كورة مهيلم وباسل وميمي ورامي

بسم الله الرحمن الرحيم
في السلك

*الكلام ده كتبتو كتير قبل كده
*الآن اعيده للتذكير
*حا اعيد منه الجزء الخاص بلوح الشرف
*عشان تاني مافي زول يغالطنا ساي
*عشان بطولات الزيف والتصنيف تتواري خجلا
*عشان قصة المجموعات والجوطه الفارغه تقيف
*قصص خرافات ليس الا
*الاتحاد الافريقي طلع القائمه الذهبيه
*قائمة الشرف
*لوح الشرف الافريقي
*والمريخ مكتوب كبيييييييييييييييير
*لانه كبييييييييييييييييييييييييير
*صغير ما مكتوب
*صفر ما مكتوب
*لانو القائمه قصاد كلو فريق كاتبين فيها عدد الكؤوس الافريقيه التي نالها
*اذا عدد الكؤوس صفر
*لا بكتبوك ولا بكتبوا الصفر
*عشان كده لا الهلال مكتوب ولا الصفر مكتوب
*لكن انا اسمي مكتوب
*وباحرف من نور كمان
*فالسجل في لوح الشرف شرف لن يضاهيه شرف
*بدليل انو كل الفرق بتلهث من زمن الدوق هرر للتسجيل في لوح الشرف
*ولكن التسجيل في لوح الشرف مابجي صدفة ابدا
*بجي بدراسه وفراسه وقدرة كبيره
*بجي بالتخطيط والتنظيم والتنسيق
*لذا عجزت كل محاولات الفرق العشوائيه في الوصول للوح الشرف
*ايها الناس
*عندما تباهي الاخوه الاهله الشرفاء بالشباب
*قلنا انو الموضوع ماكده
*ما تختفوا القصه من نصها وتنقزوا بيها ساي
*ببقي نطيط بره الحلقه
*امس اعترف اعلامهم بان وليد (جسمه ) لا يمكنه من القتال لابراز قدراته
*وان الصيني داير ليهو خمسمائة كورة ورا بعض عشان يقدر يقيف في الميدان
*وان اطهر لسه
*وان وان وان
*وطبعا مع كل ذلك فشلت تسجيلاتهم التي بوبروا لها وتبوبروا بها بداية الموسم
*وكان معسكر الفجيره السري
*معسكر منطقه عسكريه ممنوع الاقتراب او التصوير
*ووقتها قلنا منع التصوير لاخفاء المواسير
*وسته اشهر اثبتت انو المنطقه عباره عن مخزن مواسير
*معقوله محترف سته اشهر لي اسي الجماهير ماشافتوا بسخن سااااي ؟؟؟؟؟
*ايها الناس
*الاهله الشرفاء لو دايرين يسجلوا اسمهم في لوح الشرف الافريقي باحرف من نور زينا
*يسمعوا كلامنا
*كلامنا كلام مجرب
*اول حاجه يتخلصوا من جميع المواسير
*تاني حاجه يقتنعوا بان كورة مهيلم وباسل وميمي ورامي وكابتن ماجد دي ما بتجيب بطوله افريقيه
*الصير ده بنجض في نار هادئه
*النار المشعلله دي بتحرقوا
*وبنشف
*وببقي زي الجراد المقلي
*الصير ده زي الروح في العصير
*بكون نقطه نقطه يدي نكهه بس
*لكن لو كبيتو شووووووو
*ببوظ نكهة العصير
*فطومه
*كترتي الروح وكوجنتيها
*روح موز وروح اناناس وروح بطيخ وروح دوم كلهن سوا بوظن عليكم الكركدي
*اسي عليك الله يا روشا
*وليد علاء لو جابوا ليهو موتر هديه
*بلحق بكري لو بكري جري ؟؟؟؟
*ايها الناس
*في التكميليه يوم الاتنين
*الهلال حاينثر الجواهر والدرر خارج كشفه
*اول حاجه حايشطب الدرة الفريده الجابوها ناس الجريده
*وحايشطب عقد اللولي اللولي
*لانو التطواني بعقد اللولي وبالدره الفريده ما بتقابل
*بس المشكله يجيب قنابل
*تنفجر علي صفحات الصحف المواليه
*وتحرق مراكب الهلال كالعاده في التسجيل علي لوح الشرف الافريقي
*كورة كابتن ماجد وباسل وورد والليث الابيض دي ما بتجيب مشوار للمطار
*ايها الناس
*المثل بقول
*المقدم ماموصل
*عندما فزنا علي بندل يونايتد وظفرنا بكأس مانديلا
*فتحت سجلات التاريخ اوراقها امام الحدث
*وتم تسجيل المريخ في لوح الشرف الافريقي
*ولما لعبنا نهائي الكونفدراليه امام الصفاقسي 2007 وخسرنا
*سجل لوح الشرف الافريقي الصفاقسي التونسي فائزا بالكأس 2007
*لم يسجل في لوح الشرف الافريقي ان المريخ السوداني وصل النهائي مع الصفاقسي
*ولم يسجل لوح الشرف الافريقي اننا في سنة 2008 وصلنا الي دور الاربعه
*لوح الشرف الافريقي لا يسجل الا الابطال فقط
*لذا نجد ان الهلال غير متواجد بلوح الشرف الافريقي
*لان الدخول لدور المجموعات لا يؤهل للتسجيل علي لوح الشرف
*فالمقدم ماموصل
*المهم
*الاحد يوم المدينه
*حاتسهر المدينه للصباح
*لاننا ماشين صاح
*اي حداشر بعملوا الحفله
*وفي الاذهان تلاتة محسن وبرهان
*بتاعت ضفر ايمن راجي
*المره دي بالعكس
*راجي ايمن ضفر
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الموضوع عرفتوهوا لينا
*ولا ننسي ونحاول نعيش يا والينا ؟؟؟
سلك كهربا
ننساك كيف وتاني لو طرشق ميعاد تجينا رسائل الواتس انو الميعاد طرشقتو اسرائيل
والي لقاء
سلك
b_silik@hotmail.com