سودانايل أول صحيفة سودانية رقمية تصدر من الخرطوم
أخبار أخرى
بسم الله الرحمن الرحيم
في السلك
• اول مره احتار في اختيار عنوان لما سأكتبه
• مره اقول الدلاله في العماره
• ومره اقول السفاره في الدلاله
• ومره اقول العماره في السفاره
• ومره اقول السفاره في الدلاله
• ومره اقول الخساره في الدلاله
• المهم
• بقيت علي عنوان الدلاله في العماره
• طبعا انتهت المهله امس
• المهله بتاعت السداد
• سداد استحقاق الصندوق القومي للتأمين الاجتماعي
• يعني الدلاله حاتدور من جديد في حالة عدم السداد خلال المهله المحدده
• اديكم فكره
• عشان تتخارجوا من الصندوق ادخلوا صندوق
• وشيلوا الاولي سددوا
• وشتتوا
• ارحلوا
• عشان ماتدفعوا حق الصندوق
• صندوق شنو
• حق الموز انتوا ما دفعتوهو
• موز شنو
• حق مهند ورفاقه
• رفاق شنو
• التامين الاجتماعي وعرفنا قصتوا
• التأمين الصحي كييف ؟
• ولا العج برضو عند الفكي !
• واحد زمااااان
• جنوا فقرا والنفاثات في العقد
• ادوهو محايه يشربها
• صنقع وقطع ليك الباغه كلها
• ومسح بالباقي وشو
• بعد شويه مسك البطن
• بعدها يتدردق في الارض ويكورك
• ودوهوا المستشفي
• بدري الكلام ده
• الدكاتره ماكانوا مضربين
• بعد الكشف والفحص
• اتضح انو المحايه كانت قديمه
• وفيها بكتيريا ضاره
• اضرت به
• بعد اتعالج رجع للفكي
• ولامو
• قال ليهو يا شيخنا انا زبون تضرني كده !
• الفكي قال ليهو الحاصل شنو ؟
• قال للفكي المحايه اتضح فيها بكتيريا
• الفكي قال ليهو معليش معليش والله ماقريت تاريخ الانتهاء
• ماكنت عارف
• مدتها منتهيه
• نصيحه للذين يرتادون الفقرا
• الي ان يهديهم الله
• ماتكرطعوا المحايات ساااااااي
• اقروا تاريخ الصلاحيه اول
• حلوه صلاحيه دي
• موش !
• المره دي المزاد عشان مايكون في الحر
• وعشان يبقي في جو مكندش وصحي ومغري للمزاودين
• حقوا منقاش يقول في الاعلان المزاد في العماره
• طبعا الناس كلها حاتجي العماره
• ارض الحضارات
• استادنا
• انتوا زاتكم تعالوا
• تنوبكم كندشه
• اها
• التكميليه شغاله
• وطبعا في كل تكميليه الجماعه بجيبوا طرف شمال ماسوره جديده مستورده
• المره دي جابوا ماسوره محليه
• اقترح عليكم الاستعانه بابي ماسوره كطرف شمال
• يمكن ينجح
• اسلام قالت لي قالوا لينا في المسجد الجلوس لدي الدجال كفر
• ومن يجلس امام الدجال لا قبل منه صلاه اربعين يوما
• وحذرونا
• قالوا لينا معظم المستعينين بالدجالين من النساء
• وسألتني
• قالت لي يابابا ليه النسوان بمشوا الفكي ؟
• قلت ليها عشان القلايل
• قالت لي قلائل يعني شنو ؟
• قلت ليها جمع قليله
• قالت لي مافهمت
• قلت ليها عندها معنيين
• قالت لي اشرح لي
• قلت ليها الاول يقولوا ليك فلان جاب قليله , يعني جاب ليهو خبر محن بيهو الناس
• والتاني من القله
• قلة ايمان وقلة ادب وقلة حيله وشعور بالعجز في المواجهه والمقارعه عشان كده بستعينن بعوالم خفيه
• الفكي زاتو بمشن ليهو بالدس
• الواحده تمشي عشان تطفش ضرتها
• عشان تلجم راجلها
• عشان تبكم مديرها في العمل
• عشان تلفت نظر زميلا ليها
• وكلو يا بتي جهل وخرف وعدم ايمان
• سحر
• ان الله سيبطله
• وحتما سينقلب السحر علي الساحر
• قالت لي اعوذ بالله من الشيطان الرجيم
• المهم
• الفنسيين اتغلبوا
• وقالوا يوجد خائن داخل صفوفهم ينقل اخبار الفريق للخارج
• سبحان الله
• اي زول بلبس الازرق خرخار
• الجماعه لما يتغلبوا طوالي بقولوا في خائن
• نفس الاسلوب
• حيرتونا يا الديوك
• الديوك الفرنسيه
• فرنسيه بالفا ؟
• بالمناسبه
• ماتنسوا الدلاله وتنشغلوا بفرنسا
• بيع يا منقاش
• خلي المايشتري يتفرج
• ناس روشا
• مايحدث من استنتاجات في تسجيلات المريخ يذكرني بالزول الدخل دكان قماش ومعاهو اطفالو والمره قاعده في العربيه راجياهم
• يمسك الصوف الاسود
• يجروا لامهم في العربيه
• بابا اشتري لينا صوف اسود
• الصوف ما يعجبوا
• يمسك قماش قطني رمادي
• الشفع يجروا لامهم
• بابا اشتري لينا رمادي
• يرجعوا يلقوا ابوهم مسك قماش بيجي جبردين
• يجروا ( الله يخليهم للجري ) لامهم
• بابا اشتري لينا بيجي
• الاقمشه كلها ما تعجب السيد الوالد
• يرجع سااااي
• الام تفاجأ بانه لم يشتر اي قماش
• الشفع كانوا بلفحوا سااااااااي
• ودي زاتها قليله
• شكل ومعني من معاني القليله
• امهم ( تجضمهم )
• وتقول تاني لو ابوكم ما اشتري ودفع القروش واستلم القماش ما في زول يجيني جاري يجيب لي خبر قاطعوا من راسو
• زعلانين عشان اخدنا سته من تونس
• كوريا بالننوي بتاعها وبي برايداتها واتوزاتها وكريزاتها اخدت سبعه
• قلت ليكم كاس العالم المره دي فرصه وفوتيها يا بلدي
• يعني لو كنا في كاس العالم كان بقينا احسن من كوريا بفارق الاهداف
• تتجازي يا قسطنطين
• بيع ياروشا وسدد التأمين
• غيب الموت عنا عمالقه
• استاذ الاجيال سيد احمد الخليفه
• الرياضي المدلك الانسان عمر عبداللطيف
• الكابتن القامه ورجل السلام منوت بول
• العزاء نقدمه للوطن ولانفسنا قبل زويهم
• اتمنقشي
سلك كهربا
ننساك كيف ولي اسي بنطلون صوف صريح ما لاقينوا ؟
والي لقاء
سلك
babikir maki [b_silik@hotmail.com]
