استقيل يا….. جمال .. بقلم: حسن فاروق

اصل الحكاية
شيء اشبه بلعب الاطفال ، لم اجد وصفا يعكس مايدور في نادي المريخ علي مستوي مجلس الادارة اصلح من هذا الوصف ، مع قناعتي بأن عالم الاطفال عالم جميل ، ولكنه في المقابل عالم يحتاج الي ادارة تتابع وتوجه وقبل كل هذا وذاك تربي ، هل تذكرون برنامج (جنة الاطفال) التاريخي الذي يبث عبر شاشة التلفزيون القومي ، توقف او بمعني اصح تم ايقافه من المدير الجديد (المكلف) ، خمسون عاما هي عمر البرنامج ، تم ايقافه هكذا ومن مدير (مكلف) ، يعني ده لو مدير بمعني كلمة مدير ما نستغرب لو اوقف البث التلفزيوني ، السؤال هل يحق (للمكلف) او (المؤقت) اصدار مثل هذه القرارات الخطيرة في تقديري الاجابة لا ، فأنت ايها السيد مكلف بالتسيير الي حين تعيين مدير جديد ، والمدير ذات المدير (المكلف) ، فاجاء الجميع وعلي راسهم العاملين بالاذاعة والتلفزيون قبل المشاهد ، بنقل البرنامج الذي يقدمه عبر الاذاعة علي الهواء مباشرة بالتلفزيون القومي في توقيت واحد، ده ممكن يكون مدير (مكلف) ؟ ماااااا أظن، وفي تقديري ان مثل هذا المدير (المكلف)، لايختلف عن رئيس مجلس المريخ جمال الوالي ، الذي يفترض أن يغادرإدارة المريخ اليوم قبل الغد غير مأسوف عليه مقارنة بالفوضي والعشوائية التي اصبحت جزء من ادارة النادي الكبير طوال 13 عاما، وفي التلفزيون مجبورين نتابع برنامج اذاعي عبر الشاشة لانه (المكلف) عايز كده ، ولانه البرنامج برنامجه وهو من يقدمه ، تخيلوا الي اين وصل بنا الحال .
جمال الوالي استقال وماكلم زول غير عبد الصمد ، وعبدالصمد كلم السودان كله وقال لينا استقلنا انا وجمال ، حسب كلام عبدالصمد الاستقالة مكتوبة ، ووصلت المجلس ، كل الفيلم الهندي ده مكتوب ومرسوم ومحدده فيهو الادوار ، المفارقة في انه عبدالصمد قال للسودان كله من خلال قناة (بي ان سبورت) قبل كورة عزام الوضح انها سبب الخصام مع اننا ماعرفنا منو مخاصم منو؟ بعد الكورة ضمن المريخ الفوز والتاهل ، واجتمع المجلس لمناقشة الاستقالات ، بل ان البعض اعلن وبثقة لاتحدها حدود ان رئيس المجلس سيغادر وبعضهم اكد المغادرة الي غير رجعة ، ولكن الاجتماع انتهي ، وخرجت قرارات ، ولم نشهد استقالات ، ولكن تكونت بعثات ، ياراجل الم يستقيل الرجل ؟ لا والله لم يستقيل ، كيف الكلام ده؟ كده ما استقال الغريب شنو هو دي اول مرة ؟ لا كيف ، مالازم نعرف كيف؟ طيب عبدالصمد كان بونس في السودانيين ، ولا بضحك عليهم ؟ ماهي واحدة من اتنين يا بونسهم يا بضحك عليهم ؟ والاتنين كل واحدة مصيبة اكتر من التانية ، الغريبة بعض الصحف كتبت ( اجتماع مجلس المريخ ينهي هواجس الاستقالات ويتفرغ للبطولات) انتهي ، والاغرب ماخرج علي لسان الامين في الخبر المنشور امس بالزميلة (الزعيم) .. ( وشدد الفريق طارق علي ان الوقت غير مناسب للحديث عن اي ملفات اخري بما فيها الاستقالات) انتهي .. ياجماعة ماف زول عاقل يقول للناس ديل اختشو واحترمو المناصب الانتو قاعدين فيها وامشوا .. استقيل ياجمال، فما تفعلونه بالمريخ به اساءة للعب الاطفال ، علي الاقل في لعب الاطفال براءة ، وانتم تلعبون بالمريخ ، استقيل يارجل، اواصل بكره لو باقي لينا عمر.
hassanfaroog@gmail.com
////////////