نصوص شِعريّة
نص (1)
تَحرَم عليِ فرحة لقاك أنا للأبد
………………………..
شِن بَدور أنا بالنّجوم
ولا القمر لو إكتمل؟؟
شن بدور أنا بالغيوم
ولا السّحاب دندن هطل؟
أنا كنت راجيك الصّباح
فاتح شبابيك الأمل …
جاياني في أخر الزمن ؟
من بين ظلامات المحن ؟؟
بعد العمر شتت رحل ؟؟
رغم إنّك في دماي
شايلك معاي غربة وسفر
أنا وإنتي عنوان التّذاكر
والمواعيد والقدر ،،
قدرنا نحتضن الجّوى
الغربة والشّوق والسّهر،،
أنا وإنتي مخلوقين سوا منذو الأزل
لا نفترق لا نلتقي لا نستريح
لا يوم نصل،،
كلّ قصة ليها أخر
وليها نقطة مستهل ،،
إلاّ أخرِك وأخريِ رحلة بلا أمل
في كون ضياع
من غير متاع والزّاد كِمِل ،،
أنا وإنتي لو كان نستريح
يوم في الدّهر !!
تعبنا من ليل المواني
واحتمالات الأماني ،،
تعبنا من حزن الأغاني
ومن مناحات الشِعر ،،
ياما سرحنا مع الغيوم
ورحلنا في عزّ المطر،،
كم مرّة نُمنا علي الرّصيف
ورقدنا في ضلّ الشدر ؟؟
كم مرة وسدنا الحجر
رغم إنّك في دماي
شايلك معاي غربة وسفر
تًحرم علي فرحة لقاك أنا للأبد
أعيش ميتّم بِهواك
أموت عليك حسرة وكمد،،
نار شوقي ليك
تبراني لِي ود اللّحد .
نص (2)
خـروج الـرّوح
……………………
معــذورة يا روحــي
البتمرقي في الصّباح
متلبّـدة ومُتلـبِشة
تنسلي مني وتطفشي
تجي راجعة لي عند المسا
مترمّدة ومتغــبّشة
شايلة الدّموع حركـة حشا
………………………
متين ياروحي تنقرعي وتروقي
متين تشفي من غيّك تفـوقي
ديـمة ولهـانة وتتـــوقي
تحـاكي للقُمـري وتقــوقي
كــم حـكـيتي واشتكــيتي
كــم بِنـارِك إنصــــليتي
غـير دموعِــك شِــن لقيتي
ماقلتي تُبـتي واهتــديتي
مــن جنـون غيّـك شِــفيتي
تاني ســـارعتي وجــريتي
طايره وين ماقبيل مشيتي؟
………………………
ياروحــي شلـقانة وقرحتي
لفحتي قلبي معـاك سـرحتي
المسـكين غبــيان إتلــفّ
بَغــرَان مِنِّـــك رفّ وشــفّ
تِبع أوهامك مشى في الزّفّه
رجــع إتمـرّغ في حسـراتو
مرض الرّيد زاد من ضرباتو
أيقـاع دقاتو بِقـت أهاتو
مرّة يطخــطِخ ومرّة يشـخشِخ
شـفّ مَعِين شِــريانو وجــفّ
…………………….
أه من نــارك يا مجنـونه
شقيّة حال بالرّيد مسـكونه
بَرقِك جــامـح وريـحك نـفّ
مُوجِك طـافح ماعاد يصــفى
الغرقـان بتمـنى الضّــفّه
المرضان بالرّيد ما بيشفى
لو الوردة تغــيّر لــونا
تنسى عبيره تموت مغبـونه
ولا تعيـش بكرامـة وعِفــه
…………………….
أه مــن نـارك يا ممكونه
في وهم الرّيـد مسـجــونه
كـم رِجيـتك ما ارتجــيتي
كــم هديتك مـا اهتـديتي
ما دام مِكاجـراني وعصيتى
أهو الطّريق …..
أمشـــي ولعلك ما تنـيتي
عوض شيــخ إدريس حسن
ولايةأريزونا .أمريكا
awad.hassan59@yahoo.com
/////////////
