موسم الهجرة إلى الشمال – بالله قف يا زمن .. شعر: د. عبدالمنعم عبدالمحمود العربي

 

 

د. عبدالمنعم عبدالمحمود العربي
28 June, 2023

 

آه يا عيد اليوم الخرطوم تبكي تنوح
شايلة هم مشوار حلفا وأهوال النزوح
إنت كيفك عودتنا تجي مستعجل تروح
لكن قبل ما تفوت وتتفاقم جروح المحن
بالله قف معانا شوية دقائق أو ساعة زمن
قبل ما تروح بصات الشمال مفارقة الوطن
قبل فوات الفرص و الثواني والدقائق
قبل ما الناس تموت من الرصاص والحرائق
نحن ودعنا كلنا ممتلكاتنا وديارنا الحبيبة
بالدموع الساحات والشجيرات الوريفة
بسرعة فتشتا حضرنا الشنط القديمة
ستفنا المستطاع من صور الأيام الهنية
قصاصات الرسائل الغالية وقديمة
مخزون سحر كل الأماكن الصديقة
ومواسم حلوة فيها كانت ربيعية ومطيرة
سحر السنين الخوالي منذ الطفولة
ورصيد كوم الذكريات الجميلة
وبهجات جنة دنيانا الحبيبة
نعيم الصباحات وحلم الليالي
جملة مشاوير مشاعر سنيننا الجميلة
في قرانا ومدنا الكان لينا فيها قيمة
كم كانت جميلة…آه يا حليلة
لكن يا وطن آه من تباريح الكدر
من معاناة الترحال وقساوات السفر
هجران الديار القسري حارا ومر
بالبر والبحر لا فرق هو حرب وفر
آه من التشريد والموت وهلاك البلاد
آه من قهر البندقية وبطش شواذ العباد
من محن أقدار جحيم قوم يأجوج وعاد
آه من البعد عنك يا أجمل وطن
آه من فراقك القسري آخر الزمن
آه من مجهول الشتات آه يا محن
اه من سفر مهين ممل طويل
آه من بحر عريض عبوره مستحيل
آه من حرقة الإحباط والشوق والشجن
آه من الاستعباد وحرمان البقاء في الوطن
يا رب عودة يا خرطوم ياجنة عدن
يا جنة رضوان عندنا يا عزة وطن
يا انت يا حبيبة يا كل الوطن
كان فيكي النعيم والملاذ أريح سكن
ما أعظمك يا سودان يا غالي الثمن
فخرا كلنا لك ننتمي يا أجمل وطن

28th June 2023
Nancy Agag - Ya Zaman (Sudanese Arabic) Lyrics + Translation - نانسي عجاج - يا زمن
عزيزي القارئ الكريم
عيدكم مبارك، يارب أرضا سلاح يعم السلام والله يرد غربة الجميع وغربة كل الوطن
عبدالمنعم

aa76@me.com

 

آراء