سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• الاستاذ الكبير عبد المجيد عبد الرازق لازال ينادي بمدينة الرياضه الفاضله
• تلك المدينه التي لم يفكر فيها بشر في الدنيا الا الاستاذ عبد المجيد
• كل العالم
• مافي زول طلعت في راسو فكره زي فكرة استاذنا المريخي عبدالمجيد
• فكرة متفرده
• نقبلها شكلا حيث لا يأتي التفرد الا من المريخ
• والاستاذ عبدالمجيد مريخابي
• حسب نظريته يمكنه ان يدعونا للذهاب للمطار نستقبل الهلال لانه انتصر
• بل ويمكن ان يدعونا لتشجيع الهلال ضد المريخ اذا كانت نتيجة المباراه تتوج الهلال بطلا ولا تؤثر في المريخ
• كل شئ جائز
• وحسب نظرية الاستاذ عبدالمجيد يجب ان يكون ردنا علي اساءات الناس علينا بالسكوت
• مانبقي زيهم
• نشتغل بنظرية الداير تهريهو اسكت خليهو
• تدور يا استاذي عبدالمجيد عجلة الوطن ونغمة الوطنيه من خلال الاجهزه الاعلاميه التي تسخر نفسها لخدمة الهلال
• ويكون اول مستقبل لتلك النغمه استاذي عبدالمجيد هو قلمك الخبير الكبير المريخي الاصيل
• وعندما يكون المريخ هو من يحتاج لتلك النغمه الوطنيه نفقدها
• في تلك الاجهزه
• وفي الحوارات
• وفي الندوات
• وفي عمودك
• استاذي
• انهزم المريخ من الصفاقسي بالاربعه
• فخرجت جماهير تحمل توابيت تطوف العاصمه والاقاليم
• التوابيت كانت جاهزه
• اشاره الي ان المريخ قد مات
• لم نسمع باستنكار لتلك التصرفات
• ثم تكررت
• وتكررت
• وجاء يوم مازيمبي
• فخرجت توابيت بالهبل
• كرد فعل لتوابيت الصفاقسي
• وخرجت علينا الاجهزه الاعلاميه التي تخدم الهلال باستنكار
• كان الاستنكار تحت شعار منافاة ماحدث للخلق الرياضي
• وحرمة التصرف شرعا
• كأن التوابيت الاولي كانت تخرج من ديار الخلق الرياضي
• وكأن التوابيت الاولي لم يك فيها مساس بحرمة الموتي
• او كأن الموتي كانوا قبلانين
• وكأن مجلس علماء المسلمين العالمي قد افتي في التوابيت بعد مباراة مازيمبي
• اكتشفوا انها حرام شرعا
• حتي ائمة المساجد
• تحدثوا عن وارقو وفاحش سعر التعاقد معه
• مع العلم بان امبيلي وسادومبا يكلفون اكثر من وارقو
• استاذي عبد المجيد
• قامت جهات اعلاميه وقعدت لما خرجت التوابيت بعد مازيمبي
• ولكنها سكنت وسكتت عندما خرجت توابيت الصفاقسي
• انه الكيل بمكيالين
• لايكون هناك نقد وانتقاد لاي تصرف بدر منهم
• ولكن تقوم الدنيا ولا تقعد عندما يأتي التصرف من جمهور المريخ كردة فعل
• ونجاريهم نحن المحسوبين علي المريخ في الاستنكار
• استاذي عبد المجيد
• كيف نخرج لنستقبل زول لانه انتصر في اولي خطوات مشوار طوييييييييييييل وهو لا يعترف منذ عام سته وثمانين باننا حققنا اعجازا وانجازا متفردا ؟
• نهون علي انفسنا لهذه الدرجه ؟
• قول هنا علي انفسنا
• هل يهن مريخنا يوما علينا ؟
• قلب يقبل الهوان للمريخ ماحبابو
• والله لو هان المريخ علي قلوبنا لقطعناها حتت
• ويبقي المريخ في الحنايا
• استاذي
• انا شخصيا ماعندي مانع للوقوف بوطنيه مطلقه مع الجماعه خارجيا حسب دعوتك
• لكن بشرط
• جيب لينا اعتراف منهم
• يكون مكتوب
• عشان مايغالطونا
• جيب منهم اعتراف بانجازاتنا الجويه
• وباننا الفريق السوداني الوحيد الي الآن الذي سجل اسمه في لوح الشرف لدي الكاف
• وباننا احرزنا سيكافا بدل المره مرتين
• وانهم عجزوا عن تحقيقها تمانيه سنين
• الي ان عاينو للمشلعيب وقالوا عفن
• جيب لينا منهم اقرارات باحترامهم لماحققناه
• وبانهم لسه جارين خلف تحقيق انجاز قاري واحد
• عشان يبقوا زينا
• جيب الاقرارات وقابلني في المطار
• اودعهم
• واستقبلهم
• ولو اتغلبوا ابكي معاهم من قلبي
• واعصر الفراش
• واخت في الكشف
• واغيب من الشغل اسبوع
• اقول عندنا بكا
• استاذي عبدالمجيد
• نحن مريخاب لدينا فهم وقيم
• لانبادر بالفعل القبيح
• ولكن لا يوجد من يمنعنا من ردة الفعل تجاه ذلك القبح اذا وقف مكتوف الايدي امام التصرف القبيح
• نحن مريخاب
• نؤمن بمريخنا ويهون عندنا اي شئ
• الا المريخ
• استاذي عبد المجيد
• لاقاك في العالم ده كلو وضع مثالي زي الذي تنادي به ؟؟؟
• لاقاك يوم في الرياض النصر وقف مع الهلال ؟
• شفت في جده الاهلي بشجع في الاتحاد ؟؟؟
• في مصر القريبه دي لاقاك اهلاوي بشجع في الزمالك في مباراه خارجيه ؟؟
• ناس برشلونه دخلوا كوره للريال في كأس اوروبا شجعوا ؟؟؟
• معروف ديدن التشجيع
• انت وندك في اتجاهين مختلفين
• فقط يجمعكما الاحترام
• واذا واحد هبش ذلك الاحترام
• يبقي بينكما مافي احترام
• ومن يحترم من لايحترمه يك ذما عليه ويندم
• مقابلة عدم الاحترام بالاحترام يفهمها الذي لايحترم الآخر ضعف من الآخر
• اذا انت اكرمت الئيم تمردا
• ولا شنو !!!!!
• استاذي عبدالمجيد
• حقو الناس تفرق بين ماهو مكتوب للمزاح وتلطيف الاجواء
• وبين ماهو مكتوب بجديه تستدعي ذلك
• لايعكر صفو مجتمع الرياضه الا الحسد
• ولا يأتي الحسد من زول الا يكون الزول التاني حقق انجازات غلبت الحاسد عديل كده
• عشان كده
• نحنا ما بنحسد
• نحنا محسودين
• اعوذ برب الناس ورب الفلق
• ومن شر حاسد اذا حسد
• الحاسد شرير
• ياناس
• وصلنا نهائي الكونفدراليه 2007
• افضل انجاز لفريق سوداني في الالفيه الجديده
• قالوا فرق ضعيفه
• وجعرانيه
• وكورة الاسماعيلي اشتريتوها
• والجهاز الفني بتاع الاسماعيلي اشر بما يفيد ذلك امام الكاميرا
• هل اعترفوا من اجل الوطن بانجازنا لفضيه الكونفدراليه 2007 ؟؟؟
• ولا الوطن ده جديد
• ولدوهوا 2011 ؟؟؟؟
• ايها الناس
• مالكم كيف تحكمون !!!!!!!!!
• استاذي عبدالمجيد
• ده كلو خليهو
• جيب لينا منهم اعتراف مكتوب بانو استادنا اسمح من استادهم
• نشجعهم ليك للصباح
• ياخ ديل قالوا الطابق التاني حايقع بعد اسبوع
• استاذي عبد المجيد
• لك الود والاحترام والتجله
سلك كهربا
ننساك كيف والجماعه انكروا انك هداف آخر بطوله افريقيه شاركت فيها
والي لقاء
سلك
babikir maki [b_silik@hotmail.com]
