*مدخل أول:*
في زمنٍ مُو بعيد (بس برضُو كان زين).. ونحن نازلين البلد بي لُوري.. العربية اتكسرت قُصاد آل الطيب بالباسا.. أوكلُولْنَا مع الزعيم محجوب الرضي بأن نذهب إلى بقالات قرية الباسا لي تحت نجيب لينا أكل…
مشينا لي صاحب الدكَّان طلبنا طحنية وخبز بكمية كبيرة نسبةً لأنَّ ركاب اللوري كانُوا كُتار والمُوسم ضحية…
التاجر (الشاب)، من خِلَقْنا وغباشنا الفوقنا دا عرفنا ناس مقطوعين وضيوف على قريته وحكمة الله ما سألنا إنتُو من وين ولَّة مالكم طلبتُو الكمية الكبيرة دي.. قال لينا دقيقة بس.. دخل لي جُوَّة وجاء مارق معاهُو صبارة مُوية (بُولر) باااااااااردي في تلجايات تكركِب… قال شيلُو الصبارة دي واطلعُوا على جماعتكم لا فوق وبجيب ليكم طلبكم وأجي…
شوية مُو كتير جاتنا صواني فطور (فضلة خيركم) فطرنا وربنا يسَّر لي عربيتنا إتصَلَّحت وكملنا باقي مشوارنا…
لم يستغِل هذا الشاب الشهم نكبتنا وحوجتنا لزيادة دخله من دُريهمات دُنيا زائلة!!!
*مدخل ثاني:*
في ضحوية ويوم عمل مُنهك وشاق بقرية المسيكتاب ريفي شندي عوَى مكرفون الجامع بصوت الحاج عبد الوهاب عباس الأمين (رحمه الله) أن هلمُّوا يا رجالة على خط السكة حديد في قطر معطَّل نقوم بالواجب مع ركابُوا… قطر كاااااااااامل يا حاج عبد الوهاب؟؟؟ شِنْ قدَّرنا بالحكايي دي… تقدرُوا والله ونُص وعشرة فللأزمات رجال ولحوالك الأيام والدهور صناديد.. أمشي يا فلان أضبح وانت يا علاَّن ألحق الطوابين (المخابز) لِم العيش الفيها وانتُو يا شباب أمشُوا فضُوا دواوين ناس الوسيلة والحاج الأمين وجهزوها لي حريم القطر تنزل فيها… قام أهل القرية بواجب ضيافة قطر كامل بأبسط ما يكُون.. من غير مِنَّة ولا شُكر!!!
على شحَّادين الدولة (برهان/حمدوك) الإستعانة بمثل شاب الباسا الشريف العفيف دا وبأبناء المرحوم عبد الوهاب عباس وإستحداث لجنة أزمة عُليا ليديرُوها وباذن الله تعالى يرسُّو البلد بي كرونتها وبي اقتصادها المايل دا إلى بر الأمان…
الأوقات الحرجة الزي دي تحتاج لرجال أزمات وأفعال.. مُو ناس باردي وشحدي!!!
*خارج النص:*
عندما ضربت الدولة الإسلامية المجاعة في العام 18هـ، بدأ سيدنا عُمر بن الخطاب حل الأزمة في نفسه.. فأصدر أوامره المُغلَّظة لأهل بيته بأن لا تاكلو الا الخبز الحاف ولو عاوزين تبحبحُوا معاهُو زيت وبس!!!!
وشدَّد على ولاته بالعراق والشام ومصر طالباً الغوث والمدد لأهل النكبة بالحجاز…
ووزَّع عون ورزق الفُقراء والمساكين على أهل السعة والمقدرة!!!
لم نطلب منكم أبداً يا (برهان/حمدوك) بالتقشُّف وإعلان حالة طوارئ الفقر في بيوتكم وقصوركم… كل ما نرجوه منكم إدارة مواردنا اللِّي وهبها لنا ربنا سبحانه وتعالى (من جُودُو وكرمُوا) من تحت الأرض ومن فوقها (الذهب-الدهب-الضَهَب) وذلك بتأميم شركاته ووضع يد الدولة عليها بدلاً من أن يتحكَّم فيها أفراد قِلَّة وبقية الشعب مُو لاقي رغيف حاف… وبعد داك لو جاع شخص واحد لُوموني!!!!
.
.
.
*ويظل سؤالنا الدائم.. البلد دي السايِقَها مِنُوووووو؟؟؟؟!!!!*
jamal.trane@gmail.com
