جملة مفيدة
شحنة من براميل النفط وصلت الميناء الاحمر ولم يعد لها متسع.. مستودع الخانات في الميناء الاحمر ممتلئ عن اخره غاسيروكا مجهول الهوية استعصى امر تجنيسه وأدخل (الوالي) في اكبر ورطة..وكان التركيز عليه لانه (اكبش) واحد في قائمة المحترفين ولا حل غير تجنيسه لكن كون رواندا تبرت منه وجزمت بانه عابر سبيل يحمل جنسية اخرى فقد خشي اهل الوصيف من (كشف الفلم) ولجأوا للعريس كلتشي الذي ابى وتمنع وكان لابد من اغرائه لانه اشتهر بحب المال .. جابو ليهو زيارة وسيروهو بالطيارة.. ونادر مالك وزير العريس حننوهو.. جرتقوهو.. مش في العرضة.. هناك في بلاد العم سام في امريكا ذاتها حلم شعب افريقيا التعبان غنى كلتشي ورقص وهجج على انغام الدلوكة سيروه ده ود القبيلة.. سيروه وربطو ليهو الحريرة.. سيرو.
وزغردت انصاف مدني وغردت يمة كلتشي بريدو حننوه الليلة يوم جديدو.. حننو.. 20 شاحنة عشاء سيرو.. بريد الهلال وما اختشى.. كرهو.. كرتونة دولارات امريكية.. عشان يرضى بالجنسية.. امو قالت حرمان ما يدخلن علي.. برضو جنسوا!!
كيف؟؟
حاولوا مع الشافع اليافع وارغو اصطدموا بطموحاته وكونه قنعان منهم (ظاهر وباطن) فرغبته في الرحيل.. اي رحيل.. اقعدتهم عن كثر المحاولات..رضخوا وبقوا منتظرين يطقطقوا في الاصابع.. بلجيكا ردت؟؟ لا لسة!! في جرس.. ديل الدراويش ديل كرهونا غرقانين في الديون وما صدقوا الوالي فتح خشمو.. ما ترد يا قريش.. ده ما انا العايز يرد.. ده متوكل..!
الجرس رن تاني.. شوف يمكن بلجيكا على الخط.. ده الحضري قال عايز خمسة مليون دولار عشان يشطِّب الفيلا ويعمل صيانة للمزرعة ويغيِّر العربية وعندو شوية ديون كدة في سويسرا عايز يسددها!!
اقفل الخط.. ولو ضرب هيثم المرابط على النمرة التانية ما ترد يا ابراهومة.. ديل كلهم من غير تجنس لينا واحد نلقى ليهم خانة وين؟!
تلفت الوالي يمنة ويسرة وحك راسو وبلع ريقه واتوكل على الحي الدائم.. مرق طيران مشى وين ما في حد عارف!!
جاء بعد ساعة متبسم ابتسامة عريضة اعرض من العرضة العرضوها هلالاب امريكا يوم عرس كلتشي.
في يده ورقة فاخرة..
خطاب من رئاسة الجمهورية شخصيا.
انتو اصلكم لو ما وصلتونا المرحلة دي ما بترتاحو..!
فرمان رئاسي جديد لنج.. تقول لي جنسية ايداهور جاهزة قبل ما ينزل من الطيارة!! طيارة شنو..!
كلتشي في امريكا.. في شهر العسل حنتو لسة لينة الامر الرئاسي صدر باننا سنقوم بالتجنيس.
لكن لسة ما انتهى التجنيس!! لكن بيني وبينكم بعد الخطاب الرئاسي ده كلتشي ح يوافق مية المية.. لكن المشكلة شداد كيف ح يعمل؟ وعمل شنو في ابداء الرغبة الذي قام به النفطي في الاتحاد.. كيف النفطي ابدى الرغبة والخانات مليانة والجنسية ما طلعت وكلتشي ما جاء مريخكم جاط يا شمات!
فلنفترط كلتشي رفض الجنسية بايعاز من الرابطة الهلالية في الولايات الامريكية عندها كلتشي ح يكون لافي صينية لان الخانة محلية.. والقصة بقت ملوية.. تطير عيشة اللائحة الشدادية الاتورطت في قضية ما خطرت على بال الجمعية العمومية.
العملتو في بكري المدينة تلقو في شطبه كلتشي..!
يا ترى ما هو المستند الذي اودعه المريخ في ملفات الاتحاد حتى يتسنى له تسجيل النفطي كلاعب محترف في خانة كلتشي الذي يفترض مسبقا ان يكون سوداني مجنس وإلا يحلها الشربكا..!
في المريخ الآن وارغو محترف وغاسيروكا محترف والنفطي محترف.. المرابط ح يجي شنو؟ مرابط اول ولا رجل خط؟!
في المريخ ايداهور.. الزوغان بالدور.. مجنس.
لاسانا .. الما بعرف يلعب معانا.. مجنس.. كلتشي.. (باعتبار ما سيكون).. مجنس..! الحضري ح يجي باي صفة؟!!
نقول جاء وفق اتفاق الحريات الاربعة.. دي عن شداد في نسخة منها!!
طيب دخل السودان من نفس المطار الذي دخل منه قرابة الخمس آلاف مشجع مصري بدون إجراءات.. دخل معزز مكرم الاخيرة دي ذكرتني اكرم.. اللهم اجعله خير!!
طيب المستند المفترض يكون في مكاتب الاتحاد شنو؟؟ ان كان جواز سفر فهو مصري وليس سوداني اذن محترفو المريخ اربعة.
إن لم يكن المستند جواز سفر (في حالة الاجانب) يفترض يكون جنسية في حالة انه سوداني بالميلاد او مجنس بعد اعياد الميلاد..
طيب الحضري هل وافق على الجنسية؟ وإذا وافق مجنسين المريخ ببقوا اربعة غير المرابط لسة ما معروف مصيرو وهو جاي بكرة.
احتمال في خطاب رئاسي تاني خاص بالحضري.
واحتمال في خطاب رئاسي ثالث خاص بالمرابط.
كله جايز ؟؟
المعز حارس مرمى (منتظر).. الحضري حارس نعمة غالبو يفرط فيها.. دامر دقشو برميل النفط خل عجاجو يكتح.. حليل دامر يا حليل دامر.. الباشا اعارتو في مزاد علني ولا يوجد زبائن.. زول باشا تعملوا فيهو كدة.. سفاري لمان ما لم في قروشو سمسر بي اخوهو يعمل شنو مسكين عايز يفرح بي جديدو.
كلتشي تعرسو ليهو في امريكا.. سفاري ما تدوهو حق قولة خير؟!!
اخيرا تأكد ان الخطاب الرئاسي هو مفاجأة الارباب التي فجرها عديله الحبيب تكعيب جمال..
مشى قلنا ليك جيبهم واحد..!
الهلالاب ختو في الكشف اكثر من المريخاب.
اتذكرت مرة (نفرة) عملتها رابطة المريخ في الرياضي.. الهلالاب كانوا اكبر حضورا واكثر تبرعا.. I love Alhilal موووووووووت!
العجب.. طمبل.. قلق.. بلة.. اكرم.. الشغيل.. الزومة.. راجي.. مصعب اسماء × حياتنا زول جايب ليها (خبر) مافي.. برغم انهم كلهم عندهم جنسيات!
جملة اخيرة
في غمرة الاحداث انشغل الناس عن دفاع الهلال فالجهة الخلفية تحتاج الدعم اكثر من الوسط الذي ازدحم والهجوم الذي كاد يفيض.. ان اصيب سامي وانذر ديمبا مرتين.. لم يبق غير منير!! عارفين كدة يا غرفة يا سحرية؟
هلال العز Alilal [mohamed_msn100@hotmail.com]