سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• في كلام واجعني شديد
• كنت اطالع في صحيفة المشاهد
• المشاهد الرائعه
• استوقفني تصريح منسوب للوالي
• التصريح وجعني شديد
• ماداير اقول الوالي ماقال الكلام ده
• علي اقل تقدير لدي ثقه في مصداقية المشاهد
• وماقادر اصدق التصريح
• علي اقل تقدير لدي ثقه في شفافية جمال
• لكن الكلام وجعني شديد
• جاء في المشاهد العدد 4100 الصفحه الاخيره الكلام الواجعني
• كتب عدلان يوسف
• وعدلان اعلامي احمر معروف وصاحب مكانه كبيره ويشتهر بصدق الكلمه
• وده الشي الحيرني اكتر
• جاء في التصريح ان طموح المريخاب قبل ثلاث سنوات هو هزيمة الهلال والفوز ببطولة الممتاز , وان ما يحمد للمريخاب ان طموحهم الآن قد زاد كثيرا وباتوا يأملون في الفوز بالبطوله الافريقيه مع العلم بانها اول مشاركه لنا في هذه البطوله بعد ان كنا نشارك كثيرا في الكونفدراليه 0
• انتهي التصريح
• عليكم الله ماكلام يوجع ويقطع المصارين ؟
• عمر طموح المريخاب لم يك في هزيمة الهلال لانها عاديه عند اهل المريخ
• عمر طموح المريخاب ياوالي لم ينحصر في الفوز بالممتاز لانه اكثر من عادي
• ولم تك هذه المشاركه ياجمال في دوري الابطال هي الاولي للمريخ
• تعالوا نتصفح التاريخ القريب
• عندما تسلم جمال لجام قيادة الفرس المريخي الاغر استبشرنا خيرا
• اول مشكله قابلت جمال مع الاتحاد كانت اصرار شداد علي تسليم كأس الممتاز وعندها كان الزعيم فائزا بالممتاز ثلاث مرات علي التوالي
• يعني لم يك الفوز بالممتاز حلم ولا غايه ياجمال
• اما هزيمة الهلال فحدث ولا حرج
• كنا نسخر من كثرة الفوز علي الهلال
• دونكم السبتين , وجميع مباريات السودان والدرع وبلاتر ياوالي
• هزمنا في موسم واحد هلال امدرمان وبورتسودان وهلال الجربوكسي زاتو
• وسخرنا بقولنا فضل لينا هزيمة الهلال الاحمر فقط لنكمل الفوز علي جميع الهلالات
• اذن لم يك حلمنا يوما هزيمة الهلال
• اما حكاية حلمنا بالفوز ببطوله الافريقيه فهو حلم من حقنا ان نحلم به طالما حققنا الفوز بمانديلا قبل ذلك وبغير مانديلا من البطولات الجويه
• اما حكاية مشاركتنا لاول مره في دوري ابطال افريقيا فمردود عليه بان فوزنا بالممتاز ثلاثه مرات علي التوالي خير دليل علي مشاركتنا في تلك البطوله والتي لايمكن اعتبار مشاركتنا فيها جديده علينا
• لاجديد تحت الشمس ياوالي
• ولاجديد علي الزعيم
• وقلبوا صفحات التاريخ
• الجديد فقط علينا هو الروح الانهزاميه والاداء باستهتار ودخول الولاء لغرفة الانعاش وعدم المحاسبه علي التقصير يا والينا وحوامة اللاعبون بعد الثانيه صباحا في طرقات الخرطوم والابقاء علي المخفقين في مراكزهم حتي مللنا سماع اسمائهم
• لا اقول المشاهد غير دقيقه او غير صادقه في اسناد ذلك التصريح للوالي
• ولا اصدق ان جمال قال مانسب اليه
• حيرتونا
• في تعدي علي الحدود والخطوط الحمراء
• ثاااابت عندك
• نحن في خواتيم الموسم
• سنتحاسب عند نهاية الموسم
• حساب بالمنطق والحق
• حساب يفتح العيون ويغير السلبيات ويلقي بكل متقاعس بعيدا عن دنيا الزعيم
• نحن مريخاب ومن نحاسبهم مريخاب
• اذن لاعداء ولا تسلط ولا تبعيه عمياء
• كل الولاء للزعيم في حضرته
• انا شخصيا مابايعت بعد محمدا رجلا
• اطال الله عمرك استاذي الكتيابي
• الله يحينا لي اخر الموسم
• وارقو ماماسوره
• وارقو داير انضباط وتوظيف صحيح
• دونكم يوسف محمد في اول موسم له مع الهلال
• طالبوا بشطبه
• اعاد ريكاردو توظيفه
• اصبح اللاعب الوحيد في الهلال
• وطبعا شيلة كروجر كانت المشكله
• سنعود عند الحساب للحديث عن الدوافع التي ادت الي شيل كروجر
• لما تكون المشكله في التوظيف الدفاعي تبقي المشكله مشكلة تدريب
• قلت لي كروجر بخندق !
• وسا000 سا 000 سنعود
سلك كهربا
ماتقول لي تواطؤ عشان الوطن , نغلب ونسجل للوطن موقف جمييييل
والي لقاء
سلك
