القيادة: والله جد

كتبها مسهد باعتصام القيادة فات عليّ تدوين اسمه

عبد الله علي إبراهيم- 25 ديسمبر 2021)

قال لي الرجل الصالح الشيخ عبد الباقي العجيمي مرة وددت لو كانت وفاة الرسول صلى الله عليه وسلم هي ما نجتمع عنده في ليالي أذكارنا لا مولده. وزاد قائلاً إنه في وفاته العبر الغراء. وعندي أن العبر الغراء في الاعتصام لا في فضه. وسعيت في وقت من عام 2021 إلى التقاط ما يكتبه شباب هنا وهناك عن معناه في أنفسهم لأنشره. ودعوت غيرهم إلى الكتابة عن تجربتهم فيه حتى تكون عندنا صورة للاعتصام من تحت لا تقصره على سياساته في حيز القيادة أو الصدام مع النظام الذي كان يلفظ أنفاسه.

قرأت الكلمة التالية لأحدهم في قروب ما. وهي عن ذكرى اعتصام القيادة التي تلاحق الكاتب. واستحسنتها. وودت أن اقرأ المزيد عما يسمى اليوم العاقب للواقعة. وأطلعتني الكلمة على صناعة الجيل للتاريخ لن يحتاج بعدها إلى لعن تاريخ من سبقوه في السكة. بل لربما تلطف، وقد عارك التاريخ رحباً وجبراً، مع ثوريين سبقوه إلى الإيمان. بل لربما رأى الأكتاف الأنيقة التي وقف من فوقها في القيادة.

وهي تلك الأكتاف التي قال شاعر جيلنا عبد الله شابو عنها:

سيكتب فوق الشواهد من بعدنا

بأنَّا عشقنا طويلا

وأنَّا كتبنا بدم الشغاف

ما لم يقل شاعر بعدنا

وأنّا برغم الجفاف

ملأنا البراري العجاف صهيلاً صهيلا

وإنا مشينا إلى حتفنا

رعيلاً يباري رعيلا

وإنا وقفنا بوجه الردى

وقوفاً جميلا

سيكتب فوق الشواهد من بعدنا

بأنا كذبنا قليلا

وانَّا انحينا قليلا

لتمض الرياح إلى حتفها

وأنَّا سقطنا سقوطاً نبيلا

وقلت يوما عن هذا المقطع: "وأنا آه آه ،أنا آه ,آه من الصهيل الشهيد"

وتجد أدناه كلمة مسهد بالقيادة أنقلها كما هي:

بصراحة ي جماعة انا لسه ما قادر اطلع من الاعتصام. طوالي بجيني احساس انو نحن لسه في القيادة ... الصباح بصحا مخلوع وبتخايل لي صوت القطر (وفي ناس كتار هنا عارفين حكايتي مع القطر شنو). ولا اتخيل مخاطبة لمحمد خليفة وحسن بكري قبل الشمس تطلع .....وحكاية الشاي ياخال.. الشاي بي جاي✵ كل ما أغمض دقيقة بالنهار بسمع صوت موكب جاي وهتاف بعيد واصحا وانا بهتف .... المغرب وجوطة الافطار علي صوت الاذان ونشيد العلم وهتافات المدنية.✵ لحدي الان براقب الساعة 9 مساء بالدقيقة عشان الوقفة علي ارواح الشهداء قدام البحرية ...وكل ما يجيني تلفون من رقم غريب بتخيلو دا واحد من ناس المواكب عايز يقول لي انا جمب خيمتكم عايز اسلم عليك ... ✵ بالليل بجيني احساس أني عايز اتفقد المتاريس عشان اشوف الحاصل شنو والوضع الامني كيف .....✵ لحدي الان الفترة من 2 صباحا ولحدي م الشمس تطلع بتوقع هجوم لفض الاعتصام ذي ما كان بحصل في الايام الأوائل. والمشكلة قبل يومين سمعتا صوت ذخيرة طوالي جريت لحدي الباب متوقع دا هجوم في ترس شارع النيل. طلع دا ضرب نار في عرس جمبنا واكتشفتا اني في البيت ما في القيادة.

* الجمبي طوالي هتف. بصراحة حسيت إني في القيادة واتذكرتا لمن كنا بنعمل الحركة دي ونردد نشيد العلم كل نص ساعة في ايام الاعتصام الاوائل عشان نقول للامنجية نحن صاحيين وجاهزيين .... ✵ ياخ حتي لمن نحاول ننسي وتكون قاعد في مكان يجي واحد يسلم عليك ويقول ليك اتقابلنا في القيادة ..كانت ومازالت وستبقي ال58 يوم القضيناها في القيادة هي المسيطرة علي كل ملامح حياتنا القادمة

المجد للشهداء.

والله جد. ...

(ربما سنحت فرصة لنشر كتاب حاو لمذكرات قصيرة في حجم ما ننشر هنا لذكريات من شهدوا اعتصام القيادة. فإذا كنت طرفاً في واقعة من ذلك الاعتصام (داخله أو خارجه اتصلت به) في أيامه أو تداعياته فأبعث بحكايتها لننظر في نشرها)

 

IbrahimA@missouri.edu