خارج النص
1 سبتمبر 2021م…
في أُوروبا والدُول المحكومة بقانون ونظام.. الزول البيشتِّت العملة الصعبة والعُملة الوطنية ساكت كدي تحت أقدام القواني والقُونات يحاكموهُو ويدحفسُوهُو ويملولُو خشمُو دا واطة!!!
في الوقت الذي يعاني فيه الشعب السوداني الأمرين من الضيق والضنك والعيش (المُو) كريم.. وتعاني فيه حكومتنا القاعدة في السهلة كدي سااااااااكت من شح الموارد وقلَّة الحيلة وخزينتها فااااضية من الدُولار تسوِّي كَرَوْ.. يخرج علينا سُفهاء القوم بين الفينة والأُخرى بهبالات وعباطات ما أنزل الله بها من سُلطان (نُقطة دولارية ونُقطة جنيهية).. لا يراعُوا حال الناس المُكَدَّسة في المستشفيات ما لاقية حق الدواء.. ولا يهتموا بالأُسر المُتعففة البايتة القَوَا وما لاقين حق العشاء.. ولا عندهم إحساس أصلاً بالمدارس الحا تفتح بعد إسبوعين دي والأُسر تشهق ما تلحق عشان تسدد رسوم تعليم أبنائها!!!
حا يجيني واحد ناطي يشبُكني حقد طبقي وما حقد طبقي ويقول لي قروشُن وحُرِّين فيها..
الرد ببساطة.. لع.. دي لاها قُروشن ولاهُم حرين فيها.. والذي رفع السموات بلا عمد.. واحد تعبان في قروشو ومجتهد عشان يلمها جنيه جنيه ما يشتتها بالطريقة المُستفزة دي!!! قُوم على حيلك…
خارج النص:
المسرحيات سيئة الإخراج التي تخرج علينا بين كل فترة والتانية عن لجنة الإلهاء (أقصد لجنة التمكين) بيني وبينكم أصبحت مملة وسمجة جداً..
لجنة التمكين دي لو جادين وشادين حيلهم وعاوزين يقبضوا على الفَسَدَة والمُفسدين بالجد.. يدخلو صالة زي الشُفناها اليوم في الفيسبوك دي.. ويقبُضوا من طرف.. تعال هنا يا اخوي القروش القاعد تشتت فيها دي جايبها من وين؟؟؟
(بين قُوسين من أينَ لكَ هذا)؟؟؟!!!
أُقسم بالله لو الأرقام السمعنا بيها لايصة في (الواتساب الإخيدِر) دي حقيقية.. تكاوِش ليك صالة واحدة بس.. بكرة بواخرك تتطاقَش في بورتسودان وتكون صفوفها حبِل.. وحقيقية مُو زي بواخر مُنعم سليمان الوهمية!!!
.
.
ويظل سؤالنا الدائم.. البلد دي السايقها منووووووو؟؟؟
+ يا ربي صلاح منَّاع تمكَّن من قبض الدكتورة هبة الهاربة من عدالته ولَّة لسَّع؟؟؟
++ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟؟
وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟؟!!!
jamal.trane@gmail.com
