رأي صريح

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

*وقفنا في السطر الأخير امبارح عند العفو والعافية بعد ما اعتذرنا للحضري واتصافينا معاه وقرينا الفاتحة كمان .. قلبنا الصفحة وقبل ما نفتح صفحة جديدة اتذكرنا حاجة مهمة نسيناها امبارح .. الحاجة المهمة دي .. مشوار فركة كعب يا حضري .. معليش عارفنك تعبان وليك يومين لافي كعب داير من مطار لي مطار ومن مدينة لي مدينة .. وزيادة علي كده كنت أول واحد في الملعب.. لكن برضو عشمنا فيك كبير .. دايرنك يا حضري تثبت للناس الممصدقين تضحياتك دي انو الكبير بفضل كبير زي ما قلت كده في مطار القاهرة .. مشوار صغير يا حضري لا بي طيارة ولا حاجة .. يعني جواز سفرك عندك .. طبعا متذكر يا حضري صديق علي صالح ومصطفي توفيق ومجاهد .. نحنا ما قصدنا نذكرك الحصل ليهم بي سببك  لكن دايرنك تطلع من اللوم وتبري ذمتك .. أها تقوم  يا حضري تدور الكامري من الصباح لا من شاف ولا من دري .. ولا أقول ليك حاجة .. أحسن تتاخر شوية بعد الفطور عشان الشوارع زحمة وانت ما ماخد علي زحمتنا دي ..  تاخد المشوار لي بحري .. تمشي بي كبري المك نمر وبعد تصل المؤسسة تاخد يمين .. لمن يجيك تقاطع المزاد تاخد شمال وتمشي طوالي لحدي ما تكمل الشارع .. تلقي بيت صديق علي صالح قدامك .. أصلو ما تضرب تلفون عشان المفاجاة تكون حلوة وعشان الصورة تطلع أحلي .. طبعا ما بنوصيك من السلام والذي منو .. بعد تطلع من صديق ترجع بي سكتك زاتا وتجي بي جم شقتك لكن ما تنزل .. تكمل شارع المطار وتنزل النفق بتاع عفراء وخليك في الحارة اليمين عشان تدخل بي لفة كنار تل .. لمن تصل هناك تحسب خمسة شوارع وتاخد شمال .. أها دي الصحافة .. معليش بيت مصطفي وصفو صعب شوية .. تقوم تسال بتاع الدكان الفي الناصية يوصلك لي خشم الباب .. اها لمن تقابل مصطفي .. أصلو ما تفكو من يدك عشان تمشي لي مجاهد في أبو ادم .. أبو ادم دي ما بتقدر عليها براك .. لازم الحجل بالرجل مع مصطفي .. ومصطفي راجل حبوب .. بعد جيتك ليهو في البيت ما بخليك تمشي براك وما مكن يكسفك .. أها بعد كده عداك العيب مع التلاتة ديل .. انت العليك عملتو والباقي علي ناس عبد الباقي.
*أعفي لينا يا حضري .. انت عارف براك نحنا ناس طيبين والمجاملات دي مهمة عندنا .. ونحنا كمان عارفين ضميرك ما مرتاح للحصل لي صديق ومصطفي ومجاهد .. لكن أهو عملت العليك .. ونحمد الله يا حضري انو الفريق عبد الله طلع زول هدي ورضي .. لو ما كده كان تلتلناك بي مشوار تاني عشان تتصافي معاهو .. براك شفتو في شندي جاء فاجأ الناس كيف وحضر المحاضرة والمباراة .. ده كلو عشان تفهم يا حضري انو ما كان عندو معاك مشكلة ولا رافض انك تلعب في المريخ وتصريحاتو ديك كانت في لحظة زعل .. أصلو حب المريخ ده مرات بخلي الواحد يطلع من طورو .. الفريق عبد الله ده يا حضري ما من الساهل يجي يحضر المباريات ولا حتي التمارين في استاد المريخ .. لكن مشي شندي مخصوص وحضر كمان المحاضرة بتاعة المباراة .. ده كلو عشان تعرف غلاوتك كيف .. نحنا يا حضري شارينك وما مستعدين نفرط فيك بالساهل .. سيبك من كلام الناس ديك .. وزي ما توقعنا امبارح .. في ناس حا يطلعو يدونا حصص في المباديء والقيم .. ديل حساد ومعارضين يا حضري .. الحساد عندنا ما شوية والمعارضة كمان لا بعجبها العجب ولا الصيام في رجب .. معارضتنا دي يا حضري ممكن تقول زي الفلول بتاعنكم اليومين دي في مصر .. أيوه فلول عديل كده .. ديل أصلو ما دايرنك تلعب لينا ودايرين يشمتو ويضحكو فينا بعدين.
*الحمد لله يا حضري انك بتعرف حركات الفلول دي كويس وبتعرف تفرز الكيمان .. يعني هسه انت ما عندك أقرب من متوكل وابوجريشة .. ومتوكل ده بالذات لازم تتوصي بيهو .. شفتو براك كان واثق من رجعتك كيف .. متوكل ده شدة ما أخلص ليك يا حضري .. طلع في التلفزيون وقال كلام .. الناس كلها استغربت منو واعتبرت كلامو فتنة وفي النهاية طلع حكمة.
آخر سطر
*لحدي هنا كفاية .. هدينا النفوس والعفو والعافية بنقولا المرة دي لي صديق ومصطفي ومجاهد.