واحد اسمو حسام شايل استقالتو ومشي مكتب المدير بتاعو اسمو صلاح عشان يقدمها ليهو
- امضي لي علي الاستقالة دي
- استقاله شنو ؟
- استقالتي أنا ماحقعد ليكم في التلفزيون دا تاني
- طيب كدي براحه اقعد ونتفاهم الحاصل شنو مالك؟
- مالاقي شغفي في تلفزيونكم دا
- كويس ممكن نراجع الكاميرات ونشوفهو مشي وين
- دا شنو هو ؟
- شغفك
- ايوا بتهزر كمان مامن عوايدك
- لا والله بس مستغرب شغف شنو كمان انت اصلا مانافع وكنا دايرين نتخارج منك بس خفنا من قطع الرزق
- دا كان زمان قبل ما اعرف قيمة نفسي
- كويس عايز تسيب التلفزيون لشنو ياحسام؟
- شوف ياصلاح
- صلاح ؟
- أيوا صلاااااح مش قته لي حسام حقول ليك صلاح
استاذ صلاح ويا مدير دا كان زمان انت ما احسن مني - انا ماقته اني احسن منك بس على الاقل احترم فارق السن البينا احترم صلعتي دي ياخ
- اصلا انا ظاهر علي اكبر منك وصلعتك دي عندي زيها اها شنو تاني
- ااي اصلا دا ماشكل مذييع
- قالوا الزول السمح مشاكلو كتيرة
- كويس اها داير تخلينا وتستقيل لشنو؟
- التلفزيون بتاعكم دا محدود القدرات ومانافع انا زاتي كنت بختار وبعزل في القنوات وبقول انتظر بلقي الاحسن لمن مافضل الا تلفزيونكم دا اصلا معروف اخر السوق مفجخ
- طالما احنا فينا وفينا شنو الجابركم علينا واصلا معروف مابتقدر تشتغل تحت الضغط
- وانتو تضغطونا لشنو ما كفايه الحاصل لينا برا
- اها واصل؟
- تلفزيون بشتغل فيهو ناس محدودين الفكر والابداع زيك كدا مابنفع معاي
- زيي انا ؟
- اي لانو واحد زي بستاهل تقدير اكبر من كدا
- تقدير شنو ياخينا انت جيتنا بتقدير مقبول والشهادة كلها F و ملاحق وشغلناك بعد دا كان ماواسطتك قويه باب التلفزيون مابتخشو
- ااي صاح انت بتوصف فيني وفي نفس الوقت المدير العام لانو نحن الاتنين نفس الشهادة ونفس الدرجات الواحد مابحب يستشهد بيهو بس مرات الضرورة بتبيح اكل الميته والخنزير
- يازول وطي صوتك ماتجيب لينا هوا
- المدير العام جايب ٥١٪ في الشهادة الثانويه نتيجه زول نجح بضربات الجزاء وانت زاتك ياصلاح لو ماكنت صاحب المدير العام ماكنت اشتغلت هنا تتذكر مسلسل كابتن ماجد في لاعب كان اسمو عمر ماكان عندو اي مهارات لكن كان اساسي في كل حلقات المسلسل تفتكر لشنو ايواا عشان صاحب ماجد بس
- اسكت اسكت
- مانخاف كلامي دا كلو بكون وصل ليهو لانو عندكم هنا ناس زي النسكافي 3×1 بتكلموا معاك وعنك وعليك
- ديل منو؟
- مامشكله انسانا منهم انت عارف دا حصل ليه ياولد ياصلاح ؟
- ولد ؟ انت جادي بتتكلم معاي كدا
- لما اتكلم تسمعني ما انت بس العالم دا كلو لازم يسمعني
- دا جنا ولاشنو كويس اتفضل اتكلم يا أستاذ حسام
- الإنسان لما بغلط في تقدير قيمه نفسو كل العالم حيغلط في تقدير قيمتو
- قيمه؟
قصدك بطاطس بالقيمة ؟
انت لمن جيتنا مابتعرف تقول كلمتين سوا
الكلام دا حفظتو من وين لانو انا عارف راسك دا فاااضي - عارف يا ولد ياصلاح انا بستغرب لمن اشوف الجمل البلف عمرو كلو في المعصرة بتاعت زيت السمسم ويلف ويلف ويلف
- الغريب في منظره شنو يعني بلف عكس عقارب الساعة ؟
- لا ابسلوتلي لا يا سطحي يا اجوف يافارغ من المعاني
- انت الكلام الكبير دا جبتو من وين ماشبهك والله ؟
- بغض النظر عن كلامك الجارح دا شنو البجبر الجمل دا انو يكون لافي كدا عمرو كلو المقابل شنو؟
- المقابل انو بياكل وبشرب
- تفتكر دا عدل ؟
- اها يعمل ليهو وديعه في البنك يعني؟
- لا بس على الاقل يدوهو تقديرو واحترامو
- تقدير شنو الحنديهو للجمل ياحسام عليك الله ماتفلق لينا راسنا بكلامك دا
- الجمل دا ليه مافكر يتمرد ويكسر الساقيه دي ويضرب الزول المشغلو وياكل ويشرب من غير زول يقول ليهو بتعمل في شنو
- تفتكر انت لشنو ؟
- عشان عمرو ما عرف قيمة نفسو زي كدا
- زي الجمل؟
- بالظبط لاني ماكان عارف قيمه نفسي
- قيمه شنو انت مابتسوي حاجه وعادي حسي ارفدك مش تستقيل
- ترفدني انا اي دي قدرتك كدي جرب ترفد المذيعه عارضه الازياء كيان
- انا مدير البرامج من سلطتي ارفد اي زول
- ترفد كيان انت بتهظر ياخ كان المدير العام يرفدك انت ويختها هي مكانك
- اي عارف كيان جايه تبع المدير العام
- ياخ انتو بدلتو مفاهيم الجمال بتعينكم لي ناس زي كيان دي
- كيف؟
- زمان كان الجمال بالتشبيه بالغزلان
- اها والاتغير شنو؟
- اتغير كتير حسي مقياس الجمال والاختيار في التلفزيون بقي لازم تشبه البقرة سمينه وبيضاء وعيونها كبار مع الاعتزار يعني وماشرط ثقافتها وحضورها
- وطي صوتك المدير العام مايسمعك اها طلباتك شنو؟
- كدا ممكن نتفاهم شوف ياصلاح ياولدي قانون الندرة النسبية بيقول انو كل شي مافي زيو كتير سعرو كتير وانتو الشغل معاكم خلانا متدينين ما من التدين والالتزام بقينا مفلسين ونتسلف من اي زول
- كويس عايز كم يا ميسي ؟
- 15000000 في الشهر
- دا كتير شديد انا ماباخد ربع المبلغ دا
- دا المرتب الاساسي وين البدلات والسفرات والظروف بتاعت الاجتماعات و و و الحاجات دي كلها بتاخدوها ونحن مابنشوف منها حاجه
ناس اموالها زايده وناس بدينوا - انت شغال في HR ؟
- والله بين الشاري والبايع يفتح الله الف تلفزيون يتمنوني
- بقيت مادي ياحسام
- الزمن دا الناس بتفتش عن المال والمصالح البفتش عن الروح دا ملك الموت بس
- لكن دي قروش كتيرة
- اصلا انت زاتك بتاخد قروش كتيرة مقارنه بي مؤهلاتك
مؤهلات شنو ما ياهو بالواسطه عشان صاحب المدير اصلا الواسطه زي الشاي البليين القرقوش - خلاص موافق
- مافي شغل امسيات مافي شغل اشيلو معاي البيت مافي كوراك وشكل مافي تاخير مرتبات وشغلوني في القسم بتاع المزيعات قسم المزيعين دا كفاي نشوف حاجات سمحه
- حاضر ياحسام
- تجيبولي بيرقر في الفطور شغل الفته دا مادايرو
ومعاهو عصير ونسكافي ولحدي مكتبي - انت جاي تتوحم عندنا وتحقق رغبات بطنك ثم تانيا مكتب شنو كمان ماكنت بتشتغل وقافي ساي
- والله براحتك زي ماقته ليك الف تلفزيون دايرني
- مافي مشكله متفقين
- وارد اني اجي الشغل مرات متأخر
- متأخر قدر شنو يعني ؟
- من ساعة ل 7 ساعات انا ما ضامن الطريق
- انت جادي
- والله براحتك الف تلفزيون يتمنوا اني اتاخر عليهم
- نفسي اعرف جايب الثقه دي من وين
يعني اذا كنت مذيعه كان نقول من جمالها
كويس طلباتك اوامر - طلبات شنو نحن في مطعم دي اسمها شروط واوامر
- كويس اي أوامر تانية يا استاذ حسام؟
- لو اتذكرت حاجه تانيه حقول ليك انا اخيرا عرفت قيمه نفسي
- كويس اجيك انا من الاخر الكورس بتاع التنميه البشريه المشيت ليهو دا ومحلو فاتح جمبنا وحفظت كلامو دا انا قبل كدا مشيت ليهو
- ؟
- انت مرفود ياحسام وامشي علي الخزنه رجع السلفيه الكنت شايلها
- قته شنو؟
- زي ماسمعت كدا
- عليك الله معليش والله غلطاااان
- حتشتغل بنص مرتبك
- حشتغل
- وحتشتغل يوم الجمعة والاعياد وحتلف في الساقية زي الجمل وانت ساكت
- حاااضر
- على مكتبك يا سجم الرماد
- انا متاسف
- اوعي اسمعك بتتكلم تاني
- اصلا ماممكن تقنع الذباب ان الزهور اجمل من الوساخه
- بتقول شنو يافقر انت؟
- ولا حاجه اصلا حدك المدير العام يتخارج وحتتخارج معاهو انت وكيان وانا زاتي
زمان كان المواهب الحقيقية بتتفرج على التلفزيون والمواهب بالواسطة هي البتطلع فيهو
لكن حيجي الوقت الحتتقلب في الايه ان شاء الله
كسرة
طبعا انت بتقرا ومنتظر حسام ياخد رياكشن ويستقيل ويتخارج وانت زاتك تكون فكرت تعمل زيو
لا لا لا اوعك تعمل كدا البلد دي مابتمشي كدا والصراع النفسي الداخلي البين الاستحقاق الوظيفي والواقع المر دا ماليهو نهايه
استغفر كدا واشتغل وانت سااااكت
كسرة تانيه
اي تشابه في الاسماء والصفات والشكل والقدرات مع الواقع من خيال القارئ فقط ولايمت للواقع بصله
eng.samidaffalla@gmail.com
