العرجا لمراحها
فعلا انت “جيت مارى” بالحركة الشعبية قادما من الحركة الاسلامية وعدت الان لهم حليفا ومدافعا عنهم اكثر منهم فمبروك وبخيتة عليك .
1- طبعا محاولة التذاكى والوصاية ما بشتغل فينى يا مبارك قصة إفشاء المباحثات وانو فى موقف دبلوماسي وغيره ..انا ما الزول البتهدد والا تكون جيت الحركة الشعبية وطلعت منه من غير ما تعرف الكادر (المقعد نفسه وشغله) فى الحزب .. وانا ما الزول “البسألوه” من حاجات حزبه.. والا لو داير توصل رسالة معينة لناس محددين هنا وهناك …
2-لست فى حاجة لاي سجال آخر فى مسائل مؤكدة للجميع ولست لى طاقة لسجال فى المسائل الانصرافية للبّ القضايا والتى حاولت ان تجرنا لها لقد ناقشتك بأدب وإحترام لكن يبدو أننى كنت مخطى فى الطريقة والتعامل على كل حال .. وكل ما قلته صحيح والكل متأكد الان
3- حيسقط الانقلاب ده والشعب السودانى حيستعيد مؤسساته الديمقراطية و”الإقتصادية”..ولو جابوك جوبا تانى مكلبش الاخ “شبور قوج وأصدقاءه ” ما حيجوك تانى فى المطار ذي المرة الفاتت لانو كلو اعمالك ونواياك وحلفاءك بقوا معروفين وفى السهلة
4- إجوبة بعض الأسئلة ما بضيع زمنى بيهم لانو متاحة فى صفحتى ..أما لما يحتفون بى ايضا تم الاجابة عليه من القراءة
5-“الورجغة “والكلام الاملائي الكثير المتناقض عن الانقلاب والذى أكدته بنفسك وكل تبريراتك المتناقضة وموقف تحالف واعتصام القصر المشهورة (باعتصام الموز) قد تم الرد عليك من الاخوة/ت السودانيين
أخيرا :-
وقت تجى تصلى يا مبارك فى اول الركعة وانت تقرا سورة الفاتحة الا تتوقف فى هذه الأيات؟
(اهْدِنَا الصِّرَاطَ الْمُسْتَقِيمَ @ صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ)
لماذا تتخلى عن الحق وتنتهج صراط المغضوب عليهم والضالين؟؟؟
ما داير إجابة بس دى نصيحة أخوية
الخاتمة :- بعتذر لكل الاخوة والاخوات الطلبوا منى وقف السجال ولم إلتزم بكلامهم ..المهم ده اخر كلامى لاردول.. وبعتذر ليكم شديد
