مصادرة عدد اليوم الجمعة ٣١ اغسطس ٢٠١٨م بعد الطبع و(الجريدة) تعلن التوقف عن الصدور إحتجاجاً يومي السبت والأحد وستقوم بتقييم كافة خياراتها وتجدد لقرائها الكرام إلتزامها بشرف المهنة وشرف الكلمة والأمانة ولن تحيد عن طريق الحق والمبادئ وتدين الهجمة الممنهجة للتصفية بإسلوب إرهابي (بلطجي) خارج دائرة العدل والمحاكم. / جمعة مباركة
ليك درب ولا دربين مساك الدروب ضهاب
ليك قلب ولا بالين وسواى القلوب كضاب
ليك ضهر ولاسرجين ركاب السروج وقاع
______
نحن اهل الفرحه جينا
لا المدامع وقفتنا ولاالحكايات الحزينه
لما درب الرايحه جابنا جابنا في هادى المدينه
ياولدى الدروب شقاقا بحر التيه
ليك درب ولا دربين مساك الدروب ضهاب
ليك قلب ولا بالين وسواى القلوب كضاب
ليك ضهر ولاسرجين ركاب السروج وقاع
شق ياولدى بحر التيه بتتدردر وتتودر
ولامن يوم علي تايتنا ديك ترسي
نعزك بالقبيل داخرنو ليك
الشوق بحر ياولدى بحراً تيه
قت ليك العليك ادرابو لا تنغش ولا ترضابو لاتنغش
في الزمن الزمين والكي يسوهو خلاف عشان الني
عليك الدور وتصريف الليالي بدور تشيل ما شلنا من الهم
ولا من دمعه ترمي الدمعه فوق دربك
روح يابا .. وابق قفاك لاتعاين ولاتعاين علي موطاك
ولا تندم علي خطوا تملي مشيتو لى قدام
وابقي العاتي زى سنطتنا زى صبرا نلوك فوق مرو زى الزاد
لاشيتاً نزل في الجوف ولابرجع ولا بنزاد
واركز للبجيبها الريح تقيف انت ويشيلها الريح
وابقي العاتي والدرب الوراك مسدود و شيل شيلتك
بقيت للنص لاحلما بجيب البر ولا حدود
وانبليتا اختا الرمله ما تقع البكان الهش
هي الممطوره مابتبالي من الرش
النعمه بتعرف عاطيها والجمره بتحرق واطيها
بالكيله عطانا و ما لقينا فوق جمر خطانا وما لقينا
يوم الوعد… ياحليوه فيك الدنيا ما كانت شروق
الا الارض متكشفه متبلمه نعمنو من خير الخريف
لافحالها شال منطرحه خضرا وفرحه دوب تتشابي لي عين الشمس
من بت حليوه النفس بيضا كذا الحليب
والروح مشحتفه في البلود الفيها ريحتك
للبعود من فزعة الغربة البساسق فوقا
موراجع ولا بالحيل قريب
الروح مشحتفه في الحبيب القلب بكر الدنيا ما شافت جديدو
ولا الحزن دقالو باب
وشفتي كيف يوم الوعد كيفنو مترامي الغمام
والقمري زغرد للبلوم النسمه هبت مرتين
يا حليوه يوم دقيت بارضك فاس خصيب والتانيه في
يوم الوعد والايد تسالم في الايدين
والام تقالد فوق جناها تشمو زين
وحليوه صاحيه حليوة ضاحيه كذا النسيم
والدنيا غيم وحليوة جد جد ياولد قول للبلد
قايل غناوي الحزن ليش شايل مساديرك مجامر دمع ليش
ليش يا بلد والناس تريد والدنيا كل ما نريد تزيد
تملا الايدين تفرح تهش
لو صحيح غنينا بالدمعه الحميمه ولو دموع الفرحه ما لاقت غنانا
بكره نرجع تاني للكلمه الرحيمه شان هنانا شان منانا
شان عيون اطفالنا ما تضوق الهزيمه
القدال
الجريدة الإلكترونية عبر موقعنا
www.aljareeda-sd.net
فيسبوك
صحيفة الجريدة السودانية
fb.me/aljareeda.sudanese.newspaper
_______
المهنية – الموضوعية – المتعة
