سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• الموضوع ده انتهي
• اصلوا كان مسألة وكت بس
• ناس محمد عبدالماجد عملوا ليهو توم وشمار
• شيه وقندهار
• اشتم رائحة شواء قال
• شواء بالشا ولا بالجمر ؟
• اتشوشوي
• الناس قايلين كل الطير كالا
• كالا البتتاكل بي نعالها
• قال شيه قال
• نسيتوا الكبده النيه يا ابو حميد
• ملحوقه
• في الجزاره في تونس قال ليك الكبده النيه لمن نيه
• كبده زي الكبده
• كلمناكم
• قلنا ليكم طريقتكم بتاعت نلبد
• يهاجمونا
• نطفشها وراهم
• يجروا ناس سادومبا
• يلقوا الدنيا خلا
• يجيبوا واحد ويضيعوا ميه
• وباقينا مخندق
• قلنا ليكم خطه بدائيه زي دي مابتودي لي قدام
• غايتو
• امس اتعذبنا جنس عذاب
• قون التقول ناقلاها بالصفيحه
• اول مره اشوف صوره مجلبغه
• وتقيف
• وتمش
• كنت قايلها اتلعبت بدري
• و كنت قايل ناس قون سجلوها في (سي دي) بايظ
• اتعذبنا عذاب
• كورة زي الكلمات المتقاطعه
• جزء في الشاشه وتكمل الباقي انت حسب المعطيات
• تشوف اللاعبين مقبلين علي وين
• وتفتح خيال تكمل بيهو الصوره
• قال حصريا قال
• دي كانت عصريا
• تخيلوا
• الحكم احتسب وقت محتسب بدل الضائع اربعه دقائق
• اول مره اشوف دقيقه دولار
• انتهت حداشر الا ربع
• يكون الحكم ده اشر للحكم الرابع اشاره معناها الا ربع
• والحكم الرابع سمعها اربعه دقائق ؟
• ياخ نحنا خلينا
• عمك احمد هرمنا
• احمد هرمنا البخت ايدو في راسو ويقول هرمنا لقد هرمنا
• قال ليك عمك احمد كان بحضر فيها في التلفزيون
• شاف الحكم الرابع رافع اربعه دقائق
• والاربعه تمت
• الخامسه تمت
• وعمك يتململ
• السادسه تمت وانذار للحارس
• لما جات الدقيقه تسعه وتسعين
• عمك خت يدينو الاتنين في راسو
• وقال ياحكم ….ياحكم ,,,,الزمن يا حكم ,, هرمنا ….لقد هرمنا يا حكم
• ياخ عمك هرمنا خليهو
• الزول التاني البجيبوهو في الجزيره
• الزول اللابس لبسه رياضيه
• وواقف براهو في الشارع وبكورك بالليل
• بان عليها يارب ….بان عليها يارب
• الزول ده قال ليك لما الكوره وصلت الدقيقه ميه وواحد مرق الشارع
• خلي التلفزيون كلو كلو
• وقعد يكورك
• الشارع فااااااضي
• قعد يكورك بان عليها يارب , وبان الحكم يارب ,,, الحكم بان عليهو يارب
• عذاب شديد
• اسلام بتتفرج معاي
• قالت لي الصوره ملخبطه كده قون ناقلاها بالكربون ولا شنو ؟
• قلت ليها لو ناقلاها بي درداقه كان وصلتها سالمه
• قون مابتعرف يابتي
• قالت لي وكت مابتعرف ليه ادوها تغرف ؟؟؟؟؟
• المهم
• بنتونس انا و اسلام قلت ليها انا لو محل ميشو بقول لادارة الهلال يا متأخراتي يا دي آخر كوره لي
• اسلام ضحكت وقالت لي انا لو محل ادارة الهلال بقول ليك اديناك ما اديناك الهلال زاتو دي آخر كوره ليهو
• ياناس
• مكرر الاولي هنا ولا هناك ؟
• ماتقولوا لي هناك وين
• انتوا قايلين هناك دي طوالي كالا
• ممكن هناك دي تكون ناس هرمنا برضو
• لقد هرمنا
• كمان قال ليك ناس هرمنا الفي مكرر ديل طيروا زين العابدين زاتو
• صعبين خلاص
• بان عليها يارب
• عندي نصيحه
• بدل الجماعه ديل يدخلوا في ديون لتذاكر السفر لي مباراة الرد
• وعليهم منصرفات علاج ود الجنيد
• اخير ليهم يقللوا الديون ويوفروا قروش العلاج ومايسافروا
• السفر وعدم السفر واحد
• يختوا الرحمن في قلبهم وينسحبوا
• والانسحاب ده ساااااهل
• وبعرفوا ليهو
• اسي الفريق الجزائري الانسحبوا من كورة الرد ضدو كتلوهم !
• ماياهم منسحبين وقاعدين يتفاصحوا
• شيه وقندهار
• انسحبوا انسحبوا
• ماتخجلوا
• المهم
• اسلام لسه بتتونس معاي
• قلت ليها ناس الفاتح النقر اخدوا في المغرب خمسه
• قالت لي يعني كورة الشباب ديل الملعوبه اسي دي لو كانت في تونس كان البلد دي اخدت خمستين في يوم واحد ؟؟؟
• الله يخت محنك يا اسلام , دي فكرتي فيها كيف ؟؟؟؟؟
• كدي خلونا من اسلام
• المكرر الاولي وين ؟؟؟؟؟؟
• سائل الله تكون الاولي برضو هنا والتانيه في تونس
• عشان قريبه ماعشان حاجه تانيه
• الشعب يريد
• عباره اول ماانطلقت انطلقت في تونس الخضراء
• سؤال برئ
• في قانون التحكيم
• هل يحتسب التسلل علي اللاعب حتي ولو لم يتداخل في اللعبه ولكنه كان قريبا من الحدث ؟
• قبل ما تجاوبوا راجعوا شريط الكوره
• ده طبعا لو قون حولتو لي (سي دي ) ما بايظ
• قلتوا لي مكرر الاولي وين ؟؟؟؟
سلك كهربا
ننساك كيف والحتانه فيها خانة شاغره
والي لقاء
سلك
babikir maki [b_silik@hotmail.com]
