________________
ما فى شي يهزمك ابدا الا انت براك تهزم نفسك بالاحباط او تفقد طريقك و رؤيتك..
اى معركة عبارة عن جولات ممكن تخسر و ممكن تربح لكن اوعك تنهزم مهما حصل..
قدام القيادة والناس بتبيت منتظرة رصاصات الصباح اليومية ما كان فى زول بيحميهم لا جيش لا شرطة
الا شوية شباب من القوات المسلحة كان ضميرم صاحى و قلوبم حية و ما مرتهنين للمصالح وحسابات البيع والشراء.. كانوا سودانيين بالجد
خالفوا الاوامر
اوامر ابنعوف وعبدالمعروف والبرهان وكل العاملين فيها شركاء الثورة وكت كانوا بيقفلوا بوابات القيادة ويسيبوا الشباب تحت رحمة رصاص الملايش والملثمين وصعاليك الامن.
اغلب شهداء الثورة دى استشهدوا قدام القياده العامه .. والسلاح مدسوس والرتب تتفرج والامن يقتل والدعم السريع يتفرج والجيش قافل بواباتو الا ناس البحرية كانوا مع الناس ومنهم..
مافى زول حارس الثورة دى او حاميها غير شباب الاعتصام وناس التروس..
اى واحد فيهم دفن شهيد من اصحابو واتطاير دمو فى وشو وجسدوا
كتار منهم اول مره يشوفوا الموت عيانا بيانا ..
دسوا دموعم وواصلوا صمودم و حافظين العهد يا يجيبوا حقهم يا يموتوا زيهم .. ودم الشهيد ماراح
دم الشهيد لا للبيع لا للمساومة لا للموازنات
انتصروا والعالم كله حولهم
انتصروا والبشير ضدهم
والامن ضدهم
والشرطه ضدهم
والدعم السريع ضدهم
والاعلام ضدهم
والدول الخارجية ضدهم.
سقطوا البشير رغم البرهان وحميدتى كانوا مجرد عساكر يحرسوا حكومة البشير ويشاركوا في بيع الوطن
كسروا اسطورة الجهاز والامن الشعبي وكتائب الظل..
واقفين لسع فى التروس وفى الميدان وبيعاينوا للاستهبال الحاصل
الاستهبال الما انقذ البشير واسقط ديكتاتورية 30 سنه ودوله ممتده
البشير كان بيجرى للامارات ومصر وكل شهر جارى السعودية عمرة و عماله وكاش وبيع جنود
الان نفس الاعمال بيقوم بيها المجلس العسكرى…
نفس الافعال الما انقذت لا بشه لا على عثمان لا كل الكضابين والدجالين والمجرمين وتجار الحروب
فكوا النقابات؟؟
ايه يعنى البشير سقط والنقابات كانت موجوده ومتأمره..
فكوا الدجاج الاليكترونى؟؟
ايه يعنى البشير سقط والدجاج الاليكترونى كان مالى الاسافير
حميدتى قال ح يفصل المضربين؟
ايه يعنى نافع كان بيقول الحسوا كوعكم و جربوا ضراعاتنا..
سقطوا فى اقل من شهرين من تهديد الفاتح عزالدين انه ح يقطع رقاب الثوار؟؟
سقطوا والهندى كان بينبح وحسين خوجلى يكورك و الطاهر حسن التوم بيتافه والصادق الرزيقى يخذل و ينشر الاكاذيب ..
سقطوا وهم اقوى واكثر تنظيما من المجلس العسكرى ومن خلفه من بقية المتردية والنطيحة ومصاصى دماء الشعب من المصلحجية والملقنجية..
سقطوا والمسيرات تنحصر فى شمبات والشجرة وبرى وودنوباوى والعباسية والكلاكلات..
سقطوا وكنا افرادا قليلة يسخروا من ضعف المسيرات فى السوق العربي وعدم القدرة على وصول القصر..
سقطوا قبل ان يصبح الناس ملايين ويتم استعادة نقابات .. ويتالف الناس اكثر ويكون حلمهم قريب..
سينشطوا لهزيمتنا فى الامتار الاخيرة للوصول..
سيطلقوا كل كلب عقور ويشتروا كل خسيس يعرض نفسه للبيع ويرسلوا التهديدات والاشاعات ..
سينشطوا بكل ما فيهم من قوة..
لان النصر الكامل يعنى خسارتهم الكاملة وافولهم للابد ..
نصرنا بين ايدينا..
نحن من نحصده او نفقده باعمالنا نحن وثقتنا فى انفسنا ويقيننا بقدرتنا على النجاح.
النصر..يتحقق بما نفعله نحن
و
سنعبر
