هي وينا الكوره .. بقلم: بابكر سلك
16 أكتوبر, 2014
منشورات غير مصنفة
34 زيارة
بسم الله الرحمن الرحيم
في السلك
b_silik@hotmail.com
*هي وينا الكوره ****القاده راسنا وعامله نافوره
*طايرين من اي بطولة ****اسسناها دي المقوله
*علوق الشده والناس بي خموله ****ومافي احترام للناس وعقوله
*زايده ضغطنا والدم في الراس فار فوره *****رافعه السكري كمان جايبه ليها ايبولا
*نضحك في سيكافا وفي بورندي *****ونسوي الشينه والشينه المنكوره
*نتغلب جوه البلد بسهوله ******* ونتقدل نردد نحنا الاسسنا الكورة
*وصلنا حته ما معقوله ***** عندنا الكورة لاعبه نفتش في كورة بره منقوله
*ونحنا في بلد ليها اربعين وزير رياضه ****ومافيها باسكت ولا سباحه ولا سياحه ولاكورة
*ياناس كان رضينا بي مستوي الكوره وكروره ****عليكم الله ختونا الايبولا
*امس نمت حلمت جدي الله يرحمه جاني في النوم
*قال لي القصيده الفوق دي
*الغريبه جدي لحدي مامات ماكان شاعر
*دقس الجماعه خلي بالك
*الميتين ديل قالوا ما بحكوها شديد
*المهم جدي بعد القصيده اتونس معاي
*قال لي كورتنا ضد نيجيريا طلعت كم
*قلت ليهو الشوط الاول تعادل سلبي
*الشوط التاني الدقيقه تلاته جابو قونهم
*قال لي مازدا ده ما لو مع تلاته
*-الاقوان تلاته والدقيقه تلاته
*قلت ليهو يا جدي
*درنا
*في قبرو داك نطط
*ربط الكفن قوي وقام ينططط
*باقي هو زول مستور من حياتو
*وبعد نطط
*قال لي وبعدين
*قلت ليهو اللياقه بدت تنزل
*قال لي الله ينزل الدولار
*قلت ليهو والتفكير بدأ يتشتت
*واول عكسه تفكير الشغيل شتت تفكير الاكرم المشتت
*ونيجيريا للحنه طبقت
*ونحنا بنحاول نستجدي الحظ يدرن لينا
*نيجيريا اكملت الكوته
*تلاته يا جدي
*قال لي خلاس
*ابراهومه مامشي مازدا رجع لي كوتو ؟؟؟
*القصه يا جدي ما مازدا
*القصه سياسه فاسده
*سياستنا الرياضيه
*لاتخطيط ولا تنسيق ولا تسويق
*نشارك نطير
*نطير عشان نشارك
*قام جدي قال لي العيشه عندكم كيفنها ؟؟؟
*قلت ليهو يا جدي ارقد في سلام
*ما تسأل عن حاجه كان عرفتها تحمد الله في قبرك علي انك ماحضرت البحصل
*ارقد بسلام يا جدي خلينا نترحم عليك علي بال ما نجيك
*الغريبه جدي رحل عننا ليهو عشره سنين
*مصر انو في الانتخابات الاخيره صوت
*ياربي في خرف هناك برضو ؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*كنا بنتونس نفرق الهم الفينا
*نحكي وننكت ونضحك غصبا عن العن زاتو يا والينا
*قام واحد قال لينا
*واحد مشي لي دكتور بتاع بحر فاتح خيال فينا
*قال ليهو يا دكتور كلو ما ننوم بيتنا كلو بشيلو حمار النوم ويطفش النوم علينا
*الدكتور قال ليهو
*غيروا الجزار يا والينا
سلك كهربا
ننساك كيف ولو غيرنا الجزار يمكن نصحي نلقي روحنا مشعبطين في شجره ..باقي القرود كتار حايمين بعد ابادة جنينة الحيوانات
والي لقاء
سلك
سودانايل أول صحيفة سودانية رقمية تصدر من الخرطوم
