*خبر وتعليق!!!*
29 يناير 2020م…
قالو وقالُو وينجينا الله من شر قُلنا وقالُو…
كان في راجل كدي سجمان وفقران ودلاهِي، معرِّسلُو مَرَةً سمحي خلااااااااص… وبي كبُوبُو ورمادُو دا عااااااجبها وتشكِّر فيهُو وُسَامَّاهُو (الدُخرِي) كمان…
نسيبتُو مرةً (جَنَبَة) وفنجريي وبلغة اليوم ديكتاتوريي.. وهُو عشان معَلِّم الله وعدمان، ساكن في حواها وقاعد معاها في البيت…
تقوم كل صباح تلقاهُو مَرَمِّي تلالِيشُو قاعد قدَّام البيت عاطل لا شُغُل ولا مشغَلة..
تَتِف بي جنبُو كدي… وتقُول بي طَنْطَنَة أي تُب.. حال المَعَادِي نصر الدين وليدي!!!
وكل ما تهينُو ولَّة تزِلُّو يجي يتفشَّى ويِتْنَفِش ويجوووووووط في مرتُو الحابَّاهُو دي يا حليلة.. ويحرِّشها لازم تمشي تثُور في وجه أُمها وترجِّع ليهُو كرامتُو الإتْهَانَت.. وتجيهُو هُوشَة كدي يقُول ليها كان ما حدَّدْتِي موقفك من أُمِّك دي.. أنا عندي معاك كلام تاني…
آ يابة قدُر كلامَك انت آ المعُولَق ومَبَدَّل!!!!
جاء في معرض بيان منسوب لـ ق ح ت عبر صفحة تجمُّع المهنيين:
(وعطفاً على ما ذكر آنفاً وخاصة الدعوات التي تلقتها لجنة العمل الميداني في الأيام الماضية والتي وجدت الطريق سالكاً أمام أهداف اللجنة، إذ ندعو جموع الشعب السوداني في القرى والمدن ولجان المقاومة بشكل خاص بالاصطفاف والوحدة معاً في هذه الخطوة للخروج يوم الخميس المقبل 30 يناير في مواكب مليونية استكمال أهداف الثورة وهياكل السلطة الانتقالية بتعيين حكام للولايات وتشكيل المجلس التشريعي.)…
أها –حسب قراءتكم للواقع- أستخرجوا من هذه الجُوبَقَة:
1/ المَرَة السمحي..
2/ النسيبي الجَنَبَة..
3/ العاطل السجيمان…
jamal.trane@gmail.com
