سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• الزعيم سيخوض مباراة الخرطوم بالصف الثاني
• ليس تقليلا من شأن الخرطوم
• ولا مكايده للفاتح النقر الذي لايري في المريخ عجبا طويلا ولا وارقو جميلا
• ولا استهتار بالهلال علي اساس انه لن يصل لمنصة الزعيم
• ولكن نخوضها بالصف الثاني عشان نفعل الصف الثاني شويه
• نلعب بالصف الثاني
• سفاري في الدفاع
• النفطي في الوسط
• الشجره في المحور
• غاساروكا مساك
• سعيد السعودي
• عبدالحميد السعودي
• اكرم الهادي
• مصعب
• وكلتشي لو حصل
• غاسا ونفطي وسعودي وكلتشي واكرم الهادي ومصعب صف تاني
• الله يجازي محنك يا كاربوني
• ده الصف التاني ؟
• امال الفريق القومي كيف ؟
• المهم
• كانت بداية الكارثه مباراة الامل
• يوم رحيل ايداهو
• وكانت بداية الانطلاق ايضا مباراة الامل
• حينما اقتنع الجميع بان الزعيم كبير
• وكاربوني كبير
• ووارقو خطير
• اذن يرتبط الامل العطبراوي دائما بالتواريخ المؤثره في مسيرة الزعيم
• سيأكد الامل ايضا تفوق الزعيم علي نده في الممتاز
• وصيه
• المباراه بالزريبه
• العربيه خربااااااااااااااااااانه
• لسه في المكنيكي
• ماتحرجونا
• اي لاعب يصاب ( لاقدر الله ) يزحف في واطات الله دي لما يمرق
• مايرجي العربيه
• علي بال ما يدفروها ويكوركوا ارفع ارفع المكسور كسروا يكون جبر
• الاضاءه
• لازم اللاعب والمشجع يعملوا حسابهم
• اضاءه مازي البتصلي بيها خالتي الضهر بالليل حاضر
• اضاءه زي نور الطبلون
• خااااااااافته
• الجماعه عاملنها كده مخصوص
• واحتمال الكشافات بتاعتهم تولع كاروهات
• يعني في الكشافه الواحده لمبه تولع ولمبه طافيه
• واحده آه وواحده لأ
• من بعيد تشوفها زي سنون السكري
• واحده في وواحده مافي
• الكمامات ضروري
• ناس الحساسيه
• والناس المتعوده علي الهمبريب في طابق شاخور
• كلكم تشتروا كمامات قبل التذاكر
• روائع تعودتم عليها في ارض الحضارات
• وروائح لا تعرفوها توجد هنا حيث المباراه
• الجمهور زاتو حقو نجيب الصف التاني
• الكوره موش في استاد التاني ؟
• خلاص
• نجيب الفريق التاني
• والجمهور التاني
• والمدرب زاتو يجي ولد كاربوني بس
• كاربوني التاني
• تعالوا جميعا
• الي حيث المتعه
• تعالوا كي تتملككم الدهشه
• الفريق جميل واللعب جميل
• الاستاد ما جميل لكن الفرحه بتنسي الشكل
• كوره زي بيت العرس
• تلقي العريس مغندل والعروس فقيره والحفله بوردي والعشا من امواج والصيوان بخمسين مليون وبيت ناس العروس جالوص
• تعالوا بيت الجالوص العشا والعريس والفنان والصيوان بنسوكم انتوا قاعدين وين
• سبعه ونص
• ما تمانيه
• الحته ديك النور بقطع بدري
• والكشافات بتطفي براها
• وجنريتر ببح
• تعالي وبص
• سبعه ونص
• وصيه
• اي هدف نحرزه من خارج منطقة الجزاء الجمهور كلوا لازم يضع الكمامات
• غبار الشبكه العالق بخنق
• تتذكروا قون حمص ( حالتو هد ) قوم كترابه كيف ؟
• علي الجمهور الكريم ان يخرج بهدوء بعد المباراه مستغلا البوابات الجنوبيه
• عشان باقي البوابات بتمرقكم في سوق البصل
• وضلمه ما بتعرف ارحميني يمه
• المهم
• قناة قون الرياضيه اضافه حقيقيه لصناعة الرياضه في بلدي يا رمضان يارائع
• فقط يجب ان تؤدي رسالتها كامله
• تنحاز فقط للوطن
• تبعد قدر المستطاع عن الوجوه المألوفه والمتكرره التي اثبتت التجارب انها لاتمتلك جديدا لتقدمه
• يجب ان تهتم بالمناشط الرياضيه كلها
• تعرف الناس بها
• وتعرض امجادنا السابقه فيها
• وتستعرض موقفها الآن
• وتجبر اتحاداتها علي ادارة نشاط حقيقي يصنع ابطالا
• وتعمل علي الزام الدوله بواجبها تجاه الرياضه
• ان تراقب وتحاسب وتقترح وتقود
• حدثونا وفرجونا في ويلم اندريه والاعيسر ومايكل وساره جاد الله وممدوح وكيجاب
• عن مشاركاتنا المنشطيه الاولمبيه
• عن انجازاتنا
• فرجونا في الكشيف وخليفه عمر
• اربطوا جيل اليوم بماضي مشرق في المناشط حتي نخلق مستقبل زاهر فيها
• اخرجوا يا رمضان واخرجونا عن التقليديه وضيق الانتماء
• مادايرين نشوف ونسمع
• الو 000 مرحب ياسيد اشرف
• مرحب بيكم
• رايك شنو في حكاية العربيه ؟
• ياتو عربيه ؟
• الوقفت في النجيله
• والله انا شايف انو مجلس الاداره قصر
• طيب 00 طيب يا اشرف معانا مداخله , خليك علي الخط
• مرحب يا سيد صلاح
• مرحب , حقيقه العربيه الحصل ليها عادي جدا وممكن يحصل لاي عربيه , وحصل قبل كده لي جامعة الدول العربيه , العندو راي يجيب عربيه جديده للنادي ويسلمها لمجلس الاداره لانو هو الجهه الوحيده المسؤله
• طيب يا سيد صلاح
• ماتقاطعني
• حاضر ياسيد صلاح
• انا كلامي انتهي
• طيب 00 بنرجع ليك يا كاردينال , سيد صلاح قال تجيبوا عربيه وتسلموها لمجلس الاداره
• ابدااااا , نحن ما بنسلمها لمجلس الاداره , ولو اصروا بنجيب العربيه يوم الكوره وبنسوقها معانا بعد الكوره
• لكن يا سيد اشرف الغضاضه شنو ؟
• زي ما المجلس بصر نحن بنصر , ولو المجلس ماعاجبو يجيب عربيه براهو
• سيد اشرف حقو تحدد لينا يوم تسليم العربيه وتجيبها لينا في الاذاعه دي عشان نعنل احتفال كبير للتسليم ندعو له كل الاهله الخلصاء
• رمضان
• يارمضان
• تقليديه وضيق انتماء ضياع لرساله قناة فرحنا بها نحن اكثر منكم انتم اصحابها
• سامعني يا اخوي
• بنحلم بيوم تنافس فيه قناة قون الجزيره الرياضيه علي شراء حق نقل وبث مباريات الدوريات الاوربيه
• من حقنا
• اسمع كلامي يا اخوي
• اها
• قال ليك واحد هلالابي معجب بي جمال وبحب الهلال
• وماقادر يجهر بي حبو لي جمال
• جابو ليهو ولد
• سماهو جلال
• لسه ياروشا
• ما لقيت زول سمي صلاح ؟
• ولا علي صلاح الامير ؟
• بتذكر غايتو زمااااان في هلالابي سمي صلاح
• علي صلاح
• علي صلاح الضي
• انا غايتو لو جابوا لي ولد ما بسميهو جمال
• بسمي جمال الاول
• عشان كان جا التاني اسميهو جمال التاني
• والتالت وهكذا
• وكان جات بت
• اخت لي اسلام
• برضو بسميها جمال
• الاسم بمشي مع الولد والبت
• بشتغل بي جاي وبي جاي
• زي الجلابيه الانصاريه
• ماتنسوا سبعه ونص
سلك كهربا
قلنا ما بننسي
والي لقاء
سلك
babikir maki [b_silik@hotmail.com]
