واتبددت أحلام
كانت ندية زمان
وبعد ثلاثين عام
كان الجزا بمبان.!!
بعد تلاثين عام
كان الجزا حرمان
بلد العيوش والقموح
فيها البشر جوعان
وبلد الذهب والرطب
فيها الوطن عريان
لما الكروش كبرت
واتطاول البنيان
وأيدي الكرام غُلَت
وأستأسد الوسخان
الدين هناك ماراح
راحت مواقف الناس
الوالت السلطان
وشعب المكارم راح
يستجدي للجيران.
3
يا شيحنا سمح الزى
لا تهدد الاحرار
ولا تقوَم الاوجاع
تحت الوميض النار
كفانا يا اخي جراح
في كل بيت مجروح
محزون وكايس تار
لكن أقيف عاين
شوف الملايين دي
صلَت بدون اخطار
وبدون يجرَها
زول
للمشهد الجبار
الدين دا دين الله
ما دين وصي مكار
والدين صلات وحياة
مليانة بالاصرار
وبلادنا تربات دين
ما بعلمو ثرثار
وبلادنا دينا ورع
بيصون حقوق الجار
ما دين دقون لوحات
زرعوها بالمقدار
وسووها درب حصاد
لليورو والدولار
وبلادنا طاعات ناس
مليانة استغفار
وبلادنا ضيف هجعات
بيضووا ليهو النار
وناس بلدي ناس توحيد
للواحد القهار.
4
أفتح مديحنا اسمع
تلقا الورع والدين
ويوم لى غنانا أرجع
تلقاهو من يا سين
لانو مليان قيم
فيها العديل والزين
ومحروس بكل نعم
فيها العنب والتين
وشوف كيف قدحنا يلم
من كانوا جوعانين
وشوف كيف صفرنا تضم
عازم ومعزومين
شن دار تزيد في الدين
يا شيخنا دينَا مكين
وشن دار تسووا دحين
للدين وكت سارقين
وهدف لكل شهيد
في دمو غرقانين
أسمع كلام الحبيب
لو فاطني بتي دي يوم سرقت
نعمٌ وأيم الله
لقطعتلا الأ يدين.!!
5
يا شيحنا أسمع وصٍنْ
وأنا وانتا لينا وطن
يجمعنا يوم ويحن
يعني الحكاية تكون
بيناتا زى win-win
لا انتا تظلمني
أو أظلمك بى ظن
لا زول يكون دجال
أو زول يسخر جن
لا فينا زول سجان
أو زول مكانو سجن.