قبل قليل رميت اضاني سمعت ابني منوا بيج يحكي بعض النكات الانجليزية لشقيقة الاكبر فقوق نقور . منوا من النوع بتاع بكش فلسفة . ولم التفت اليه . ولكن سمعت فقوق الجاد يحكي نكتة انجليزية ، تقول .في واحد سايق بص مليان قرود . البوليس وقفوا وقال ليه ما ممكن تلف في البلد وشايل ليك قرود حايم بيها . القرود دي توديها حديقة الحيوانات .
تاني يوم العسكري يلاقي نفس البص والسواق والقرود . العسكري قال للسواق ,, انا ما قلت ليك تودي القرود دي حديقة الحيوانات ؟؟ السواق قال ليه ,, انا سمعت كلامك .امبارح وديتهم حديقة الحيوانات . والليلة موديهم الملاهي .
البشير لملم المعارضة المدغمسة والمؤلفة جيوبهم والمتلئة كروشهم ، في الوثبة . ودلوكت حيوديهم ملاهي الانتخابات .
محن الانقاذ ما بتنتهي ابدا . اليوم نقرا . البشير يعتمد تعديلات الدستور . معقول ده يكون خبر . الناس الدرسوا اعلام فهمونا انحنا العتالة الما عارفين. انه لمن كلب يعضي زول ده ما خبر . لكن اذا زول عضي كلب ده هو الخبر . يعني كان في احتمال انه البشير ما يعتمد التعديلات الفصلها وطقاها وكسرها دبل عمود وعمل ليها كرشليق وقيطان ؟؟
ونافع يجخ ويقول للمعارضة انه الانقاذ مؤكد حتفوز في الانتخابات . والانقاذ اذا ما ضمنت كان عملت انتخابات ؟ طيب التعب في شنو؟ واحد غلبان قالوا ليه الانتخابات حتكلف قريب بليون دولار . قال يقسموها علينا واصلو هم قاعدين .
المعارضة المشتركة حالتها ذي الراجل الطالب الرباطابي قروش .لم فية وسط ناس . وشهد الناس وطالب بي فلوسه . الرباطابي كان بياكل ليه في تمر قنديلة . مسك المصاصة وقال للراجل شايف المصاصة دي انا بكرة بزرعها . وبعدين حاشتلها في طرف الجدول. واول ما تلد ابيع التمر وانت اول زول حاديك حقك . الراجل ضحك . الرباطابي قال ليه كيفن ما بتضحك ؟ ما خلاص ضمنتا . المعارضة المدجنة ضمنت .
المعارضة المستنبطة او ,, المستأنسة ,, بتضحك علي منو ؟؟ دخول الانتخابات بتكون عادة لان هنالك فرصة للفوز . او لتحضير كوادرها للفوز في انتخابات قادمة . ولبناء اتصال مع جماهيرها وكنوع من الدعاية. الانقاذ دي ما عندها استراتيجيات وتخطيط مستقبلي . ذي حروب الاثيوبيين والمهدية . يا نصرة يا كسرة . مافي انسحاب تكتيكي وتراجع وتعبئة وتغيير خطط . الانقاذ مشكلتها تبقي او تغور . واذا غارت الاحزاب والافراد المشاركين اليوم، ما حيعرفوا يودوا وشهم وين . اذا الترابي وكيل ابليس في الارض وصاحب برائة الاختراع ، عمل خط رجعة . ذي المفلس في الانداية لمن يجي دفع العدل . ولمن النظام ده حيقع ومش بعيد . حيقول ,, انا يا امباشا البنقو ده لا حقي ولا شفتو .
سمعنا البشير اجتمع مع ابن الميرغني لمناقشة الاشتراك في الحكومة . يعني الميرغن جونير كل الوكت ده والوزراء والنواب والتصريحات والصور والبيانات ، وهو ما مشترك . طيب لمن يشترك حيعمل شنو ؟ كل ما الوزيرة زغروتة تزغرد ، يملص الجلابيو ام لياقة ويحلف الا يدوه سوط سوطين في البطان . ما هو مشارك وان كان قاعد في لندن
وبجي الخرطوم سياحة . اظني دولاب في الخرطوم ما عندو .
المحن انه الجيش يصرح والدفاع الشعبي يصرح ويحتفل بمرور ربع قرن علي تكوينه . والجيش يصرح وعطا يصرح وحميدتي يصرح . وحتي مصطفي شحادين يصرح . وعبد الرحيم يقول يقزقزوا بي ناس شرق الجبل بعد ما قال قشو امسحو قرقشو فتفتو ادرشو واطحنو . ويتكلم عن بشر هم مواطنون . اين هذا من الاسلام الذي يتشدقون به . هل القزقزة بالمسلمين نوع من شعاير الاسلام . العم ود الاغا صاحب المقهي المشهور في قلب امدرمان ، شاهد احد الوافدين يطلق بصقة تريانة في القهوة . وعند الاعتراض قال الوافد . مالو ؟؟ فكان الرد انت تبصق كدة واخوك ده يبصق كده ويجي واحد تاني يبصق كده ، انحنا نعوم ؟ كل واحد يصرع ويبشر بالموت والهلاك . ماليها حق الناس تتبرأ من الجنسية السوداني . وكل يوم بين 5 الي 8 الف بشر بيتخارجوا من السودان .
ونسمع نفس اسطوانه عدم التفريط في شبر من الوطن . حلايب والفشقة ديل كانوا جزء من هندوراس . وشمال دارفور تحتفل بتخريج 5 الف مجاهد . اذا الدفعة 5 الف مجاهد في شمال دارفور بس، معناها عندهم اقل شئ 50 او 60 الف مجاهد ده غير حميدتي والجيش الاصلي وكتيبة نسيبة . والطيران والبحرية وجامعي الزكاة وجهاز المغتربين . مش كان احسن يشتروا جرارات ويدوا الناس ديل كل واحد كدنكة وملودة وسلوكة . ومشكلة السودان كان اتحلت . وبدل ضباط بروس ، نخرج فنيين وميكانيكيين وبنايين ونجارين وعمال صيانة ومساعدين طبيين ودايات . مافي غير دشمان ودواس ؟
ده كله من البطل بقي يرسل لي قصاصات وصحف سودانية بالبريد الالكتروني . ناس العباسية بيقولوا اسوأ حاجة البطل يضربوه بي سلاحه .
shawgibadri@hotmail.com
