لاتفكر يا صاحبي اننا قد خلصنا من موضوع الحبس الاجباري الذي فرضته علينا حقنة الركبة التي شكت مني ولم اشتكي لها لاستهلاكها الغير رحيم وانا هنا اعي جيداً ما اقوله فنحن بشر لا نحترم اعضائنا والتي لها بالتأكيد حق علينا وزمان كنّا بنسمع اهلنا بقولو (مضارفة المؤمن على نفسه حسنه) والمضارفة دي كلمة في غاية المعقولية لو تمعنا معناها لأيقنا تماماً حكمة اولئك الاهل، عندما يقع لنا مكروه مثلاً كانوا ينصحونا بقولهم يا ولدي اتضارف على نفسك) بالله في محبة ورأفة اكتر من ده غايتو انا اليوم عكست وعكست دي عندها معنى تاني (وهي هنا بمعنى العناد) شوف ليك شلاقة كبر كمان وانا في الحقيقة عاندت مخسوس عشان اكتشف مدى تحمل ركبتي للمشي (لزوم تسليك بلغة المكنيكية)ودي طلعتي من الحبس الاول وقلت ياود اخد ليك قدله وسيبك من حكاية الركبه المكعوجة دي اها قوم يا ود العيش وانت ماشي في شوارع كاردف تقوم تَعتِّر ليك نخلة-ااى النخلة الواحده دي وكمان سمييينة ومدوعله وديك يا سمحاة الدنيا عليها زي ما بقولن اماتي الله يرحمهن الكان مقياس جمال المرأة عندهن بالشحم واللحم وكيف لا وقد كانت البنت قبال يوم العرس لازمن تدخل معسكر تشحيم وتعليم وحكاية تعليم الاخيرة دي حقيقة كانت تقوم تقوم بدوره المرأة المتزوجة ومهمتها انها تقوم بدور تعليم البنت المقدمة على الزواج عن فن الاتكيت للتعامل مع عريسها بس لابد ان تكون هذه المعلمة من الاسرة او مامونة لسرية الموضوع..
ما اتوهكم من المضوع النخلة ارداف عراض دي، قول يا زول وانا ماري (البى العصر مروره زاتها) اذا بي ولدهشتي الشديدة ولضيضية اعتر على هذه النخلة الماخمج وبيني وبينكم فكرتها صناعيه فكيف تنبت شجرة نخيل هنا وهي ابنة الصحراء الجافة اها قول يازول وقفت مشدوهاً تارةً ومتعجِّب تارة اخرى ولمن تاكد لي اصالة وعراقة ست الحسن والجمال لقيت اني بلوم في رقبتي واقول ليها هو نان انا مولود هنا وبعدين الخلاني اتأقلم مع الحياة في هذه البلاد هو الخلّلا النخلة دي تعيش معززه ومكرمة وكمان وجودها هنا يؤكد عمق الترابط بين الشمال والجنوب..ويا نخلة بلدنا زول كان بعزك ياحليله..دام عزكم
Osmanyousif@icloud.com
