بسم الله الرحمن الرحيم
في السلك
• الكضب الاصلي قرب
• كضب مقنن
• تكضب وزواغتك في ايدك
• ابريل يا فرده
• الناس اتعلمت تكذب في الاول من ابريل
• ولما تنكشف تقول ليك دي كضبة ابريل
• طيب الناس البكضبوا السنه كلها ديل يقولوا ليهم شنو ؟
• ايا كان نوع الكضبه
• كضبه زي بتاعت خطاب الاتحاد المصري لحسن شحاته
• موش الحمد لله الخطاب ماكان معنون لي ميشو !!!
• الكضب حرام والقبر قدام
• اقرأ عليكم عناوين بعض الصحف في الاول من ابريل حسب توقعي
• الهلال يكسب شكواهو في الحضري
• الهلال التاني يكسب شكواهو في الحضري
• الاتحاد يشطب هدف ساكواها بعد ان كسبت الناس شكواها
• الانتر الانجولي يصعد للمرحله الجديده بعد كسبه لشكواهو في الحضري
• الحضري يصرح
• يمه ارحميني
• الاتحاد الدولي للاحصاء والتاريخ يشيل كأس مانديلا من المريخ
• وموش كده وبس
• يديهو للهلال
• واجمل مانشيت كضاب بقول
• الهلال يدفع استحقاقات جميع لاعبيه
• واجور اصحاب الحافلات والعمال
• مانشيت جديد
• العجب يصرح
• اتمني ان انهي حياتي الرياضيه في الهلال
• وتجيك رسائل في ابريل كضابه
• اللجنه الاداريه العليا تخصم من المريخ عشرين نقطه
• فيلكس هدافا للممتاز
• طبعا دي بتكون كضبه زي الكضبه
• فيلكس زاتو مابصدقها
• ومابعيد ترجع حكاية معسكر ايطاليا
• ومنير الانتر
• المره دي بتكون الشتله روما الايطالي يطلب اسامه التعاون
• يطلب ؟ يطلبو كم ؟
• وندور نحنا في اسامه التعاون روما
• وماتستبعدو سامي عبدالله اودينيزي
• واتير برشلونه
• وفي احتمال يظهر مانشيت كضاب كبييييييييير
• الطبيب يمنع ساكواها من اللعب تسعه سنين
• وما تستبعدوا يظهر لينا مانشيت دولي
• زي خطاب الاتحاد المصري
• مصدر بالفيفا يكشف اتصال الوالي ببلاتر لدفن موضوع الحضري مقابل كور يجيبها جمال للفيفا
• ابريل
• شهر الشتول الجميله
• المهم
• الفريق القومي كان مابطال اول امس
• تشعر في حركة
• بالذات في الوسط
• الحيويه دي جات لي وسط الفريق القومي ليه ؟
• انا غايتو يخيل لي النص ده يا مازدا تقرط علي كده
• ماتجيب اي زول تاني من بره
• ياناس
• ساكواها اصيب
• قالوا عين
• العين هينه
• بتنقده
• كعب الكلام التاني
• خلاص بدينا ؟
• قلنا ليكم اتحصنوا ما بتسمعوا الكلام
• الهي رد ضرر من يضر الناس اليه مضاعفا
• البضرنا في خانه
• نشوفوا في فريقوا كلو يارب العالمين
• الحسد بعمل اكتر من كده
• الرائع المريخي الفنان اكرم ذكي يشرفنا في اجازه قصيره هذه الايام
• قال لي الثورات العربيه بتاعت العطاله اتت اكلها
• قلت ليهو كيف ؟
• قال لي شايف في الوطن العربي توجد وظائف شاغره كتيره ,رؤساء ووزراء وووزراء دوله وسفراء
• قلت ليهو وظائف المحليات بتشغر متين ؟
• قال لي علمو فوق
• نحن لا نتأثر بفقدان لاعب لمباراه
• وان كنتم تظنوا ان فقد ساكواها في انجولا خساره فانتم واهمون
• واهمون دي جايه من وهم
• يعني بتتوهموا
• لكن بصراحه
• باص العجب في الشوط التاني لي كاريكا
• الباص بتاع زراعة الكلي
• الباص ده كترت التعليقات عليه
• واحد قال لي الباص ده اطول من بصات الوالي
• وواحد قال لي تقول العجب لعبو بالبلوتوث
• لكن انا قولي
• لو ما حارس المرمي طلع ومسك الكوره
• كاريكا كان يكون جاري لي اسي
• كنت اتمني ان اسمع تعليق الاستاذ الرشيد بدوي علي هذا الباص
• لاني اذكر بعد ان وقع طمبل في المريخ
• وفي مباراه للفريق القومي
• العجب قام علي جنو
• ولعب باص لي طمبل زي التقول رسل الكوره في مسج
• زول ماشافها
• طمبل لقاها قدامو لما نطه
• وضيعها
• الايام ديك كانت الحمله علي طمبل زي الحمله علي الحضري في هذه الايام
• واذكر الرشيد امتدح الباص
• باص العجب
• كم دقيقه كده يوصف في الباص وفي مهارة العجب
• ولكنها كانت زي كلمة حق اريد بها باطل
• لانو الرشيد بعد المديح ده كلو قال لكن لي مين يا عجب ؟ للبفهما
• كنا دايرين نعرف باص العجب الاخير وسك الكوره ده تعليقك عليهو شنو يا استاذنا ؟
• واحد قال لي كاريكا كان زي الشافع الساكي جراده
• يسكها
• يحصلها
• يدنقر عشان يشيلها
• تطير منو
• ترك قريب
• يمشي عليها تاني
• ويدور يمسكها
• تطير
• وهكذا
• يظهر العجب اصدر قرار بتعين كاريكا في هيئة مكافحة الجراد
• عجيب يا عجب
• كان اديت زول باص تقطع قلبو بالجري
• تخيلوا لو كان الباص ده لبكري المدينه ؟
• كان مرق في كريمه
سلك كهربا
ننساك كيف والجماعه دوروا في ساكواها , نفس الدواء
والي لقاء
سلك
babikir maki [b_silik@hotmail.com]
