لجنة شنو يابدوي؟

اصل الحكاية

أصبح الحلم حقيقة .. إستلم الوزير الاتحادي للشباب والرياضة خطاب الفيفا .. وسلم الوزير الاتحادي الخطاب لسبب الأزمة بدوي الوزير ، ودخل الكلام الحوش ، بدوي الوزير تحول في خلال ساعات من خانة المهاجم لخانة المدافع ، كون لجنة لترجمة ودراسة الخطاب ، لجنة شنو يابدوي ؟ الترجمة عايزه ليها لجنة ؟ طيب المدينة الرياضية تكون عاوزه شنو؟ .
الكلام واضح وبسيط ( ماتتدخل) ، ده مضمون خطاب الفيفا ، ليه؟ لأنك طرف تالت وجسم غريب ، الظاهر بدوي مامقتنع بحكاية ( ماتتدخل دي) ، ماتصدق الكلام البقولو الناس ، إنه الفيفا ماقال المجلس شرعي ، كويس إنك إستلمت خطاب الفيفا ودي براها خطوة توريك إنه الحلم أصبح حقيقة ، وحكاية مابتجي ومابتتدخل في قضايا الاندية عرفت بنفسك إنه كلام جرايد ساكت .
وزي ديل يابدوي ماعارفين يعني شنو كورة ؟ ومافاهمين المنظومة دي شغالة كيف ؟ القصة ومافيها إنه الفيفا عنده سلاح مدمر وأخطر زي مابقول دائما من سلاح الامم المتحدة ، لأنه الاخيرة ممكن تدخل معاك في حرب وضرب بالطيران والقوات البرية والبحرية وغيرها ، وبعد ده ممكن تخسر الحرب أو بمعني تاني ماتحقق الانتصار المطلوب ، لكن الفيفا بتكسب دائما وده الفرق ، عارف ليه ؟ لأنه سلاحها (قرار) رسالة وبالايميل كمان شفت القوة .
زي الخطاب الجاك ، في البداية بتنذرك وده كان زمان ، حاليا بتهددك نفس الجملة المشت للكاميرون وأمس وصلت يوغندا ، هي نفس الكلمة الجاتك (
ماتتدخل) ولو ما إستمعت لتهديدها زي ماعملت الكاميرون قبل يومين ( نفذت توجيهات الفيفا وتراجعت عن التدخل الحكومي) إتأكد إنها حاتتدخل وسريع جدا ، ولعلمك دي بقت سياسة الفيفا الماشة ( تدخل سريع لمنع التدخل الحكومي في
الرياضة) .
عشان كده الموضوع ماعايز لجنة ولا ترجمة ، لأنه الاتحاد السوداني لكرة القدم لما سلم الوزير الاتحادي للشباب والرياضة خطاب الفيفا ، مؤكد لم يسلمه دعم ومساندة الفيفا لتدخلات المفوضية والوزير الولائي ، ولم يؤكد في هذا الخطاب صحة قرار المفوضية بعدم شرعية مجلس إدارة نادي الهلال .
كلمة واحدة يابدوي ( ماتتدخل) دي عايزة ترجمة؟ وبإختصار ومن الآخر المفوضية والاستئنافات وقانون هيئات الشباب والرياضة ديل تاني إلا تدير بيهم اللعبات الشعبية زي ( أم الحفر) ، و( كمبلت) ، و( الرمة والحراسة) و( شليل) ، ولعلمك يابدوي ( ماتتدخل) دي معناها ماشغلتك المجلس شرعي ولا ماشرعي ، دي بحددوها الرياضيين باللجان الرياضية البعيدة عن الحكومة ، وعشان تعرف أكتر ، إنت عند الفيفا ( طرف تالت) وجسم غريب يعني ( ماتتدخل) بين البصلة وقشرتها ، ولو عايز ممكن من هنا لغاية الصباح نقعد نشرح في كلمة ( ماتتدخل) أو لا للتدخل الحكومي في الشأن الرياضي .
ماتتدخل دي يعني أمر لايعنيك ، ماتتدخل دي معناها مامن حقك تعرف أي شيء حول هذا النادي ، قروشه ، عضويته ، نشاطه ، إنتخاباته ، ومعناها برضه كل الإجتهاد والمال البيدفع لإصدار قوانين وخلق وظائف داخل الوزارة ، وتكوين أجسام لمحاسبة الرياضيين زي المفوضية والاستئنافات ، أصبحت ( تاريخ) ، وعمليا وجودها إهدار للمال العام ، لأنها لن تستطيع بعد اليوم التدخل ، لاإشراف علي إنتخابات ، ولا إعلان نتيجة إنتخابات ، ولا لائحة ، ولا قانون ، ولا نظام أساسي لنادي أو إتحاد ، ده كله تاني ماشغلك وما (
تتدخل) .
عشان كده ماتضيع زمنك ، في تفاصيل المكتوب في خطاب الفيفا ، ركز فقط في مايخصك في خطاب الفيفا ، ومايخصك قال شنوووووووو؟ قال ماتتدخل .. ماتتدخل ... ماتتدخل يابدوي .
hassan faroog [hassanfaroog@gmail.com]