القون الاول في عزام السوداني

بسم الله الرحمن الرحيم
في السلك
b_silik@hotmail.com
*سمعتوا بي جزيرة القرنفل ؟؟؟
*جزيرة القرنفل دي ماياها زاتها زنزبار
*جزيرة العمانيين مشغلنها مزرعة قنفل
*يعني جنينه للعمانيين
*كبري زي كبري توتي يودي ليها مافي
*ياكافي البلا فيرانها جعانه 
*كبري تاكلو ما لاقيه
*قال ليك زنزبار دي فيها سته فرق
*اللعب مع الهلال امس ده واحد فيهم
*قال ليك فريق كي ام كي ده
*سته سنين ماجاب قون
*اول قون يجيبو امس
*كورة معكوسه
*مساوي جلاها
*اتير جلاها
*القط
*الكديسه العذراء
*جلتها
*مهاجم زنزبار جلاها
*دقت في المهاجم البي هناك وسكنت
*المهم
*قالوا الحكم بعد الكورة في زنزبار انتهت
*قال ليهم الاتنين طايرين
*الاتنين ماعندكم شئ
*منعول ابو القرعه البتجيبكم تنافسوا مع ناس لوح الشرف الافريقي
*المهم
*امس جبنا تلاته اقوان
*حلال وبلال
*ذكرونا تلاتتنا في الاتيام الحمام
*اصلنا بنغلب الاتيام الحمام علي شاكله عزام تلاته
*المهم
*ضبحنا يا محمد عبدالماجد
*الخير راااااقد
*ضبحنا خرفان كتاااااار
*ووزعنا الادوار
*فطومه اختي تعمل الكمونيه والشربوت
*قالوا يدها طاااااعمه في الكمونيه
*ماشفتوا كمونيتها اللقطتها لي كردنه
*فيها كرشه لي اسي الجمهور ماشافها
*ناس كانوتيه
*كانوتيه بالمالي يعني كمونيه
*موش ملاحظين انو الكلمتين قريبات لي بعض
*كمونيه وكانوتيه
*العفشه كتيره
*والمصارين ناس كيبي ديل
*كيبي بالبوركيني تعني كبير اخوانو
*موش قلت ليكم كمونيه
*المهم
*فطومه عليها الكمونيه
*روشا نديهو الحله
*باقي خبيييير في الحلل
*محمد عبدالماجد عليهو الشيه
*ماتنسي يا محمد
*الكباب الصيني وباقي البهار ضروري
*الجمصي عليهو الضلع
*والمفروكه بي شوربة الضلع
*رمضان طبعا السلطه معلم فيها
*اما المنظراتيه
*الناس البقولوا مجلس المريخ يعلن خروج المريخ
*ديل عليهم الشطه
*بالدكوه
*ويكتروا الليمون
*الشيه يا محمد عبدالماجد حانعمل ليك راكوبه تعملها فيها
*عشان نسميك محمد قندهار
*ضبيحه ونتيجه مريحه 
*المهم
*قوننا الاول جابو العقرب
*جابو في عزام السوداني
*التاني ماعليكم بيهو
*اصلو ضفر دي حركاتو
*طوالي كاتل الجماعه
*لكن التالت كان في عزام التنزاني
*عوازيم ومعازيم كتااااار
*الكمونيه يابت
*الشيه يا ولد
*الجقاجق يا جمصي
*ايها الناس
*الشفوت كانوا في الميعاد
*هم سلاح النصر الامس ده
*برغم انهم في لحظات من الشوط التاني ركنوا
*لكن رجالة بكري وشفتنة علولو ودخلت ضفر وايمن
*اعادة الروح للشفوت
*وعينك ما تشوف الا النور
*لذا ولذلك
*هزمنا عزام السوداني
*وعزام التنزاني
*وضبحنا الخروف وجهزنا الصواني
*الكمونيه يا بت
*الشيه يا ولد
*الشطه يا زول
*استعجلوا شوه
*ناس عزام التنزاني ديل مسافرين
*اغرفوا ليهم اول
*ناس عزام السوداني بعد داك ادوهم
*الكمونيه يا بت
*ايها الناس
*شفوت حضروا من كل ولايات السودان
*حتي من الجنوب المنفصل المتصل حضروا
*لان مريخنا قومي
*الشطه يا زول
*الكمونيه يابت
*لكن صدقوني
*زي الفريق الزنزباري ده في رابطة امبده في كتيييييييييييير
*حظ الكيشه غايتو
*فريق كمونيه
*وبعدو كلاوي ولا ملاوي ماعارف
*ايها الناس
*الاجمل من النصر كانت روح الشفوت
*والاحلي كانت الروح التي ادي بها اولادنا
*لكن يادوبك عرفت ناس روشا زعلوا شديد ليه لما سجلنا ضفر
*ضفرنا ده طوالي طابظهم
*واتضفري
*الكمونيه يا بت
*الشيه يا ولد
*وين السلطه يارمضان
*ايها الناس
*حناجر الشفوت تخرج منها دانات
*تحرق الاخضر والازرق واليابس
*الكمونيه يا بت
*الصيوان داقنوا في ميدان رابطة ناصر 
*في مربع عشره
*جيبوا الكمونيه هناك
*ايها الناس
*هتاف الشفوت لا يفوت ولا يموت
*يقعد كده يحقق النصر ويفرس الحقود
*المهم
*وللمعلوميه
*زنزبار دي جزيرة تنزانيه
*انفصلت
*يعني هي زاتها كدوله ما عليك بيها
*زي الليمونه الرقدتها من امها
*شتله ساااااي
*ايها الناس
*تضافرت الشفوت
*وكلو زول قام بي واجبو كاملا
*ولم تقعد الناس كلمات الذين يقتلون العزيمه في نفوس الناس
*ولا امانيهم السيئه  التي يخفونها خلف عبارات يدعون من خلالها انهم بنظروا للموضوع بي فهم
*الفهم الوحيد
*عندما يقرر الشفوت يأتي النصر منقادا الينا ومطيعا
*شكرا لكل الشفوت
*شفت شفت
*شكرا لله قبل كل شئ
*شكرا للذين اجتهدوا في الخفاء 
*وعملوا للنصر الكبير
*اشادة كبيره بالاخوه
*الاستاذ ابراهيم عبدالرحيم والقطب الكبير حامد بدوي والعمده ابن العمده محمد الفاتح المقبول
*شكرا كبيرا وخاصا جدا للقطب الهرم
*طارق سيد المعتصم
*هذا الرجل لو عرف الناس مايقدمه للمريخ
*لبنوا له تمثالا كبيرا
*شكرا لاستاذنا حسن حمد وللقطب عراقي
*شكرا لي اولادنا الذين تحملوا المسؤليه
*شكرا لقلعة الجمال ومصنع الرجال
*شكرا للنصر الذي تشرف بنا قبل ان يشرفنا
*شكرا للخرفان التي ضبحناها
*شكرا لمن طبخ الكمونيه ولمن شوي الشيه ولمن زبط الضلع ولمن قطع السلطه
*شكرا لعزام الذي اثبت لنا ان تنزانيا الشقيقه لديها راعايا لدينا
*جيبي الكمونيه يا بت
*بتاع الشطه ده لسه قاعد ينظر !!!!!
*وبالقرآن مريخنا مصان
*ايها الناس
*قلت ليكم
*لايحلو لنا النصر
*الا عندما يراه الآخرون مستحيلا
*وكررنا قصة البنزرت التونسي
*انتصرنا في الدقيقه اربعه واربعين
*شفوت وحافظنها
*الكمونيه يابت
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*معزوم معانا 
*ضابحين
*احسن زول بعمل كمونيه جايبين
*والشيه والشطه والضلع السمين
*الكمونيه يابت
سلك كهربا
ننساك كيف وامس ريحتك كانت في الميدان
والي لقاء
سلك