الجبوري: حقاني وشعبي وعميق ووطني غيور !!

ركن نقاش
** استمعت كثيرا للجبوري وعلى فترات متطاولة وفي مناسبات شعبية ووطنية سياسية واقتصادية واجتماعية متلاحقة فوجدت فيه صوت الحكمة والمعرفة الموسوعية الدقيقة والعميقة والراي الراجح والموضوعي والحكيم والراي الصائب وهو بحق من حكماء السودان وددت لو التقطته قناة اذاعية او تلفزيونية ليصل الى الاخرين بيسر وسلاسة ولكن لم يحدث ذلك حتى الان!!..
** الفاضل الجبوري الكردفاني موسوعة شعبية عالمة بالسودان شماله وجنوبه الجديد وشرقه وغربه ووسطه جغرافيا وسكانيا قبائله وتكويناته وعصبياته ومشاكله والحلول.. استطاع ان يلتقط بحصافه مشكلته الاساسية القبلية ما قبل الاندماج الكامل ..عبر عن انفصال الجنوب من الشمال وانتباههم بحملهم مشكلة السودان المستعصية حتى الان فاكتشفوا انهم دينكا ونوير وشلك وفرتيت ووو..!!.
الجبوري يخاطب البرهان:
** السلام عليكم ورحمة الله تعالى وبركاتو. اليوم يوم ٨ شهر ٤ /٢٠٢٣.. سبعتاشر رمضان.. مع العطش ومع التعب حق رمضان دا
ما في شغل بقا لي حار زي الكلام اللي البارح قالو اخوي البرهان.. شايف الناس الدكاتر اللي العندهم العلم حق التنويم المغناطيسي قالو الزول بنوموهو بكلامك الدايرو حق قلبك القبيل بجيبو ليك.. البارح بدون تنويم مغناطيسي اخونا البرهان قال تعبير واحد
التعبير ده يلخص كل اللي بيحصل الان في السودان دا. البرهان قال انا اهدافي بوصل ليها حتى لو بحفر بالابرة .. بصل ليها بالحفر حق الابرة..التعبير ده يا جماعة تعبير صعب خلاص معناهو واضح انو اخونا البرهان ما مستعجل خالص ما مستعجل.. الشعب ده يجوع.. التعليم ينتهي يبقى الابتدائي مع المتوسطة ديل يلحقوا ديل وما يحصلوا ديل وديل ما يلحقو الثانوي وهناك ما يلقوا فرقة في الجامعة وناس الجامعة ما يعرفو يتخرجو.. الصحة تنتهي..
الدولار يفرمطوهو اكتل واجلد وينكمش

الجنيه السوداني يومي.. التفلت الامني.. كتر الحركات.. الكلام ده هو كلو قال ما مستعجل كلو كلو. وعندو هدفه والهدف دا بيحفر ليهو بالابرة. والابرة ذاتا خشم بيوت. في ابرة صغيرة..وفي ابرة سموها الميرف وفي ابرة سموها الكروشي وفي ابرة حقت الحقنة.. الابر ذاتا كتيرات. والكروشي خشما تركمان يأتوا في الابر ؟..المهم اخونا البرهان الحفر بالابرة للاهداف دا الا كان شغل حقك. ان كان السودان كده وده حقك ملك حدوده زي الكل انت حقك تتصرف فوقو على كيفك..ما في زول بلومك ما مستعجل. لاكين الرؤساء اللي بيحكمو بلدانهم بيستعجلو في التنمية. وبيستعجلو في الوفاق. وبيستعجلو في التطور في العلم وبيستعجلو في المشروعات وبيستعجلوا في الانجازات. ما في حاجة تخليك تبقا واحنا الجوع كتلنا يا اخوي الجوع الواحد دا الجوع تعرف الجوع. انتم هسا في القصر الجمهوري الجوع دا جنبكم ما بيجي..يعني الجوع هناك ما بيجي. لانه المي كرف تشربا الا المي سمح. واكلكم مجانا ثلاثة وجبات ما عارفين الرغيفات بي كم? ما حسبتوها برا في الشارع بي كم..
لاكين الشعب السوداني اللي انت سواك رئيس وختا الامال فيك انك تكون سوار الدهب نمرا اتنين. الشعب ده يا البرهان اخوي ما بينتظرك وانت في زي جمتك دي. وبمهلك زي دا..
اخوي الله يرضى عليك. الشغلة دي يعني انا يوم سألت قلت انت الحلة حقتك او القرية حقتك اخوي البرهان دي. سموها شنو؟..
فقالو يسموها قنتو ما اعرف انا نطقت الاسم دا غلط واللا هي صحيح سموها قنتو وقنتو دي في لهجتنا حقت كردفان القنتان ده لما زول
يشيل حمل اكتر منو. تشيل لك شوالين سكر في ظهرك. وبعدها بتقنت دا اسمو القنتان. واي حاجة شلتها تقيلة بقت تقيلة عليك اسمها بتقنت.. طيب الحله حقت البرهان اذا سموها قنتو ما عندها معنى اخر ولا انا نطقتها غلط..
اخوي الشعب السوداني قنت والله. وصحيح انت ولدوك في حله سموها قنتو. بعدين يا اخوانا واعمامنا والشياب الموجودين في قرية قنتو ولدكم ده يا جماعة ما تنصحوهو تقولو ليهو يا اخي كثف التنمية والتشوف البلد دي خربت كيف? البرهان اخوي ما تتنازل زي ما نزلت ابن عوف الهسي كلو ولا بقا يعني بقا بقا من التاريخ مشى؟.. اخوي شغلتك ان قلبتك ما تخليها الله يرضى عليك اي زول اخر من اخوانك اللي جنبك زول الابرة دا نحنا يا اخوي ما عندنا صبر والله الصبر اللي بيبل الابري الكلام زي دا ما عندنا. خلي الحفر بالابرة دا وبعدين انت زيك انت العساكر ديل لمن كان تبقو حقارين اخوانكم بينقلبوا فيكم. الوضع الحالي ده بوجود الدعم السريع ما في ما ما في انقلابات.. انقلابات ما في. يا ممكن اذا حصل انقلاب معناها موت شديد. احنا يا جماعة الشعب السوداني لا دايرين نموتو. ولا دايرين خراب. ولا دايرين جفا. يا اخي دايرين زول عندو فكر.. وزول يقدم لينا يعني برامج ترفع بلدنا دي في كل المجالات. يا اخي بعدك تبقا من قنتو? تبقا من آآ ماعارف الحلال. في اي محل في السودان ذا ما مشكلة. اذا احنا دايرين الزول االيحس بينا. البحس بي المنا. البحس بي جوعنا. البحس بي عطشنا. يا سلام. والله الحلة دي صحي والله قريتك سموها قنتو والله الشعب السوداني كلو قنت. قنت عديل القنتان الواحد دا..خلاص ما في طريقة خلاص. قبيل الناس بتمنو انو الجيش ده يبقا قوي ويعمل انقلابات. انقلابات ما في. انقلابات ما في خالص. انت ياخويا الله يرضى عليك يا اخي. الله يرضى عليك والدنيا رمضان يا اخوي عليك الله كان تشكل حكومة عليك الله تشكل حكومة ما في شغل بمنعك كان يا اخوي تعمل علاقات مع الدول بتنفع السودان يا اخي اعملها ما في شغل موقفك كلام الوثيقة زمان مشيت لك بوثيقة دستورية حكمتونا باقل سنة شرطت وفرمطت وانقطعت. جيتو بي شغل توه جديد سموه الاطاري. الاطاري دا قبال بنات عمو ما يدرن بيتو مختلفين فيهو. يا اخي شكلوا لينا حكومة عادية الحكومة حقت عديل رسمي وقانوني..ويا جماعة اقول لكم والله شوفوا لينا كلام السكة الحديد وشوفو لينا كلام التعليم وشوفو لينا كلام التنمية وشوفو لينا كلام الزراعة وشوفو لينا كلام العلم. يا اخي دي الديموقراطية اصلا بالمناسبة..والظلم دا ثلاث مرات في ظلم لا يمنع التطور. في ظلم لا يمنع التطور. الظلم الان موجود في الخليج بالمناسبة. ما منع التطور الدولي لمن نظمت كأس العالم ومشت وانتجت وبقت اعلى دخل في العالم واخرين الاسر الحاكمة في الخليج بالمناسبة مميزة اكتر من الشعب العادي حقها. ده ما ظلم لكين ما اثر. ما اثر اصلا. فيا جماعة يا اخي شغلتكم حقت اه يعني اه الديموقراطية في السودان بقت متل بت ابليس الناس بيقولوا حقيقة والصباح يصبح بتلقا كلام ساكت ما في اي شغل. ويا اخي بتقعد تطارد في الافندية ياسر وسلك وياسر عرمان وشنو? يا اخوي حفر ابرك دا نحنا والله يا اخوي حرق قلبنا دا كله يا اخي الله يرضى عليك يا اخي عليك الله يا اخي يا اخي شد حيلك يا اخي يا اخي شد حيلك انكرب انكرب بالمشروعات الحقيقية انكرب بالمؤتمرات الاقتصادية انكرب واضع نظام حقيقي لبناء دولة ما دام محتاج يا اخي العساكر مع السياسيين حقين الخرطوم يتفقو ولا ما يتفقو يا اخوي والله اسم بلدك دا والله يطبق فينا تب والله قنتنا تب والله. القنتان دا يا جماعة القنتان الشعب كله قنت٠٠(الفاضل الجبوري. كردفان)

eisay1947@gmail.com