بسم الله الرحمن الرحيم
في السلك
• نحمد الله اننا ناس قدااااااااااااااااااااااااااااااام
• عشان كده حافظين حقائق كتييييييييره
• ولاننا اجتماعيين جدا
• فقد حفظنا ايضا امثال كتييييييييييييييره
• اقول ليكم بعض منها
• ونبدأ بامثال عن الزول الحاسد
• يقول ليك جوا يساعدوهوا في دفن ابوهوا دسه المحافير
• يدفنوا ليك كيف يعني ؟
• ندفنوا ليك بدون ازمه وكوريك وواسوق ؟؟؟؟؟؟ ده زول ولا سر اصلوا
• يعني الناس الجات تساعد في الدفن غلطانه؟ ولا سيد البكا حاسد ؟
• خلاص اقعد براك في مقابرك دي خليها تكابرك
• وفي امثال عن الزول الغالباهو مسئوليته ويتنفخ في الفارغه ويحمل نفسو اعباء جديده وماقادر عليها
• المثل بقول : الغلبتها حزمتها بتكسر تزيدها
• ويعني هذا المثل ان النساء زمان ايام بمشن يكسرن الحطب في الخلا ويجمعنو
• كل واحده تعمل حزمه من الحطب عشان تشيلها توديها بيتها
• الطمع يدخل النفوس
• اها الواحده تتندل الحطب اكتر من طاقتها
• تحاول ترفع الحزمه تغلبها
• تقوم تكسر تاني
• تزيدها
• يعني زي دي لو حضرت زمن الشيكات ده وشيكاتها رجعن
• بتكتب تاني
• وفي امثال عن عدم التروي ودراسة الامور الذي يقود الي اهلاك المعطيات
• المثل بقول بصيره ام حمد
• يعني زول يقول ليك انت زي بصيره ام حمد
• وقصة المثل انه كانت هناك امرأه اسمها بصيره ام حمد
• لاتدرس الامور
• هوجاء
• قالوا ليها التيس دخل راسو في الزير وقرونو مسكن وراسو ابا يمرق
• قالت ليهم اضبحوا التيس
• ضبحوا التيس
• الراس برضو ابي يمرق
• كلموها
• قالت ليهم كسروا الزير
• وكسروا الزير
• وفقد اتباع بصيره ام حمد التيس والزير
• يستاهلوا
• عشان تاني ما يولوا امرهم لبصيره ام حمد
• الامثال كتيره
• قردك ولا غزال الناس
• وده مثل ماداير شرح
• واضح
• لكن الله يسألك غزال الجمال ما احلي من قردك ؟؟
• ده مثل محتاج شطب
• شهر اطناشر حا نشطبوا
• والمثل ده بشبه مثل تاني بقول
• ام صلومبايتي ولا كديكاية زول
• الله يسألك اخير ليك تقعد وسط قردك وام صلومبايتك ولا اخير ليك تتفرج علي غزال زول وكديكايه زي الورد ؟
• وهناك حكم برضو
• منها
• اعمل الخير وارميهو البحر
• اها
• عندي عما ليا هلالابي (نسأل الله له الخير )
• قال لي كورة الهلال وحي العرب انتهت كم ؟
• قلت ليهو انتهت خمسه اظنها
• قال لي كملوا القينان كلهن وقعدوا في السهله لي تونس
• سكت سااااي
• وفي سري قلت ليهو حصة الرياضيات في تونس يا عمك
• جنس حساب
• كورس رياضيات مكثف مجاني
• الكلام ده كلوا في سري
• قام عمي قال لي وليه ماجابوها لينا في التلفزيون
• قلت ليهو عشان ناس تونس مايكشفوا حالكم
• قال لي وهم ناس تونس الغابيانين منو شنو ؟
• قلت ليهو احتمال الناس الادوا ناس الانتر شرائط مباريات المريخ يكونوا ادوا ناس الافريقي شرائط مبارياتكم
• قال لي الله يستر كان ادوهم شريط ساكواها , بعرفوا الدرب
• قلت ليهو وشريط الاهلي وشريط الاتحاد ؟
• قال لي مامشكله بس شريط اول اغسطس المدسوس ما يدوهم ليهو
• واتلفت علي وقال انت الناس البوزعوا الشرائط للاجانب ديل منو ؟
• قلت ليهو بعرفوا !!!!!!!!
• المهم
• امس كانت ضربة البدايه
• شباب المنتديات وصفحة المريخ في الفيس
• حضروا ليتشرفوا بالعضويه ويشرفوها
• استلموا الاستمارات
• احضروا المستندات
• وقرروا يوم الاثنين القادم يوما لنفرة العضويه
• اليوم التاني
• وسيتضاعف العدد
• ماشاء الله
• اولاد اسر وعوائل
• شفوت
• تعرفهم من محياهم مريخاب وعينهم مليانه
• الي الامام الي الامام
• بيع ياروشا
• علاج ود الجنيد ما بتحمل مساوفات ومماطلات ونفخات فارغات سااااي
• الكاش بدخل الانعاش
• ويمرق ود الجنيد معافي وصاغ سليم
• اللهم اشفي ود الجنيد شفاءا ليس من بعده سقما
• ولا دعواتنا زاتها لود الجنيد بالشفاء مادايرنها ياخالد عزالدين ؟
• خلاص ادعوا ليهو انتوا ؟
• وقبل ما تدعوا ادفعوا , ماتجعجعوا ساااااااي
• بيع ياراجل
سلك كهربا
هي وينها الكهربا ؟ تقول لي ننساك
والي لقاء
سلك
babikir maki [b_silik@hotmail.com]