سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• صلاح وصباح زوجين مستورين وعلي قدر حالهم
• ساكنين في حي شعبي قدييييييييم في حي العرب
• من خرابتم بقدروا يشوفوا طوابق الناس المرتاحين
• يوم صباح جات جاريه شايله ليها شمار
• وتكورك 000
• صلاح 000 صلاح 000 ماشفت
• صلاح جا جاري بالعراقي مخلوع
• قال ليها خير يا صباح 00 المرفعين اكلك ؟
• قالت ليهو مرفعين شنو ؟ اريتو كان اكلني قبال اشوف الشفتو
• صلاح قال ليها شفتي شنو ؟
• قالت ليهو جيراننا اسياد البيت ابو طوابق عملوا ليهم حوض سباحه ياصلاح ونحن كان عطشنا الا نبلع ريقنا
• صلاح قال عييييب يا صباح ماتبصي علي الجيران , خديجه بصت علي الجيران وقعت من البلكونه , انت كان وقعت في حوض السباحه ده بتمرقي في الحتانه
• صباح اطلقت آهه طووووويله وقالت شوف العين ما بقتل غزال , وووووب علي من عيشة الناس , ووووواي من عيشتك يا صباح , يا الفقرانه الصباح الصباح
• صلاح قال ليها ياوليه اتقي الله , كل حي بي رزقو
• قالت ليهو المرفعين الكلو يوم ناطي حيطه وماكل زول ده حيطتنا المايله دي ماشايفها
• صلاح قال ليها دايره المرفعين ياكلك يا صباح ؟
• قالت ليهو ياكلنا الاتنين , يريح الدنيا دي مننا , لكن انت ياصلاح بعد حرقة الحشا السويتا لي دي المرفعين كان اكلك بجيهو مغص يوديهو مكان حبوبتي مشت
• وقعدت تبكي , كر علي ياحبوبه يا الماحضرتي شقاي , وووووووووووواي
• صلاح قال ليها بكره ربك رب الخير يدينا والله اعمل ليك بحر في البيت ده
• صباح ابتسمت وقالت 000 صحي يا صلوحتي ! وبتعوم معاي ؟
• صلاح اتنفخ وقال ليها اعوم معاك ساي 000 علي اليمين اعوم واغطس زي ماداير
• صباح قالت والجقر ما بخرب البحر ياصلاح ؟
• صلاح قال ليها يا وليه انت مطرطشه ! بعد نعمل بحر الجقر تاني البقعدوا معانا شنو ؟
• صباح قالت ليهو والله ياصلاح الجقر ده حيرني لابغترب ولا بعرس يمرق من البيت ده ولا بفوت
• صلاح قال ليها حيرني الجقر ده
• صباح صرت وشها وقالت حيرك شنو ؟ ياراجل هوووووي . الجقر بقعد مكان الفقر غير حالنا خلي الجقر يطفش
• صلاح قال ليها حا اعيشك في جنه
• قالت ليهو كلامك كلو امنيات ياصلاح وماشفنا شئ 00 اسمع ياراجل العيد قرب جير لينا البيت ده وجيب ملايايات وستائر واردم لينا الحوش ده
• صلاح قال ليها انا عامل حسابي لاي حاجه , وعامل ليكم مفاجأه
• صباح بفرح شديد 000 صحي يا سلوحتي ؟
• صلاح قال ليها قنبله يا صبوحتي
• صباح قالت ليهو احلف
• قال ليها علي الطلاق
• قالت في سرها ياني الاطلقت
• ناس الحله جيروا وجابوا الملايات لزوم العيد الا صلاح وصباح شايفه وساكته راجيه القنبله
• يوم الوقفه الصبر غلبها
• قالت ياصلاح هوووووي العيد بكره الحاجات وين ؟ القنبله دي صايلنت ؟
• صلاح قال ليها عندك رصيد
• قالت ليهو بمسكل بس
• قال ليها مسكلي لي للنمره دي
• ومسكلت ليهو
• التلفون رجع لصلاح
• صلاح شالو وطلع بيهو بره اتكلم وقفلوا وجا راجع
• رجع يضحك سااااي
• قال ليها قلت ليك قنبله
• المفاجأه اتشحنت وفي طريقها لينا
• قالت ليهو لكن بعد العيد نعمل بيها شنو ؟
• صلاح قال ليها نستثني يوم زياده في العيد ونعيد بالقنبله
• ومره اول وتاني وتالت يوم في العيد
• العيد كمل
• صباح خشمها ملح ملح
• قالت في سرها طول عمري بصدق صلاح واشرب المقلب
• قنعت
• فجأه صلاح جا داخل شايل كرتونه كبيره ويكورك
• ياصباح 000ياوليه 000يا مره000 تعالي شوفي القنبله
• خت الكرتونه وقال لصباح افتحيها
• صباح فتحت الكرتونه
• بحلقت شديييييييييد
• قالت سجمي واغمي عليها
• ودوها الانعاش
• فتحت عيونها لقت صلاح قاعد جمبها
• قالت ليهو داير تكتلني ياصلاح
• صلاح قال ليها بعد الشر يا صباح , لكن اكتلك ليه ؟
• قالت ليهو قنبلتك ماسووووره ومكسوووووره كمان ؟
• قال ليها بتتصلح
• قالت ليهو لو لحمتها بدهب جنوب افريقيا ما بتنشف قبل تمانيه شهور
• قال ليها ويعني ! لاحقين شنو ؟
• قالت ليهو بعد تمانيه شهور نكون مرقنا من الحله وصقطها الماسوره تاني نركبها وين
• ودخلت في غيبوبه تانيه
• وبقت تهضرب
• ماسوووووره وكسوووووووره
• دي عرسه اخير منها البوووووره
• ماسووووره ومكسوووووره
• مره واحده يا راجل اغلط وجيب نافووووره
• ماسوووووره
• صلاح براحه اتخارج من جنبها وعاين بالشباك مهمهما
• والله فكره 0000 الدور الجاي اجيب نافوووووووره
• فجأه سمع صوت صباح
• ماسووووره ومكسوووووره
• جا دكتور داخل الانعاش قال للدكتور التاني مصر شالت الكاس
• نطت صباح قالت ليهم كرعلي ياغانا صلاح شجعك وضيعك ! شجع الجزائر وداها الحتانه , لحق غانا كمان وداها الحتانه ! احيييييييييييييييييي منك يا صلاح
سلك كهربا
الطب في جنوب افريقيا متطور ولكنه بطئ
والي لقاء
سلك
