سودانايل أول صحيفة سودانية رقمية تصدر من الخرطوم
أخبار أخرى
اصل الحكاية
قالو في الاخبار غارزيتو رحب بتهديد جمال الوالي لما قال ليهو : (لو مافزت واتاهلت في مباراة عزام تستقيل طوالي سامع ياغارزيتو )، وبصوت راجف من النبرة الحادة والحديث الصارم من رئيس المجلس لم يجد غارزيتو مايقوله سوي : ( جدا .. جدا .. جدا ، اؤكد ليك لو ماغلبنا عزام تلقي استقالتي قدامك بعد المباراة طوالي ) (حقوق الترجمة طبعا محفوظة) ، وطبعا جمال ماوقف هنا إتدخل في تفاصيل التفاصيل العمل ( وياغارزيتو طريقة اللعب دي ماعاجباني ، وبدل ماتلعب بالطريقة دي العب بالطريقة دي ، وياخي ثبت ليك طريقة ماممكن كل مباراة نلقاك بطريقة وبتشكيلة مختلفة عن الطريقة والتشكيلة السبقتها ، علي العموم انا وريتك عندك لغاية مباراة عزام ياتغلبو ، مش تغلبو وبس وتتاهل كمان ، يعني لو غلبتو واحد صفر مابغطي معانا ، ولو غلبتو اتنين صفر مابغطي معانا ، من تلاتة ولي فوق المهم تتاهل ، ولو ده ماحصل ماتنتظرني ، قرب يقول ليهو ماعايز اشوف وشك تاني في النادي ) ، عجبتني بالمناسبة حكاية غارزيتو رحب بتهديدات الوالي ، سألت نفسي الرحب ده غارزيتو ولا واحد تاني ، لانه غارزيتو البعرفو لم ولن يرحب بالاستقالة ، ممكن يرحب بالاقالة لكن بالاستقالة دي النكتة المابتضحك ذاتو.
كلام زي ده غير انه بضحك ،بخصم كتير من رئيس نادي في قامة المريخ ، عشان كده مفروض يطلع وينفيهو جملة وتفصيلا ، والا فليتحمل كل العواقب التي ستترتب عليها ، اولها المشاركة بشكل مباشر في خروج الفريق من البطولة الافريقية علي يد عزام التنزاني ، فهذه اللغة محبطة وتؤثر علي الجهاز الفني واللاعبين ، تفقدهم التركيز ، وتنسف اي امل ولو ضئيل بإمكانية التأهل علي حساب عزام التنزاني ، وإن كانت لها في المقابل حسابات اخري يجب ألا نسقطها ، بأن الرجل (الوالي) يلعب علي احتمالين ، في حال فاز الفريق نسمع (هرشو) ولولا هذه (الهرشة) لما انتصر الفريق ونجح في التأهل ، وفي حال خسر وغادر الفريق من الدور التمهيدي تتم اقالته ويردد الكورال في اليوم التالي (الوالي كان كلامو واضح وشرطو واضح مع الخواجة غارزيتو ياتتأهل ياتترحل ، وما إتأهل قام اترحل) ، وفي الحالتين وكالعادة الوالي كسبان وماغلطان .
بس في حاجة ماقالوها او ماجات علي لسان الوالي ، انه غارزيتو عندو عقد مع المريخ ، وبمعني آخر مستحيل يرحب ، لا باللهجة (الحادة) ، ولا بالشرط المضحك (ياتتأهل .. ياتترجل) ، والفرق كبير بين الاستقالة والاقالة ، يعني ياتتاهل يانقيلك ) ، ودي ماممكن يتقال عليها ( رحب) ،كان ممكن يقولو سكت وضحك ، لانه الاقالة فيها شرط جزائي ، وقصة تحتاج الي حصص وليس حصة واحدة ، وبعدين الراجل قاعد كم يوم (يكرب) في العقد ، ورفض التوقيع عليه مالم توضع فيه كل شروطه ، يجي وببساطة شديدة (يرحب) بالاستقالة لانه الوالي (هرشو) ، بس بالعقل كده ممكن تجي ؟ عموما مالم تحدث مفاجأة ، فقد سهل الوالي من مهمة عزام في مباراة الاياب للتأهل ، استقيل يارجل .
hassanfaroog@gmail.com
