مصطفي عثمان شحادين .. الدقا نسابتو وقلع مرحاكتو .. بقلم: شوقي بدري
30 أكتوبر, 2015
شوقي بدري, منبر الرأي
34 زيارة
shawgibadri@hotmail.com
في ديسمبر 1994 اتي مصطفي عثمان شحادين ، وهو يترأس وفدا كبيرا لكوبنهاجن . وكان وقتها قد عين علي رأس الدبلوماسة الشعبية لكي يتعلم قليلا ويصير علي رأس الدبلوماسية دي لوكس ومش الشعبية . ولم يفكر ابو الدرش ,, من العادةان يقول التاس لحسن ابو علي . ولمصطفي ابو الدرش ,, ا اذا دامت لغيرك لما وصلت اليك . ووضع احمد عبد الرحمن في الرف . والسبب ان الترابي لم يكن يستلطف احمد . فاحمد قريب وصديق الدكتور محمود برات . ويجمعهم النيل الابيض والدويم وام جر … الخ . وبرات هو اول من جاهر بنفاق الترابي وافشي عدم ممارسته للصلاة في بعض الاحيان . وقد لازم الترابي . وقام الترابي وتلاميذه بالهجوم علي محمود. واشاعوا انه مختل العقل ، بالرغم ان عنده دكتوراة في علم النفس وبعض الكتب منها جنوح الاطفال .
لم يفكر شحادين ان الدنيا دوارة . وكما يقولون الدنيا فرندقس والزمان نكاس . فاساء الشعب السوداني لدرجة ان رجال الاعلام من غير السودانيين انتفضوا ودافعوا عن الشعب السوداني . وقال عن اهله انهم شحادين . وكسر القحف مع الشعب السوداني . وقال بي خشموا الكان بياكل الكابيدا بالويكة … الما عاوزنا ما يشرب مويتنا ولا يولع بي كهربتنا وما يمشي في شارع ظلطنا . الكلام ده ما قالو لا كبس الجبة ولا اللبخ .
زمان ام سعيد في العباسية تجارتها في العرقي انتعشت وتنكرن لصديقاتها ، خاصة فضل الساتر اخصائية القام زوت والتي كانت تهاجم ام سعيد. وسعت ام سعيد رحمة الله عليها كلبة وسمتها ,, ما يقولو ,, هذا هو اسلوب شحادين .
سيبدة اخري ادخلت صديقتها لمنزلها وكانت تربطهن صداقة جميله . وتزوجت الصديقة زوج صديقتها . وصارت لها المكانة الاولي . و النتيجة ان صاحبة المنزل الاولي صارت لها كلبة اسمها .. اللقا نسي ..
ماذا سيكون رد فعل من طلع عليهم شحادين وكانه فرعون . بعد ان حدث ما ورد في المثل السوداني دقا نسابيو وقلع مرحاكتو . فالمال لا يشتري الصحاب الوفيين . وعندما يذهب المنصب والجاة يفر الناس . والقائمة طويلة . اين الترابي واين نايل ادام وصلاح كرار وقوش والجاز وعلي عثمان ونافع والعتباني … الخ
قالوا الدنيا بتهيبك والزمان بوريك وقل المال بفرقك من بنات واديك ، والجنس الفسل ما تجعلو دخريك . شحادين عندوا القريشات واحسن يكدب فيها . لانه اصحاب ورفاق حقيقيين ، يخربو . وما حيكون تاني عندو من يعتمد عليه لانه قد اختار الجنس الفسل . والناس كرهت نافع ولم يحدث ان شتم رجل سوداني كما شتم نافع . ولكن نافع في النهاية عندة قبيلة وهو يحمل اسمها في اوراقه الثبوتية . وشحادين الا ايشتري من السوق او يكري بلطجية . لان اهل القولد المشهورين بعشائريتهم وترابطهم ككل النوبيين ، صاروا لا يرحبون بإنتماء شحادين لهم .
من المحن السودانية ان مصطفي ذكرنا بالمثل السوداني العشر القام ليه شوك . تكلم شحادين وصرح .. البيمد ايدو علي الانقاذ …… الخ وهذا كلام ما بيشبه شحادين . لانه ذي الكلام ده بيقولوا ناس عندهم وزن وطعم وحمرة عين . شحادين ده من ما دخلوه الحكومة يتكشم ذي نار القصب .
كل الموضوع كان عاوز يوري ناس الانقاذ انه برضوا داخل معاهم . ولو حصلت حاجة هو متورط . لانه كان يتهم بأن امواله خارج السودان وليس عنده الشركات او الاستثمارات الكبيرة في السودان التي يخاف عليها … إذا كون انو … او النعمنو . هذا التصريح اطلقة مصطفي لانه احس ان البقية غير راضية من عدم مسكه العصا من الوسط او الطرف او من اي مكان بس طراوة وتبسم وفسحة . والجماعة في الكشف بتاع الجنائية . والبشير بقي يتلفت ذي الضل او ابدربين لمن يشوف البوليس . ولكن مشاركة شحادين وتصريحاته كانت صغيرة ومتأخرة .
عندما اكمل القاضي وحارس القانون بابكر عوض الله خيانته لوطنه وتسليمه السودان لناصر والقوميين العرب ، قرر ناصر ان يستلم نميري كل الاوراق . وتنحي بابكر لكي يصير مهمشا كنائب رئيس الوزراء . وقال لمن لامه . .. من اجل العزيزة مصر ولو جعلوني قنصلا في الاسكندرية لقبلت . قالوا رضيت بالهم والهم اباني . حتي سفير بعد ان كان وزير طلعت آوت لعبة قون . ووضح ان دور شحادين قد انتهي . الشئ الوحيد الذي لم يفشل فيه ولم ينجح كذالك هو اعتذارة للكويتين … وسمعنا قال ليهم الله يخلي اهلي ذي الترابة دي لو انحنا ما ندمانين ومتلومين في الكلام القالو الود يونس . وده كان حماس وفورة ساكت وانا من البداية كنت معترض علي كلام … يهود يهود آل سعود …. الخ والعاوزنو بنسويه ليكم ولي السعودية . وانحنا برابرة مساكين . واليوم يحارب السودانيون في اليمن عوضا عن السعوديين . ويقتلون اقرب البشر لنا وهم الاخوة اليمنيون الذين يشاركونا الشقاء والبؤس . وكان السوداني في اليمن مدرسا وطبيبا وفنيا. واليوم صار السوداني انكشاريا . ولا يزال هنالك من يطبل للبشير .
السعودية اليوم في حاله حرب وكما استعان الرومان بالهان والقائد اتيلا ، اشتري السعوديون القوات السودانية . هذا ليس بزمن الطبطبلة والغرودة . السعوديين عاوزين سفير عسكري او زول عندو وزن . والوزن والشخصية والكاريزما ما بجيبوها من السوق الحر . وشحادين ليس برجل المرحلة . الانقاذ تناضل لتحافظ علي حياتها . والبشير يعرف ان امثال شحادين ديل اخوان الباردة . او كما يقولون خوه كراسي . واول مرة نشوف عساكر باللبس الرسمي في العقد الثامن من عمرهم . . وده كله حفاظا علي تولا ؟
عندما اندلعت الحرب العالمية الثانية تقرر ذهاب قوة دفاع السودان للحرب في اثيوبيا ثم ليبيا . وبعد ان تكلم الظابط الانجليزي تكلم الظباط السودانيين . وكان سؤال احد ابناء الغرب … جنانو تليان ديل ما خواجات زيكم كدي . انحنا تليان ديل ما سوو لينا حاجة , وصرخ الظابط العظيم . وافهم الجندي المسكين ان تلك هي الاوار ويجب تنفيذها … والا …. فقال الجندي ما معناه …سمح …. بس دواس بلا خبينة ده ولا بنعرفي . هل عثمان كان ماشي السعودية علشان
يطيب خاطر السعوديين . وبعدين شحادين شحد لحد بقي لمن يجي السعودية السعوديين بقوا ذي ست البيت لمن تجيها الدلالية اول الشهر .
كركاسة .
انتقلت عظيمة عظيمات السودان الدكتورة خالد زاهر الساداتي الي جوار ربها بعد رحله عطاء مشرفة . اين المستشفي او العيادة التي تحمل اسمها ؟ اين الشارع الذي يحمل اسمها . اين تأبين الدولة ؟؟ اين التأبين الشعبي ، عندما تقاعست الحكومة . والحكومة معذورة لانها تكره الجمال وتنفر من الشرفاء .
سودانايل أول صحيفة سودانية رقمية تصدر من الخرطوم
