جمال وجمال وملكة جمال

بسم الله الرحمن الرحيم

في السلك

*المريخ ده فريد

*ومتفرد

*خلي احمد ينبسط

*وود الملك في البطان فرحان يركز و ينجلد

*خلي فاطنه تزغرد

*خلي ناديه تغرود

*خلي روشا يبطبط

*موش قلت ليكم المريخ ده

*بخلي العاقل يطقع والمجنون يهبش !!!

*مريخ جميل جنس جمال

*وكيف لا

*في رئاستنا جمال

*في مرمانا جمال

*في اداءنا جمال

*في كاسنا بتجيبو ملكة جمال

*افتح خيال

*مهما فتحت خيال

*تقدر تتخيل ملكة جمال جايبه كاس للهلال ؟؟؟

*موش لو فتحت خيال

*لو فتحت بقاله

*ماممكن تتخيل ملكة جمال جايبه كاس للهلال

*لانو بي بساطه وبدون جدال

*متي ذهب الهلال للمطار !!!

*طوالي مع امجاد جمب جاد

*ويقولوا اسياد

*اسياد امجاد !

*امجاد

*يا بنتاع امجاد

*مشوار

*واقفين جمب جاد كل الامجاد

*ما بدخلوا المطار الا يسووا ليهم امجاد

*اتخيل الهلال ساكي ليهو امجاد وامجاد ساكه لي روحها امجاد

*ايها الناس

*الهلال شارك في سيكافا كتير جدا

*وفشل شديد جدا

*ولما غلبتو

*اتحكه زي النمله لما عضتو

*وقال ضعيفه

*الهضربه دب سبب اساسي في الصفر الكبير يا ناس

*هلالابي قالوا بخاف من الطياره شديد

*قالوا ليهو بتخاف من الطياره ليه ؟

*قال بتجيب كاس للمريخ اسي وتجي

*بخلي العاقل يطقع

*خسر الهلال تلاته سيكافات داخل هذا السودان

*وخمسه خارج الوطن العزيز

*وبرضو يقول ليك ضعيفه

*واحد هلالابي قال سيكافا مسييييييييييخه

*قلت ليهو كيف عرفتها وانت عمرك ما ضقتها ؟؟؟

*بتكلموا ساي خلي بالك

*موش قلت ليكم المريخ بخلي المجنون يهبش

*هلالابي صدق حكاية كاس الكنغو

*دخل يدو في الدولاب يهبش

*الدبيب ماقصر معاهو

*دولاب خلا ومهجور

*مشاركات الهلال بسيكافا بدأت سنة خمسه وتمنين

*الهلال بمجموعة الخرطوم

*معاهو قورماهيا الكيني ولمباليف الملاوي وسيمبا التنزاني وفيلا الاوغندي

*تعادل ابو الهل بهدف مع لمباليف وخسر من سيمبا اتنين صفر وخسر من قورماهيا تلاته واحد وفاز علي فيلا

*آخر مباراة له كانت ضد قورماهيا وخسرها تلاته صفر

*فيهن واحد في الدقيقه نص

*وكتب وقتها عبده فزع

*قورماهيا قابل قاورما

وبعد ده قاورما يقول ليك سيكافا ضعيفه

*لاحظوا الكلام ده جوه البلد دي في الخرطوم

*وكان ابو الهل طيش المجموعه في اول مشاركة له في سيكافا

*ثم شارك ابو الهل القوي في سيكافا سبعه وتمنين

*طبعا سته وتمنين اب زرد شال كاسها

*قام ابو الهل قال الا يشارك في سيكافا الضعيفه بتاعت سبعه وتمنين

*سقناهو معانا

*موش نحنا بطل سته وتمنين ؟

*ومشينا يوغندا بطائره واحده

*طار ابو الهل عادته وجاب لينا كلام ناس سيكافا

*مجموعته كان فيها باتا الملاوي وفيلا الاوغندي وبطل تنزانيا والبترول الصومالي

*مجموعه ضعيفه زي دي برضو طار منها الاضعف

*طار الهلال السودان والبترول الصومالي والنجوم التنزاني (النجوم التنزاني ده فريق عملوهوا قبل سيكافا بشهر لما طار منها فرتقوهوا )

*وطار ابو الهل للمره التانيه علي التوالي من الادوار الاوليه في سيكافا الضعيفه

*سيكافا الضعيفه

*وواصل اب زرد تي المباراه النهائيه

*ولعبها ضد فيلا الاوغندي وخسرها بهدف

*طبعا ناس الهلال مشوا معانا بي طياره واحده

*لكن ما رجعوا معانا

*رجعوا قبالنا

*طاروا بدري

*اقامتهم كانت قصيره جدا

*والجدير بالذكر ان اتحاد سيكافا طلب من ابو الهل مغادرة يوغندا فورا بعد الطيران

*فمكث ابو الهل لانو طياره مافي برغم الطيران

*وبعد داك جابوهم بي نيروبي

*وهنا في هذه الدوره كانت فضيحه بجلاجل

*اتارييها حكاية محل الحقنه من الزمن داك

*حكمنا الهرم القرقور كان مشاركا كحكم

*فطلب منه اداري هلالي ان يعمل علي هزيمة الفريق التنزاني ليصعد الهلال علي اساس الوطنيه

*يعني الوطنيه عندهم من الزمن داك تكون علي حساب الانسانيه

*محل الحقنه من زمن الحقنه بغلوها في صحن الحقن

*المشاركة التالته كانت سنة تمنيه وتمنين بالسودان

*وكان حظ الهلال العاثر قد رماهو في طريق المريخ

*فزحزح المارد اب زرد عن طريقه الخفاف

*وطار الهلال من جوه السودان

*ايها الناس

*ديل تلاته مشاركات للهلال بسيكافا الضعيفه

*اقروهم كويس واحفظوهم

*بكره بوريكم الخمسه مشاركات الفاضلات

*طبعا مافيهن شئ يذكر

*لا بطوله ولا اتبلت في خشومهم فوله

*برضو خرجوا بالصفر

*لكن كتار عليهم التمنيه مشاركات مع بعض

*قلنا نشققها ليهم

*ايها الناس

*تستمر الاحتفالات والطرب والكتمات

*بي حقنا

*محتفلين في فارغه

*وبنضحك

*بي سببنا

*جايبين جويه

*لكن البضحك غيرنا منو ؟؟؟

*وسببو شنو ؟؟؟

*لانو الضحك من غير سبب قلة ادب

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*قالوا ناس سيكافا دايرين يعملوا كورس تقويه للفرق الحزينه

*حولينا وما علينا

سلك كهربا

ننساك كيف وفاتتك سيكافا ثري يا فرده

والي لقاء

سلك

b_silik@hotmail.com