خلي روحك رياضيه .. بقلم: بابكر سلك
7 ديسمبر, 2014
منشورات غير مصنفة
33 زيارة
بسم الله الرحمن الرحيم
في السلك
*التعصب الشديد ما كويس
*والغاء الآخر ماكويس
*ودخول عادات غريبه علي مجتمعنا الرياضي ماكويس
*قد تكون هناك اسباب تدفع الناس للتفلت
*وبرغم ذلك هي ليست مبررات كافيه لذلك التفلت والسقوط
*فالمشجع الذي يتفلت علي المدرجات ما حبابو
*والكاتب الذي يتفلت علي صفحات الصحف وفي الواقع الاسفيريه ما حبابو
*والاداري الذي يتفلت في تصريحاته وداخل اروقة الجهات الاداريه ماحبابو
*واللاعب الذي يخرج عن طوعه برضو ما حبابو
*قد يكون لكل ذلك اسباب
*مثلا يخطئ ولا يظلم
*وينتج عن ذلك شعور بالحقاره للمظلوم
*وبالذات طواااالي الاخطاء دي بتصب في اتجاه مصلحه واحده
*وقد يكون اسقاط للائحه او قانون وتجاوزا صريحا
*تحت ستار عدم الدرايه باللغه البرتغاليه مثلا
*كل تلك الاسباب برغم انها تفقع القلب
*لكنها ليست مبررات لتفلتنا
*فالرجل الذي اصاب رجل الخط يوم مباراة اهلي شندي والهلال
*هل عاد لبيته وضميره مرتاح ؟؟؟؟
*بالتأكيد ندم علي فعلته
*وكان يمكن ان يفقد عقله اذا فقد رجل الخط المصاب حياته
*ايها الناس
*نحن في مجتمع الرياضه نعرف بثوابت لا فكاك منها
*ولن نرضي بتغييرها
*من ناحية الولاء هو اشرف الانتماءات
*لانه لا يوجد من يحشد لمناصرة فريق والانتماء عليه
*اي جمهور اختار بوجدانه الفريق الذي ينتمي اليه
وحتي الذين يصرون علي تهويد ابنائهم او تنصيرهم
*فانهم حتما سيعودون للفطره بدون عناء
*وتحضرني قصة صديقي الهلالابي الذي يصر علي ارضاع ابنه الهلاليه
*يشتري له الاعلام والالوان ويحكي له عن بطولات من نسج الخيال والاوهام
*برغم ان الاعلام والكابات عليها شعار عصمت
*الا انه كان يشتريها لابنه
*قلت له جيب الولد حوض السباحه بتاع المريخ
*رفض حتي لا يشب مريخيا حسب ادعائه
*كان يصر علي اصطحاب طفله لاستاد الهلال لحضور المباريات
*يوم جابو استاد المريخ
*الهلال كان لاعب هناك
*الولد يتفرج سااااااي
*علي المقصوره وعلي الطابق التاني وعلي الكشافات الفسفوريه
*وقبلها اخد فرجه علي معرض الكاسات الموجود بالاستاد
*شاف مانديلا ودبي وسيكافات
*وجمال العرض والمعروض
*في نص الكوره قال لي ابوهو
*بابا امسك
*ومد له علم الهلال وطاقية الهلال
*وقال ليهو
*يابابا انا ما داير الهلال
*الهلال ماسمح
*انا داير المريخ
*المريخ حلو يابابا
*الابو زعل
*برغم انو الحكاية دي من حق ابنه
*قال ليهو يا ولد
*قلت ليهو خلي الولد
*خلينا من قصة دين ابائي واجدادي بتاعت ناس قريش دي
*هبل شنو ولاتي منو وعزة منو
*المهم
*من الثوابت اننا نعترف بالآخر
*لانلغي الآخر اطلاقا
*بل لانستمتع الا بحزن الآخر علي انجازاتنا
*مثلا اخوانا الاهله لو كانوا مافي
*هل كنا سنفرح بمانديلا طيلة الخمسه وعشرين سنه الماضيه !!!
*ولما شلنا مانديلا
*هل خرجنا في شوارع كانو مثلا وتغنينا كيتا علي بندل يونايتد ؟؟؟
*بالتأكيد ابدا
*فعظمة الانتصار كانت تكمن في المغصة الكاتله اخوتنا الاهله
*فلو لاهم لماعرفنا الفرح الجوي
*المهم
*من صفاتنا الرياضيه
*قبولنا للنصر والهزيمه
*مافي فريق ما بتغلب
*دي قناعه
*برغم قناعتنا بانو في فريق ما بجيب بطولة جويه لو عاش مية سنه
*لكن بغلب وبتغلب
*ولذة الانتصار تكون في تلك المداعبات البريئه بين المنتصر والمهزوم
*لكن
*نحفر ونكسر ونحرق ونسئ
*ده ما طبعنا ولا بشبهنا
*ولو اتشاكلو اتنين في الشارع ساي
*الناس بقولوا ليهو خلوا روحكم رياضيه
*دي روحنا نحنا اهل الرياضه
عليه
*تعالوا نتعاهد علي موسم حدث
*التشجيع مثالي
*الادارات مثاليه
*اللعب مثالي
*التحكيم مثالي
*الصحافه مثاليه ورساليه
*وتعالوا آخر الموسم نقيم التجربه
*بالتأكيد سنفرح كثيرا
*لان كورتنا تكون قد تطورت من الموسم المثالي
*ايها الناس
*نودار المريخ والهلال الجماهيريه كتيره
*اديكم جزء منها
*امنا وحبيبتنا وكبيرتنا المرحومه الحاجه نور الشفيع حاج حسين قسم السيد
*والدة الكابتن كرار ابو علي ووالدة كل لاعبي الهلال في تلك الحقبه ووالده اعضاء جماعة الجو الرطب
*ووالد اي زول بعرفو واحد من اولادها
*كان منزلها بحكم قربه من استاد الهلال
*معسكرا دائما للهلال
*ومسرحا لبروفات جماعة الجو الرطب الفنيه
*ومنتدي تتلاقح فيه الثقافات مساءا
*ونادي مشاهدة يتتبع فيه الجميع الكرة العالميه
*حاجه نور هلالابيه بالانتماء
*اسرتها معظمهم هلالاب (برغم ان الهداية قد طالت الكثير منهم مؤخرا )
*يوم الهلال كان لاعب ضد المريخ
*كل اللاعبين في بيتها
*اتغدوا وقاموا
*قالت ليهم اقعدوا اشربوا الشاي
*تعللوا بالوقت ضيق
*قدمتهم لي باب الشارع
*في الباب قالت ليهم
*حامد بريمه لاعب ؟
*قالوا ليها لاعب
*قالت ليهم ارجعوا اشربوا شاييكم اخير ليكم
*ما يبقي عليكم غلب ووجع راس
*المهم
*مرة حيدر ابو سته
*هلالابي كبير
*المريخ لاعب ضد سيمبا في سيكافا
*والهلال جاي من بورتسودان
*مجموعتوا كانت هناك
*الهلال اتأهل
*كيف مافي زول عارف
*المهم اتأهل
*وكان كعب جدا
*ومفروض يقابل الغالب من المريخ وسيمبا
*الاخوه الاهله خايفين من مقابلة المريخ
*وحدثت المشكله التي الغت المباراه قبل نهايتها
*الاهله طلعوا اشاعه وقتها ورددوها وصدقوها
*قالوا المريخاب كتلو الصحفي المرافق لي سيمبا
*مع العلم بان الصحفي توفي بالسلاح الطبي اثر نوبة قلبيه قبل الكورة بيومين
*المهم
*جاطت الشغله
*اب سته قاعد في بيتهم
*لما عرف الحصل
*جري استاد المريخ ليشمت
*وليطمئن نفسو انو الهلال حايقابل سيمبا
*الشرطه تفرغ في الناس
*والناس هايجه
*جاتو طوبه فتحت ليهو راسو اتنين
*ودوهوا الحوادث
*خيطوها ليهو وربنا مرقو
*رجعوهوا البيت
*تمنيه صباحا تاني يوم
*قابلت كرارا ابو علي
*قلت ليهو شوف الجرائد
*المانشيت اعادة المباراه وسيمبا يرفض واعتبار المريخ متأهلا
*قال لي ارح لي اب سته
*جينا لي حيدر
*صحيناهو
*وشو ورام
*عينو واحده قافله ورم ساي
*والتانيه فاتحه نص
*لما قرا الجرايد قام حيلو
*فتح عيونو الاتنين
*ودنقر لي وقال
*يعني دي (واشار للضربه والخياطه )
*راحت سااااااااي !!!!
*الجدير بالذكر ان الهلال انسحب من المنافسه مدعيا ان هذا هو السبب
*نفس الهلال الذي سجل اتنين اطناشر انسحب لعدم العداله والنزاهه كما ذكروا
*ايها الناس
*الطرائف كثيره
*والمجال ضيق
*المهم
*نمني النفس بموسم مثالي في جميع المناحي
*ايها الناس
*يوم الجمعه عرس مبارك سليمان
*غداء في دار سوداتيل
*الدعوه لكل الرياضيين
*المريخاب قبل الهلالاب
*لاننا في الوسط الرياضي
*لابنخاصم ولا بنعادي
*مبارك العريس ماعندو شغله يعزم الناس
*انا البعزم
*عازمكم كلكم
*والبفوتوا الغداء يوم الجمعه في دار سوداتيل
*يجي يوم الاحد عشاء في نفس الدار
*ومبروك مقدما يا بركه
*وان شاء الله العروس ما تطلع ليك زي الهلال
*تجيبك شهرين ولمن تقول ليها ماشي امريكا تتخلي عنك
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*واحد بتاع بحر قال
*ليبيا زي الجلابيه الانصاريه
*بتتقري بي جاي ليبيا
*وبي هناك ليبيا
*بتاع بحر تاني قال ليهو زي السودان
*بتقري بي جاي السودان وبهناك نادوسلا
*سلا ده محل باسطه
*الخشم مسيخ خلي بالك يا والينا
*كتروا لينا الباسطه يا والينا
*نادو سلا
سلك كهربا
ننساك كيف وكان مانادوسلا الينادوا لينا بصله
والي لقاء
سلك
b_silik@hotmail.com
///////
سودانايل أول صحيفة سودانية رقمية تصدر من الخرطوم
