علينا اللحمة وعليهم القهمة .. بقلم: كمال الهدي
22 أكتوبر, 2014
منشورات غير مصنفة
28 زيارة
تأملات
kamalalhidai@hotmail.com <mailto:kamalalhidai@hotmail.com>
• مش زمان لما زار بلدنا لاعبو منتخب مصر بعد فوزهم بأمم أفريقيا قدمت ليهم رئاسة جمهوريتنا هدايا ثمينة ( عربة لكل واحد) !
• ومش في فترة مرسي أدتهم حكومتنا عدد من الأبقار هدية وعربون صداقة!
• ومش قمنا وقعدنا كلنا عشان ننظم ليهم مباراتهم مع الجزائر لما ما كان في طريقة يلعبوها في بلدهم!
• أها طيب الغريب شنو اليومين ديل!
• مالكم كلكم هايجين: علم السودان ما كان موجود.. والخريطة الكبيرة لمصر الوراء السيسي ضمت حلايب!!
• غايتو يا ناس الإعلام غير الموالي بتبالغو عديل!
• تفتشوا لي الحجج في أي شي.
• انتو ما عندكم شغلانة غير النقد ولا شنو!
• ما في إشادات خالص!!
• معقول بس حكومتنا دي أخطاء طوالي!
• ولا جاها يوم قدمت ليكم عمل طيب يستحق أن تحتفوا بيهو وتثنوا عليهو في مقالاتكم!
• أها الرئيس زاتو قال للصحفين الرافقوه في الطائرة انه مبسوط لنتائج الرحلة.
• وأكد أن الخريطة الفرتقتوا بيها راسنا موجودة منذ إنشاء قصر الإتحادية ولم يتعمد السيسي وضعها قبل الزيارة!!!
• المهم ما دام رأس الدولة مبسوط وما زعلان وكمان السيسي اعتذر ليه عن تفلتات بعض الإعلاميين انتو ما ليكم دخل بالموضوع!!
• ليه دائماً ما بتنظروا للجانب الكويس في أي تصرف للحكومة!
• مش سامعين كلكم بوادي النيل ووحدة الشعبين!
• طيب مش لازم في حالة التكامل والوحدة يكون في توزيع للأدوار!
• أها يا جماعة الخير نحن كان علينا اللحمة وهسه جاء دور أخوانا المصريين.
• هم طبعاً عليهم القهمة!
• يعني كل ما نديهم طن لحمة يدونا حتة قهمة.
• مش الحياة أخذ وعطاء!
• أها ده البقدروا عليه!
• والجود بالموجود!
• وما ممكن تطلبوا منهم يدوكم أكثر مما عندهم!
• ده يبقى حرام عديل!
• بعدين مش الحياة دي حلو مر!
• دايرنها حلو طوالي انتو ولا شنو!
• أكلتو بيتزا لما قلتو كفاية!
• وشبعتو هوت دوج حد التخمة!
• يلا كمان جربوا القهمة!
• بس يا السيسي العملتو ده ما سبقك عليه مخلوق!
• انت البتظهر طيباااااااان وغلبااااااااااان يطلع منك كل ده!
• آه يا بلد!
• وعذراً أيها القراء إن لم تفهموا شيئاً فلكل مقام مقال.
• والمقام هنا يفقد المرء التوازن والعقل.
• كلو فوق المعتاد.
• ما شفتو الليلة محلية الخرطوم السوت ليها إدارة للدرداقات!!
• إن شاء الله تكونوا فهمتوا الرسالة!
• الوالي الغالي داير يقول ليكم ليس بالنفط وحده تنتعش الاقتصاديات.
• والدرداقات ممكن برضو تكون مصدر للضحاكات.
• ولا حكاية الشاب المرقا في السعودية مع أمه المسنة لا جواز لا تذكرة سفر لا إجراءات خروج!
• وما تقولوا لي كمان ما سمعتوا تصريح رئيس لجنة الشئون المالية والإقتصادية في برلمانا الغلبان!!
• حضرة البيه رئيس اللجنة قال بتمنى أن يصبح الدولار بجنيه واااحد، مؤكداً أن ذلك ليس على الله ببعيد!
• أكيد ما في شيء بعيد على رب العباد.
• ونسأله تبارك وتعالى أن يخسف بأمثال رئيس اللجنة المذكورة الأرض ويريحنا منهم قبال ما نجن ونزيد في الجن.
سودانايل أول صحيفة سودانية رقمية تصدر من الخرطوم
