سودانايل أول صحيفة سودانية رقمية تصدر من الخرطوم
أصل الحكاية
قلنا نخفف القضية ونقول موضع (بونية) البرير شأن رياضي معالجته مابتتم إلا بقوانين الرياضة وإنه القوانين الرياضية إما زادت العقوبة أو نقصتها أو أيدتها وطبعا ده في حال إستئناف القرارات.. كتبت الكلام ده وقلته في فضائية الشروق من خلال برنامج ساعة رياضة أيام تطورات القضية ونددت مع آخرين بمحاولات التشفي والإنتقام من البرير ومحاولة الخروج بالقضية من المنظومة الرياضية للقوانين الحكومية وتصفية الحسابات الشخصية .
أمس حصلت حاجة عجيبة مجموعة من جماهير الهلال إتجمعت في النادي جات براها مامعروف حشدوها مامعروف وإن كان في ظروف تشبه دي معروف الجماهير بتجي كيف ؟ المهم وسط حشود الجماهير البرير إتكلم وقاقارين وناس تانيين إتكلموا واحدين هاجموا القرار وواحدين رفضوا القرار وتانيين ومنهم البرير هاجموا الإتحاد وفي القال سنناهضه والقال حانستأنف و..و..و إلي آخر القوالات ماهو أصلا الكلام مابقروش والعايز يقول يقول لكن القول بعمل شنو؟ ده السؤال وطبعا سؤال إجابته واضحه وقبل ماأواصل عايز أرجع بالذاكرة لغاية 7يناير 2006 المناسبة كانت مؤتمر صحفي عقده دكتور كمال شداد رئيس الاتحاد العام وقتها للرد بالمستندات علي ماكتبه صلاح إدريس (لولا أموالي لما اشرقت شمس كمال شداد) تفاصيل القصة معروفة ..
شداد قال في المؤتمر في رده علي تهديدات صلاح إدريس بإسقاط الإتحاد العام خلال إسبوعين وقتها أنها مثل تهديد حي ام ضريوة بمدينة بحري لأمريكا بعد ضرب مصنع الشفاء في لافتة شهيرة مكتوب عليها (أم ضريوة تحذر أمريكا للمرة الأخيرة) ولم يعجب تصريح شداد وقتها بعض أبناء الحي العريق.
وماحدث من بعض الجماهير الهلالية التي إحتشدت بدار النادي من هتافات وتنديد ورفض لقرار الكاف ضد البرير حدوده أسوار النادي فقط .. يعني لو حملوا البرير علي الأعناق أو تركوهو علي الأرض ولو قال قاقارين المستهدف الهلال أو إتهم البرير الإتحاد العام ولو هتفت الجماهير الشعب يريد تغيير حياتو ح يظل القرار ساري .. عشان كده مفروض البرير يوفر المجهود لشيء فيهو فايدة ..
وهو بالقوانين الرياضية مدان .. مدان .. مدان لغاية مايستأنف للمحكمة الرياضية في لوزان أو يتقدم بإسترحام لتخفيف العقوبة وأفضل ليهو الخيار الأخير (الإسترحام) لأنه المنظومة الرياضية سندها في العقوبات تقارير المراقبين والحكام وبتصدقهم لأنها بتفترض فيهم الحياد وماعندهم مصلحة في إدانة البرير من عدمها عشان كده من النادر تخرج قرارات الكاف أو الفيفا في قضايا في محيط الملعب وماحوله من تقارير المراقبين والحكام ..
ماحدث أمس الاول بنادي الهلال وقبله من مسيرات وهتافات جماهيرية في قضايا مختلفة يحتاج وقفة طويلة مننا في طريقة تعاملنا مع القضايا الرياضية فالجمهور تحديدا دوره في كل مايتعلق بالرياضة وفي الرياضة كرة القدم في المدرجات للتشجيع أو في حال وجود جمعيات عمومية لإكتساب العضوية للإنتخابات إما ناخب أو منتخب غير كده حتي لو طلعت الجماهير في مظاهرات غطت كل مكان في السودان عقوبة الكاف لن تتغير يابرير.
عشان كده أنسي حكاية المؤامرة والتآمر لأن القرار من الأول من الكاف وأستند فيهو علي تقرير المراقب وتقرير الحكم وأنت من إستأنف القرار وليس أي جهة أخري وأبحث عن الحل الأمثل والأفضل لهذه القضية بعيد عن العواطف ونظرية المؤامرة.
آخر الحكاية
لجنة الحالات السالبة حولت البرير للجنة الإنضباط .. هل تحققت نظرية المؤامرة وتأكد أن الإتحاد يستهدف الرجل خاصة وأن رئيس اللجنة محمد سيداحمد له تصريحات عديدة حاولت إدانة الرجل عبر وسائل الإعلام ومن خلال إجتماعات مجلس الإدارة رغم أن الإتحاد ليس الجهة المسؤولة عن محاسبته .. السؤال أين كانت لجنة الحالات السالبة عندما إتهم جمال الوالي الإتحاد بالضعف وأين كانت ومتوكل أحمد علي يهاجم الإتحاد ويصفه بذات الصفة داخل مكاتبه في لقاء مع الصحفيين؟
hassan faroog [hassanfaroog@hotmail.com]\\\\\\\\\\\\\
