seysaban@yahoo.co.uk
أقول للذكرى العبرت فجأه
بالله أقيفي
وللعَبَرَات الراجفه وحيده ارجوكي تعالي
وللسحب الكان مشتهيه تضم في عيونك فجر الحب الدافق وجَفَّ
تعانق الفرحه
تلاطف صيفي
ولِلإمساء العاشق لحنك
سنوات شتويه
تقالد خوفي
زي قمراً خدري يتاوق رأفه
مالِك مستعجلة يا ذكراي الحلوه
يا أجمل نبته
يا الناعمه في طيفي
أنا محبوبك لو تذكري يا قمرية
دا انا الراجيك دهور
واحشني عتابك ليا
وواحشاني خطاوي الريد واحشني وصولك عند الجيه
احسب أيامك بثواني الساعه
أعد أنفاسي حبيبة قلبي
أعيد اوجاعا
مواعيدنا البدري
هجرت ضفاير الشوق الكان حارسانا
وعهودنا الكانت مرسومه في خد الشجره
جنب العنبه
محطة بحري
وبعت الليل وصباحو وأمسو
وكل لقاء ختيتو في صبري
قعدت أفتش في ليالي القدر الطافي
عن طلة موعد كان يتحدى
عن لمسة حب كانت مختفيه
دايماً نقاحه في بالي
أحس بخطاها تقرب مني
تَبُقْ الفرحه
تَعَشِّم فالي
أقول للحلوه الخطفت روحي
واسرت برضاي رفيف حروفي
وكل محاسن ظني
لا زالت نَبَضَاتك حيه عميقه
رقيقه
تغرد دايماً
صَبَّاحِي تغني
ومهما ترحلي يا عصفورتي الأنضر بهجه
تلقيني حِداك
في طيوفك أغزل يا السمحه فؤادي
وكمان اتغزل حوري
✍? عبدالماجد موسى/ لندن
