أصل الحكاية
الحاجات عندنا كلها ماشية (بالشقلوب) وفي مرات كتيرة مابتكون عارف (الشقلوب) المقلوب في أقوال أخري سببه شنو؟ عدم معرفة ولا ظروف صعبة ولا حسابات لايعلم بها غير أصحاب (الشقلبة).. مثلا مافي زول عارف لغاية الآن المريخ سجل لاعب زي عمر سليمان واعارة بعد خمسة دقائق ليه؟ لأنه تسجيل جديد معناها محتاج ليهو وإعارة معناها لاعب فشل في أثبات وجوده مع الفريق .. وعمر سليمان تسجيل جديد معناها المريخ محتاج ليهو و اعاره معناها فشل في أثبات وجوده مع الفريق .. ولأنه الموضوع عندنا ماشي (بالشقلوب) المريخ سجله وهو لايحتاجه وأعاره قبل مايلعب مع الفريق .. موضوع عمر سليمان لاعب الجريف حاجة كده زي السؤال الشهير الأول منو البيضة ولا الجدادة؟ وممكن يكون أصعب لما يسأل واحد سؤال علمي جاد ماهو أصل الكهرباء؟ وينتظر منك إجابة .. قلت ليكم القصة كلها ماشة كده (بالشقلوب) .
الموضوع ماوقف عند المريخ في الهلال برضه في (شقلبة) بعد مفاوضات وصل مجلس الهلال لإتفاق مع نادي الوحدة السعودي لإعارة لاعبه محمد احمد (بشة) لمدة عام.. المبلغ ماكبير 250ألف دولار .. ماكبير دي بالدولار لأنه بعملتنا (الماخمج) قروش كتيييييرة .. الهلال بس بطلع بمليار وشوية في حساب 200الف دولار نصيب النادي و50 ألف دولار نصيب اللاعب يعني نصيب (بشة) قريب من 300 مليون في سنة إعارة بالحسابات دي النادي كسبان واللاعب كسبان .. وممكن نقول المجلس رجع قروش مهند الطاهر بإعارة بشة مع إنه مادفعها وممكن يدفع منها للخرطوم في تسجيل محمد أحمد وعبدالرحمن كايا وممكن يدفع منها للمحترفين أو تكون عوضت قروش ديمبا وإحتمال أوتوبونج وتوريه ..
200 ألف دولار كان ممكن تحل مشكلة يوسف محمد لو المجلس عايز .. بإختصار المبلغ (بسد فرقة) لمجموعة من اللاعبين مرة واحدة أو للاعب قروشو كتيرة .. وبإختصار أكثر أكرر إعارة (بشة) بالدولار ضعيفة وبعملتنا بتعمل بلاوي . إذا كان دي كلها مكاسب ومجلس الهلال آخر إنبساط وين (الشقلبة)؟ سؤال .
حسب معرفتي المتواضعة لايتخلص نادي (كبير) من لاعب بالإعارة إلا للأسباب الآتية : اولا وجوده في دكة البدلاء لفترات طويلة أو خارج التشكيلة المرشحة للمباراة المحددة .. ثانيا: أن يكون علي خلاف مع مدربه ولايرغب الأخير في إستمراره فليجأ لإعارته … ثالثا : أن تضطر ظروف النادي الإقتصادية مجلس الإدارة لبيع أبرز نجومه .
إذا فصلنا هذه الأسباب علي إعارة اللاعب محمد احمد بشة سنجد أنه يمثل ركيزة أساسية في الفريق بل يعتبر من العناصر المؤثرة التي صنعت الفارق في كثير من المباريات بجانب أنه لاعب مهام من الدرجة الأولي لعب بنجاح كبير في أكثر من وظيفة في الدفاع والوسط والهجوم وظل حتي نهاية الدورة الأولي يؤدي في وظيفة الطرف اليمين التي عاني الهلال من نقص حاد فيها لمغادرة عدد من اللاعبين وإصابة البعض الآخر.
ومن هذه الزاوية لاتنطبق عليه الإعارة فهو أساسي ومؤثر .. أيضا لاينطبق عليه سبب الخلاف مع المدرب فعلاقته مع مدربه سمن علي عسل ويعتمد عليه كثيرا في تنفيذ توجيهاته .. لم يبق سوي الظرف الإقتصادي الذي تضطر من خلاله الأندية الكبيرة لبيع نجومها لمعالجة أزمتها المالية .
ليغادر بشة معارا لنادي الوحدة السعودي وفريقه يحتاجه لمواجهة هامة في دور الترضية ببطولة الكنفدرالية .. مواجهة مصيرية تحسم صعود الفريق لدور المجموعات أو مغادرته من هذه المرحلة ..
وبرضه ماشية.
hassan faroog [hassanfaroog@hotmail.com]
