أصل الحكاية
عندي راي بقولوا في أي مكان عن المنشور في الصحافة الرياضية ودوره الكبير في نشر ثقافة الجهل والترويج للأكاذيب والفبركة والدور الأخطر في تغييب وتزييف الحقائق وتغبيش الوعي عشان كده لما قريت خبر الموسم بإنتقال بائعة الطعام (بطة) من تشجيع فريق الهلال لتشجيع فريق المريخ وإنها إستلمت حافز (الإنتقال) 20 مليون جنيه سوداني (بالقديم) عرفت إنه إنهيار الصحافة الرياضية وصل مراحل متأخرة للغاية وأننا فعلا نعيش واقع إستثنائي أصبحت فيه الصحافة (هاملة) وماعندها وجيع ممكن أي ونسة تافهة أي هزار أو رهان يبقي الخبر الرئيسي والتقرير البارز والحوار القنبلة .
حاولت بقدر الإمكان تحاشي التعليق علي موضوع (بطة المريخية) ونجحت في ذلك إلي أن جاءت مباراة المريخ وفريق الفهود السوداء الجنوب أفريقي الغريب أنني من اللحظة التي بدأ فيها العد التنازلي للمباراة وأقتربت الساعة من الثامنة موعد إطلاق الحكم لصافرة البداية أول حاجة (جات) في بالي كانت (بطة) وبصراحة ماعندي معلومة هي كانت بتشجع الهلال لي ياتو مدي لأنه مواعيد المباراة من ثمانية لعشرة مساء مواعيد الشغل عند (بطة) ماقدرت أعرف بتخلي الشغل وتقعد تحرس الراديو لو في الإذاعة ولا تتابعها في التلفزيون ؟..
ركزت مع موضوع (بطة) في مباراة المريخ الأفريقية لأنها أول مباراة لها مع فريقها الجديد بالمناسبة (بطة) ممكن تدخل قائمة جينيس للأرقام القياسية بإعتبارها اغلي مشجعة في العالم (20 مليون) جنيه .. جنيه ينطح جنيه .. تقول لي البلد فيها (تقشف) ؟
وتمنيت بحجم الضجة التي أثيرت في بعض وسائل الإعلام أن تكون جمعيها حضورا يوم المباراة وياريت لو كانت (الشروق هناك) مع (بطة) في مقر عملها تنقل لنا الحدث الأبرز علي الهواء مباشرة قبل المباراة وبين الشوطين وبعد نهاية المباراة لنقف علي الأجواء بصفة عامة وردود الأفعال بعد النهاية المخيبة للآمال .
كنت أود مع كثيرين أن نعرف توقعات بطة لفريقها الجديد قبل إنطلاقة اللقاء وماذا قالت عنه بين الشوطين والفريق متقدم وماهو شعورها مع النهاية الدراماتيكية وشباكه تستقبل أسرع وأسهل هدفين .
هل هي غاضبة علي المدرب البرازيلي ريكاردو ولماذا ؟ أم أنها من أنصار (هو ماعندو ذنب يعلم شنو في أخطاء ساذجة زي دي) . وهل تري (بطة) أن الخطاء من الحارس ياسين وفي ياتو هدف الأول ولا التاني ولا الهدفين مسؤوليته؟ ولا بتحمل المسؤولية للدفاع لأنه ماواقف صاح؟ ولو كان واقف أكرم ولا الحضري كان ممكن تدخل الأهداف دي؟
ورايها شنو في الحركة العملها اللاعب أحمد الباشا بعد ماجاب هدفه الشخصي التاني والثالث لفريقه لما جري علي جمهور المريخ و أصبعه علي فمه يعني (أسكتوا) رايها شنو في السلوك ده؟ وتقول شنو علي رد فعل الجمهور لما (فلقوهو) بالقارورات ؟ الغلطان منو؟ الجمهور البيشتم الباشا في كل مباراة ولا الباشا القال ليهم أسكتوا أنا موجود ؟
وبعدين مفروض (بطة) بإعتبارها هلالابية سابقة مفروض توضح شعورها شنو وفريقها السابق بعد ماتركت تشجيعو متفوق بنتيجة مريحة علي فريق سيركل باماكو المالي .. وفريقها الحالي بعد ما إنضمت ليهو متفوق بنتيجة مزعجة ده بتفسروا بشنو؟
وهل المريخ قادر علي العودة من جنوب افريقيا تضمن التأهل ولاخلاص باي باي من الخرطوم؟ ولو المريخ طلع من الكنفدرالية حاتواصل في تشجيعه ولا بترجع للهلال.
السؤال الأهم (بطة) حضرت الكورة ولا كانت مشغولة؟
hassan faroog [hassanfaroog@hotmail.com]