السودان دا تقول مدعياه واحده من حبوباتنا الصادقات ديك الله يرحمن، ماممكن من الإستقلال وللآن يجي زعيط ويروح معيط والحال يغني عن السؤال، وكمان ناس أَلحس كوعك وقش خشمك قعدوا على نفسنا تلاتين سنة وماصدقنا لما جات الثورة وكنداكه جات وبوليس جرى.
فرحنا وقلنا خلاص غارن أبات كارينات البجيبو الغمة ديك، وفاتو ناس هناي البزررو زراير البدلة معكوسة، وفلان داك البياكل بيدينو الاتنين تقول مولود في العقبة ، وجنس لهط غايتو كان في زمنن داك ناس مابقولو بسم الله، والعجب الكروش ديك بالله تقول مقورة زي المحشي مابتتملي ولابتشبع.
غنينا ليهم رحلوا خلونا ومابنريد غيرن، تاني عاودنا الحنين ورجعنا وريدنا ناس لوله وميمي وسوسو ، وحمادة الخواجي ومنو داك الأمريكي، وشي سلك وشي مفتاح وآخر شياكات ورطانة بالإنجليزي، وعالم كدا يفتح النفس ضلفتين.
لكن ناس غزوني ماتنسوني ديك بكو وادردقو وقالوا إلايقسمو ليهم، ولما حشروهم قسمو القصر زي صالون العرس الناسو مامتفقين أهل العريس يحمرو لأهل العروس ويجدعو ليهم في الكلام، وديل مابردو ليهم طبعا يخلوهم لما يطلعو وبعد داك يقطعو فيهم قطيعة السيح والريح، مايتركو ليهم جنبه يرقدو عليها، وطبعاً هناي داك ماكان معاهم في البداية لكن من جاء متلصق لحمادة في صفحتو ، وكل مره يوسوس ليهو في أضانو ويسألو ، اها بعد قصة تِرِك دي دورت قام سأل حمادة قال ليهو إنت طابق ومطبوق ديل مالم ركّبو لينا وش الككو ما كنا كويسين، قام حمادة قال ليهو يازول ديل بتاعين بتاع ساي سيبك منهم خلينا في المهم، تِرِك دا قصتو شنو؟ تحت تحت سمعت قالوا شركات الشحن البحرى الكبرى كلها غيرت خطوطها الملاحية الى الموانيء المصرية ! وبدأت الحاويات تصل موانيء مصر ويتم التخليص خلال 24 ساعة والتسليم في المكان الذي يحدده صاحب البضاعة أياً كان ، وادي حلفا أو الخرطوم أو بورتسودان باللفه ، قام هناي رد لحمادة طيب إنت عارف الكلام دا كله وساكت ليه؟
كان الزول دا إستمر في قفل الميناء أكتر من كدا تاني إلا يختو سرايرن وينوموا في الكورنيش ويلعبوا لعبة الكراسي مع الغربان، حمادة قال ليهو إنت في تِرِك نحن برانا مامتفقين هسه خروج الجماعة ديل رسمياً ونهائياً من ميثاق إعلان قوى الحرية والتغيير (أ) الذي وقع عليه في يوم 1/ 1/ 2019م، فيما نفى صلته بميثاق التوافق الوطني قوى الحرية والتغيير النسخة الثانية “قاعة الصداقة ب”، داعياً لحل الحكومة الحالية، وتكوين حكومة كفاءات مهنية قومية لقيادة ما أسماه بالتغيير المنشود، باقي ليك حرشوهن ناس هناي ديك ولافهمن شنو؟
هناي قال ليهو ياحمادة المحرشين كتار وهسه ناس تنسيقية قبائل الكبابيش برضو قفلوا طريق الصادرات أم درمان جبرة بارا وحذروا اصحاب البصات السفرية والمركبات بعدم المرور بذات الطريق، واكدوا بأنهم إبتداءً من صباح اليوم سيكون الإغلاق نهائياً ودون استثناء، وناس نهر النيل قايمين بهناك برضو، وناس الجزيزة مقفلين الشارع وحتى سد مروي قالوا قفلو إنت قصة القفيل دي شنو؟ حمادة قال ليهو ياهناي الناس ديل قاموا يقفلوا بعد شافوا تِرِك قفل الشرق طابق عاجبه الخراب ومطبوق لابد لبدة عدوك ، رد ليهو هناي طيب ياحمادة إنت وطابق ومطبوق إتفقوا وأحسموا الفوضى دي الناس في أي محل يهرجوا وينقنقوا تِرِك تِرِك شالوا حالنا ونقحوا طارنا، حمادة رد ليهو إنت ياهناي ماسمعت طابق قال الأمن والشرطة مسؤولية المدنيين، ومطبوق قال لن نسلم الأمن والشرطة للمدنيين، أها هسه يصدقوا منو وأنا أقيف مع منو؟.
رد ليهو هناي ياحمادة إنت ماتخوفن كلهن ولاعندك معاهن بتاع؟ رد ليهو حمادة بزعل ياهناي إنت ماتتكلم كلام فارغ وخليك في بتاعك براك مالك ومال بتاع البتاعات، رد ليهو هناي طيب أديكم فكرة أقبضوا لينا تِرِك دا مايقلب فوقنا البتاعة دي زي تيس أبو العوض، حمادة سأل هناي قال ليهو تيس أبو العوض مالو؟ أحكي لي القصة ياهناي عليك الله، هناي قال ليهو كان في واحد عنده زريبه بهائم وعنده تيس سمين كدا وقوي كان اتفكه بلخبط الدنيا كلها، وعنده ولده اسمه العوض كبير لكن الناس الملفوحين ديك، أها عمك وولده ومعاهم ضيوف جابوا العشاء وماعندهم كهرباء منورين بلمبة صغيرة، وأثناء مابدوا عشاهم التيس قام اتفكه وجاء كابس صينية العشاء، أبو العوض قام يكورك العوض العوض ألحق التيس مايجي يقلب لينا صينية العشاء، العوض عض جلابيتو في خشمه وقام جاري، كراع ختاها في صينية العشاء قلبها في الواطة والتانية وطى بيها اللمبة كسرها، ابوهو بقى يكورك هي ياجماعة هوي اقبضوا العوض التيس خلوا، هسي ياجماعة كدي اقبضوا تِرِك البرهان خلوا.
خالدة ودالمدني
٢٠٢١/١٠/١٢
almadanikhalda@gmail.com
