سودانايل أول صحيفة سودانية رقمية تصدر من الخرطوم
أخبار أخرى
لما اقول الحوار مع الكيزان غير مجدي لايقاف الحرب تأسيسا على الحيثيات التي شرحتها في البوستات الثلاثة السابقة لهذا البوست، يأتي من يقول لي ايوااا انت عايزة الجنجويد يقتلوا ليكم الكيزان عشان تجو تحكموا!
الجنجوويد قتتلوا الكيزان وغيرهم من المواطنين الابرياء بكل اسف موش عشان انا عايزة كدا ! اصلا الجنجوييد ما شغالين عندي عشان يعملوا لي الانا عايزاهو!
كل الحكاية انو الكيزان اختاروا الطريق الموحش المتوحش في الصراع السياسي وفرضوه فرضا على الساحة واجبرونا جميعا على تحمل فاتورة الحرب التي لم تكن خيارنا! وعشان كدا عرضوا شبابهم للقتل ودمروا البلد كلها، وطبعا القتل ليس من طرف واحد فالكل قاتل ومقتول وحتى المواطن الفقير قصفه طيران الجيش في دارفور وكردفان بلا رحمة.
انا عايزة شنو؟
انا عايزة تجنب الحرب عبر اصلاح المنظومة الامنية العسكرية في اتجاه الغاء واقع تعدد الجيوش الذي صنعه الكيزان بالتدريج في سياق عملية سياسية حتى يكون لنا جيش مهني قومي واحد يكون اداة الدولة المدنية الديمقراطية لاحتكار العنف ولا يمارس السياسة ولا يتغول على الاقتصاد وينهب الموارد ، وذلك عبر تنفيذ عملية جادة للاصلاح الامني والعسكري جزء منها برنامج مدروس للدمج والتسريح وخلق بدائل عملية للالاف المؤلفة من جنود المليشيات والحركات المسلحة لينخرطوا في الحياة المدنية ، انا عايزة تفكيك دولة الحزب لصالح دولة الوطن وتسوية الملعب السياسي للتنافس الحر النزيه على السلطة عبر انتخابات ديمقراطية.
ومن وجهة نظري ان هذا هو السبيل الوحيد للتعايش السلمي بين جميع السودانيين كيزان وغير كيزان بصورة محترمة.
الكيزان فاهمين انو وضعهم الطبيعي هو الهيمنة على البلاد والعباد بالقوة ، ما مستعدين يقبلو بوضعية الشريك في الوطن لانهم شايفين وصايتهم علينا ناموس الهي غير مساءل ابدا !!
وعشان كدا الانا عايزاهو ممثلا في الدولة المدنية الديمقراطية وما تتطلبه من اصلاحات شاملة وجذرية الكيزان قالوا عليهو كفر وخيانة وطنية عظمى ومهزلة قحاتية يجب ايقافها بالحرب وفعلا ولعو الحرب مستغلين سيطرتهم على الجيش وامتلاكهم لعدد غير معلوم من المليشيات وسيطرتهم على الدولة ومواردها ، وحاليا هم الطرف المطالب باستمرار الحرب حتى تتحقق عودتهم الى السلطة الاستبدادية الفاسدة بعد شنق اخر قحاتي بامعاء اخر جنجويدي! .
اي زول شال قربة مخرومة طبيعي جدا انها تخر على دماغو زي ما بقولو المصريين!
انت ولعت حرب تقول لي انت عايزة الجنجوويد يقتلونا🙄
انت يالفالح لمن مشيت في طريق الحرب وجرجرت البلد غصبا عنها بي وراك كنت عايز شنو؟ ومتوقع الجنجوييد يعملو ليك شنو ومتوقع نتائج حربك دي على المواطنين شنو؟
