سودانايل أول صحيفة سودانية رقمية تصدر من الخرطوم
أخبار أخرى
بسم الله الرحمن الرحيم
في السلك
*الاهله لي اسي فرحانين بالتعادل
*وليهم حق
*وقالوا خرجوا بمكاسب كتيره
*منها
*انو الهلال كسب كيبي وبوتاكو وماكسيم
*وتغزل محمد عبدالماجد في التسجيلات الهلاليه الجديده
*ورجع محمد عبدالماجد ليوصي المجلس بتنفيذ مايشير به المدرب في التكميليه
*قال دايرين لاعبين يحققوا الفارق
*من وين نجاح تسجيلات
*ومن وين كايسين لاعبين يحققوا الفارق !!!!
*فارقه معاكم ولا شنو يا محمد ؟؟؟؟
*التناقض ده بوري مدي فرحة الاهله بالتعادل مع العالمي
*يا ابو حميد
*بطل هضربه
*انت قايل بكري جاري لي اسي ولاشنو ؟؟؟
*ايها الناس
*جميع كتاب الهلال يتفقون في عبارات محدده
*الهلال كان كويس وابدع
*ويرجعوا ينتقدوا نزار ماكان في يومو والشغيل بطيئ وسلبيه بشه وتواضع كرايكا وتوهان الطرف اليمين بتاعهم وشرود اتير وسلبية سيدي بيه
*طبعا ده غير الحارس الكاميروني سرحان عبدالبصير
*بمناسبة الحارس سرحان عبدالبصير دي
*طبعا بعض الاهله بقول انو الحارس كويس لكن في قون علولو كان سارح
*وفي ناس بقولوا انو ماكان سارح لكن الشوته باغتتو
*وفي ناس بقولوا هي ما باغتتو
*هو قام معاها لكن قام متأخر
*قام متأخر ؟؟؟؟سودانير يعني !!!!!
*انتوا وييييييييين الاسم ده ؟؟؟؟؟؟
*اوعه بس تكون هاجرت مع الطير
*باقي الطير لاقي الجو ده يهاجر ساااااي زي ما داير
*ما بقعد في بلدا ريق شجرها نشف
*طوالي يطير فووووووق ويكشف
*يشوف محل الخضار
*البقعدوا شنو في الجهجهه دي
*المهم
*ناس قالوا قام لكن قام سودانير
*متأخر
*وفي ناس قالوا في اياد خفيه لفت الكورة من الحارس الكمروني
*الكلام كتيييييييييييييير
*هو البقولوهوا الناس شويه !!!!
*بتاع بحر قاااعد في الاستاد
*لما جات لي جونسون وختاها في صدرو
*صاحبنا كان فاتح خيال ويتبسم سااااااي
*جونسون اداها لي علولو
*دردقها ليهو
*اريتو ما دردقها
*لما علولو اطلق الصاروخ
*بتاع البحر نطه
*وقال انتوا الامريكان ديل مادايرين يبطلوا حركاتهم دي !!!!
*قدر ماقالوا ليهو دي شوته
*ماصدق اصلو
*قال مالنا يعني ما بنعرف الفرق بين الشوته والصاروخ !!!!
*هو نحنا كان بنشوت زي دي كان السودان لي اسي قاعد في افريقيا دي
*يا اخوانا ما تدقسوني
*ده صاروخ
*مناظر زي دي شفتها كتير في جمب كافوري وقريب جبره
*الشوته بتولع اول ؟؟؟
*تولع بنننننننننق كبييييييييييره اول ؟؟؟؟
*اسي الحكاية دي ولعت اول
*حتي سمعنا ليك روووووووو
*يازول شوتة شنو ؟؟؟؟
*ايها الناس
*اعجبني اسلام كليتشي
*نحمد الله غلي ذلك
*دعوناهو للاسلام
*لا بالخطب الحماسيه ولا بالتعبيرات الرنانه ولا بي ( احسب ان) وناس تحسب وناس تحتسب
*شاف عاداتنا المستمده اساسا من الاسلام
*اللهم وفقه وفقهه واجعله من المقيمين للدين
*وانصره اللهم بالذات الليله
*انصره نصرا كان هبشها ساي تدخل قون
*ووفقه اللهم لاداء العبادات وحفظ القرآن
*وانصره اللهم شديد
*الليله بالذات انصره اللهم لينعم برضاك عنه
*ليتفاءل بالدين الذي اعتنقه يا ارحم الراحمين
*وما النصر الا من عند الله
*المهم
*بمناسبة اسلام كليتشي
*عندنا صاحبنا بتاع بحر
*بحر احمر
*اسمو وائل
*سمع بدخول كليتشي للاسلام
*قالوا ليهو كليتشي دخل الاسلام
*قال ليهم بدل منو ؟؟؟؟
*المهم
*اكتب قبل لقاء الزعيم والرابطه
*امني النفس بسهرة كرويه من امها
*فالزعيم يمضي للامام
*والرابطه ما هينه
*وعلي الشفوت مسؤلية النقاط
*ايها الناس
*الليله نار المك نمر مولعه في شندي
*برغم انو ما بخصنا الما بجدع الكدوس في وشنا
*الا اننا
*مابنرضي الحقاره لغيرنا
*طولتوا لسانكم يا روشا
*وجدعتوا الكدوس علي وجه سيدا الصبوح
*الليله للصباح
*كان الحكم نهاها
*الاقوان ما بتنتهي
*وكمان كليتشي اسلم !!!!!
*اللهم انصر المسلمين نصرا عزيزا من عندك
*ايها الناس
*اتوقع بنهاية مباراة الهلال في شندي
*يكون روليت الدوري قد اعلن ان ابو الهل الطيش في الاسبوع الاول
*بدون نقاط واكتر فريق دخلن فيهو اهداف
*كليتشي
*قول بسم الله وخلي الباقي علي الله
*ايها الناس
*في شركة امريكيه بتاعت قروض في الامارات
*اسمها اظنو ( اتش تي سي )
*صاح الاسم ده يا فطومه ؟؟؟
*باقي انتي كنتي في الامارات قريب ده
*الشركه دي قالوا عادي بتديك قرض عشرة مليون دولار
*واتقرضي
*ادت زول كده
*قامن صور المستندات شالن الهواء
*وجابن عندنا
*اتاريها الناس دي بالدين تسوي الزين !!!!!
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*نائب الرئيس امس التقي بينا
*الاقتصاد السوداني يتعافي بسرعه قال لينا
*نططنا يا والينا
*جد لينا جد لينا جد لينا
*لو اتعافي تمام يا والينا
*امرقوهوا لينا
*نشوفوا كي تقر عينينا
*ليه خاتنوا في الانعاش والزيارة ممنوعه علينا
*وكلو دقيقه يجينا زول ينظر الينا
*النبض كويس وانخفضت البولينا
*الكلي مامحتاجه غسيل وممكن تقسم وتشتغل لينا
*الكبد برغم انو اتليف علينا
*الا اننا قدرنا نمرق الليفه بايدينا
*التنفس ما مشكله لينا
*الاوكسجين متوفر لدينا
*والسكته الدماغيه عاديه وممكن تمر باي واحد فينا
*الكانسر قدرنا نثبتوا قبل ينتشر في البيشن وفينا
*القلب متضخم وورمان ونبضاتو حزينه
*الا اننا ممكن باللسعات الكهربيه ندوروا من جديد فينا
*لزوموا شنو التنظير ده كلو يا والينا ؟؟؟
*الناس ديل كلمهم قول ليهم الشعب قال لينا
*الاقتصاد ده لو ماشفناهوا ماشي بي رجلينوا في السوق وفي المستشفي وفي المدارس وفي المصانع وفي سعر الدولار
*مافي زول يجينا ويقول لينا اتعافي يا والينا
*المتعافي بنعرفوا والمامتعافي بنعرفوا يا والينا
سلك كهربا
ننساك كيف واقتصادنا زي البتعالج بره البلد يدونا اخبارو وما شايفنوا
والي لقاء
سلك
b_silik@hotmail.com
/////
