يا بحر
يا طيورنا الراحله بالحب والدرر
يا نيلنا
يا مراكب عشنا المخجوجه بين ألم السفر
يا فجر العصاري النازفه
مليتك أنا
ومليت معاك قفا البفوت
صوت البوادي الجافه
أسراب البيوت
يا قمري هوي
مالك علينا تقوقي ليل
تفتح شجن
وتعيد جرح الحروف الراعفه
تطحن والزمن
وَتْعِيد كمان !
والشوق تقيل
باكيات رموشنا اتجرحن
يا قلوبنا الراجفه من وجع السهر
مردوم قِبيل
خلصت تواريخ الرجوع
إِتْمَحنن
وِدْرَتْ منى
وطاشت سهام
وحِرقت نجوم
والأمسيات إتشتتن
بِقَن غيوم
بِقَن صحاري وراها بوم
ما صَدَّحَن
أو لَمْلَمَنْ فرح الصغار
أو هَدْهَدَنْ
عبدالماجد موسى مرحبا/ لندن
seysaban@yahoo.co.uk
