شوارعنا وجقورنا .. بقلم: بابكر سلك
10 فبراير, 2015
منشورات غير مصنفة
24 زيارة
بسم الله الرحمن الرحيم
في السلك
b_silik@hotmail.com
*الشوارعي زمان هو الشماسي بفهم اليوم
*وهذا دليل علي ان الطريقة الشماسيه هي طريقة راسخه وقديمه وخبره
*وللشماسه بصمه ابداعيه وثقافيه واضحه
*فلن ننسي مسلسل أولاد الشوارع
*ولن ننسي رموز الشماسه المشهورين في كل المدن والمدائن والقري
بل في كل النواحي
*فالشماسه مثل الجقور
*يتواجدون اينما تواجدت العضه
*وما مهم بعد داك ان تكون العضه من امها ام كرته
*فالعضه عندهم عضه ايا كان الطبق الذي تقدم عليه
*ووطن الشماسه هو الشارع
*والشارع له وضع ووقع في اغنياتنا
*لن ننسي اغنية البلابل نور بيتنا وشارع بيتنا
*ولا رائعة محجوب شريف التي تغني بها وردي الصغير
*الشعب حبيبي وشرياني اداني بطاقة شخصيه
*الاسم الكامل انسان والشعب الطيب والديا
*المهنه مناضل بتعلم تلميذ في مدرسة الشعب
*والمدرسه فاتحه علي الشارع
*والشارع فاتح في القلب
*والقلب مساكن شعبيه
*وحتي اغنيات البنات وردت فيها سيرة الشوارع
* هناك اغنيه تقول
*جيت مارة بي بيتو وقالوا الناس غشيتو ****الحب انا ما بديتو ومن تبيت لقيتو
* طبعا ماجات مارة بي بيتو بالواتساب
*اكيد جات ماره بالشارع
*وبما ان الشوارعي مشهور وصاحب بصمة لهذه الدرجه
*كان لابد لمصدر تلك الشهره ان يكون مشهورا اكتر من الشوارعي
*الا وهو الشارع
* والشارع زمان كان اسمو الدرب
*زي درب الاربعين ذلك الطريق التجاري والشريان الذي ربط بين السودان ومصر قديما
* واظن من حكاية الشريان الذي ربط مصر بالسودان
*جات تسمية شريان الشمال
* وشريان الغرب وشريان الشرق
* وكل الشرايين الكترت فينا والتي نضخ فيها من شرايينا
*ولعل ذلك الضخ هو ما نشف عروقنا ونزل هموقلوبينا
* وهناك درب الجمل الفاصل بين السلمانيه غرب ومشروع الجموعيه والبودي لي الدويم ومنها لكردفان
* وللامانه درب كان تمشي فيهو بكل طمأنينه
*تنوم فيهو ما بجيك شئ
*وان جاك شئ بكون يا اسد يا اسد
*عوجه مافي
*واسد زمان مهذب ومؤدب وما بياكل شئ ماحقو
*مازي جقور اليومين دي امات عينا طايره
*بالله ياكلوا بدون خجله
*كبري بالنهار يا فجرة !!!!!!
*المهم
*الدروب كانت كتيره بس ما شائكه
*نجي للشوارع
*من اشهر شوارع البلد دي
*شارع الاربعين بامدرمان
*ومع الزيادات الحاصله بقي شارع الستين وحولوهوا الخرطوم
*بالرقم الجديد ده ناس امدرمان ما بنفع معاهم
*لانو البنفع معاهم من ناس امدرمان مشوا ليهو هناك وسكنوا جمبو
*وشارع المورده
*وده ريحتو سمك سمك
*اما شارع الثورة بالنص
* حقو نسميهو شارع المعاملات المكتبيه
*النص بالنص
*ايها الناس
*شارع الوالي بالحاج يوسف مشهور برضو
*ومن اسمو بتعرف حالتو
*بعد ناس الطرق عاسوهو بالقرقريبه عواسة حلو مر
*الجقور قرمتو ليك قريم عشوائي
*شئ بالطرف وشئ في النص
*لما بقت قريمات الجقور في شارع الوالي اوضح من بصمات الولايه زاتها
* وهناك شارع القذافي بشرق النيل
*والشارع ده ارتبط بالنكته الشهيره البتقول
*القذافي تبرع بالشارع ودفع التكلفه كامله
*كان مفروض يجي يحضر افتتاح الشارع
*ما استطاع كان مشغول بالبحث في الزنقات زنقه زنقه
* صوروا ليهو الشارع وفرجوهوا عليهو
*قال ليهم انا دفعت رايح جاي
*ده الرايح وين الجاي ؟؟؟
* الجاي ؟؟؟
*قرضنوا الجقور يا معمر يا اخوي
*انت وكت دفعت ما كنت عارف البلد دي فيها جقور ؟؟؟؟
*مالك الجرذان ما بتعرفها !!!
*وماعملت حساب لجقور البلد دي ليه !!!!!
*تدفع ساي مواطن انت ؟؟؟؟
*الله يرحمو
*لكن موش مفروض نغير اسم الشارع من شارع القذافي لشارع كورنثيا ؟؟؟؟
* ولا اقول ليكم شئ !
* نخلي الشارع في اسمو شارع القذافي
*ونرجع الفندق لي اسم برج الفاتح
*كيتا علي الليبيين وموقفهم الاخير مننا
* ايها الناس
*من اشهر الشوارع في البلد دي
*شارع مساوي وشارع سيمبو وشارع بوتاكو
*ايها الناس
*شارع العرضه الشهير
*من الاحفاد والي مستشفي الوالدين
*الجقور شبعت منو
*كلو شهر صيانه
*والصيانه محمد معنا ما تغشانا
*والشهر البعدو تظهر صيانه جديده في الميزانيه الجديده
*الجقور قرضوهوا قرض
*والغريبه قدر ما اكلوا ما شبعوا
*اما شارع النيل العريق
*فبقي شارعين نيل
*موش كان عندنا قصر وبقن قصرين ؟؟؟
* خلاص
*ماحدش احسن من حد
*كلو قصر بي شارع نيلو
*اللهم انعم علي شوارعنا بالثبات امام هجمات الجقور يا رب العالمين
*اللهم وسرطن بقدرتك معدة اي جقر دخل فيها او يدخل او سيدخل زفتا من زفت الشارع يا رب العباد
* اللهم وكسر سنون الجقور ومعط (شنباتهم ) صوفه صوفه يا رب العالمين
*لحقهم الزول القالوا في الصلاه
*والسلطان علي دينار اماما
*واحد قال كلام ما كويس
*قالوا السلطان همس قال ده منو القال الكلام ده ؟؟
*الزول قال ليهو انا اب شنب
*قالوا لما السلطان سلم
*الجامع كلو كان ممعط شنباتو
*اها
*معطت شنوبات زي دي يارب العالمين
* اللهم ولو في جقر فكر في كبري لينا
*اللهم جلطه من النوع ابو كديبس
*ايام الكديس كديس
*تنسيهو اسمو يا والينا
*قبل يقوم ينفذ ما فكر فيه علينا يارب العالمين
*اللهم وانعم علينا بشوارع توفر الرعايه والحماية لشماستنا يا كريم
*اللهم والكباري الطائره في تقاطعات شوارعنا
*ثبتها اللهم في قواعدها وقوها في اعمدتها وثبت ردمياتها وارفعها كي لاتقع علينا يا رب العالمين
*اللهم وباعد بينها وبين الجقور
*ما ظهر منها وما بطن
*لان دخلت يد الجقر فيها برميها علينا وبنموت يا رب العالمين
*ونحنا ما دايرين نموت قبل نحضر نهاية الفيلم ده يا كريم
*اها
*نجي لي شمارات والي الخرتوم
*كان شفت يا والينا
*الانتخابات جات والمويه ما جات علينا
*يبلعوها بي شنو الانتخابات دي يا والينا ؟؟؟؟؟
*ريقنا نشفنوا الدمغات وكملن دمعات عينينا
*والينا
*وزارة الطرق والجقور شغاله لسه لينا !!!!
جقر كهربا
ننساك كيف والجقر في بلدنا وفي مدينتنا وفي حلتنا وفي شارعنا وفيييييييي بيتنا يا جحا
والي لقاء
سلك
سودانايل أول صحيفة سودانية رقمية تصدر من الخرطوم
