أصل الحكاية
عندنا في الشمالية ومع كل موسم حصاد (بلح .. برتقال .. منقة) يظهر (البعاتي) و (و السحار) و(المرفعين) وبكلام مؤكد يخبرك الراوي (قالو أمبارح لاقي نفيسه بت عبدالله وسكاها لغاية راس الحلة ) ولما تسأل عن الوصف يقولو ليك أوصاف مختلفة مرة كراعو واحدة وماعندو عيون ومرة عنده عين واحدة في نص وشو ) وهكذا يصبح (البعاتي) حديث المجالس ومن نفيسة لي سيداحمد حتي (جنا) ود محمود ويصدق الكثيرين هذه الروايات خاصة الموجه إليهم هذه الرسائل .. ويحافظ المزارعون بهذه الشائعات الموسمية علي محاصيلهم من السرقات ..
عندنا في الكورة الهلال والمريخ (بعاتي) تستغله الإدارات المتعاقبة لفرض سطوتها وتمرير قراراتها بأوراق ضغط مختلفة أساسها أن (البعاتي) موجود وقوي ومخيف وقادر علي إرهاب الجميع بداية من اندية السودان وإتحادات السودان المحلية ومرورا بإتحادنا العام ونهاية بالحكومة .. ولنا أن نتخيل حتي الحكومة مصدقة إنه (بعاتي الكورة) (الهلال والمريخ) عنده قدسية وإنهم عندنا ماأقل من الأهرامات في مصر ولابرج إيفل في باريس والسور العظيم في الصين وكتير مابتسمع ده جزء من ثقافة السودان وأدب السودان وتاريخ السودان ووجدان السودانيين أو السودان كله هلال مريخ وإدارات الاندية التانية والإتحادات المحلية مقسومة بين الهلال والمريخ ياخي نحن وصلنا مع ( بعاتي الكورة) لدرجة إنه الحكومات بتمرر عبره سياساتها وتعتبرو متنفس ممكن تشغل بيهو الناس عن قضاياهم الأساسية ..
من المفارقات في موضوع (بعاتي كورتنا) قبل وقت قريب كتيرين كانوا بحردو الأكل لما الفريق يتغلب هسي ممكن تزعل وتمشي تاكل زي المافي حاجة .. المهم الإدارات البجيبها السيل ولا بتجي براها في حساباتها إنه رئيس نادي في هلال مريخ زي رئيس الجمهورية وإنه عضو مجلس إدارة في هلال مريخ ماأقل من وزير لو ماأكتر ..
وحكاية (بعاتي الكورة) وصلت مراحل صعبة لدرجة إنه الحكومة مابتبخل وتدفع من دم الخزينة العامة مليارات مليار ينطح مليار مش كده وبس ياخي دي ممكن تتدخل في تفاصيل التفاصيل وممكن الدنيا تقوم وماتقعد لو فريق إنسحب أو هدد بالانسحاب أو تفجرت قضية وتصبح قضية (بعاتي الكورة) أهم من قضايا الأسعار النار والغلاء والفقر والتعليم والصحة وأهم من ملفات السياسة الشائكة ودي حقيقة نحن عايشنها وواقع ننوم ونصحي عليهو ..
في ناس بكتبو عنه وعن تاريخه وبداياته هنا وهناك وتتضارب الحكايات والتواريخ .. لكن مافي زول واحد كتب أو حلل أو بحث في كيف تحول من (تيم عباس) لي (بعاتي الكورة) .. لدرجة في ناس كتيرين وإحتمال الغالبية مابرضو وبزعلو جادين لو قلت الهلال والمريخ من أمدرمان تلقي مليون واحد شب ليك في حلقك .. انا مامن أمدرمان لكن بعرف في ناس كتار جدا بضايقو من ناس أمدرمان عشان بقولو الهلال والمريخ تبعهم وملك حر ليهم .. مع إنها الحقيقة قانونا وتاريخا.
بعاتي الكورة زي بعاتي الشمالية في المحاصيل الموسمية مجرد خيال ماعندو علاقة بالواقع ممكن تخوف بيهو الناس وترهبهم وتستخدموا سلاح تضغط بيهو لتحقيق مكاسب لكن في الواقع لايوجد أي شيء مجرد فريقين عاديين جدا ممكن يتحاكموا ويتوقفوا وتتفرض عليهم غرامات ويحرموهم من الجمهور ويمنعوهم من المشاركات الخارجية وينتزعوا منهم حقوق اللاعبين .. وممكن يشطبوهم نهائيا من السجلات .. فريقين جزء من منظومة متكاملة لاتعترف بأفضلية الجماهير وتعترف بسيادة القانون والتساوي أمامه وإستقلالية الإتحادات الوطنية وأهلية وديمقراطية الحركة الرياضية.
البعاتي جاكم .. مجرد وهم .
hassan faroog [hassanfaroog@hotmail.com]