منِّك سلام وإليك سلام
يا أمِّي يا شوق يا دَفُو
ما روحي تِشْتاق ليك دوام
يا روحي أهديني العَفُو
دَوْزَنتَ ليك لحن الخلود
شان نبضي ريدِك يعزِفُو
و الْبيني وبينك في العيون
لُغة العيون ما بتكشِفُو
ولدِك أنا وزيِّك حنين
وكُل الحُنان لي بِصْطَفوا
راضْع المَكارِم من زمان
وقَدْر الكِرام جَدْ بَعْرِفُو
وفي قلبي شايل ليك حَنان
سِحر الحروف ما بيوصِفُو
عرفتَ بيك سِر الوجود
وما قدرتَ سرِّك أعْرِفُو
يا أُمي أنوار شوقي ليك
لا ناموا لا يوم إنطفوا
ولو قلتي ليْ مشتاقة ليك
أسقامي في التو يختفوا
ولو ليَّا ناس الكون جَفوا
لا شَكْ ضلوعِك يعطفوا
ومهما أسافر في السنين
موعِد رضاكْ ما بَخْلِفُو
وبتحدَّى بيكْ كل المُحال
و زهر النجوم ليك بقْطِفُو
و مهما قسَت سِكَّة رضاكْ
ميزان رضاك ما بطفِّفِّو
دا رضاكي جنَّات النعيم
يا (سيدة) أهديني العفُو
diaeldinragab@yahoo.de
