أصل الحكاية
تخيلت أن أهل المريخ أصابهم الملل من حكاية (كل موسم تسجيلات) وأنهم شبعوا من وهم الدرر والإكتساح كل مرة وكأن التسجيلات عالم (براهو) لاعلاقة له بالفريق واللعب والبطولات المحلية والخارجية .. وتخيلت أن (تلتة) أبوجريشة ومتوكل أحمد علي (أبوجريشة الصغير) طوال فترات التسجيلات وجلوسهم في مكاتب الإتحاد العام ذات الجلسة وتصويرهم ذات الصورة مع إختلاف وحيد (اللاعبين) جعلتهما يصلان القمة في (الزهج) من مشوار كل موسم .. ولكن يبدو أن تقديراتي ليست في مكانها فقد أدمن أهل المريخ (الخدعة الموسمية) بمزاجهم .. ويبدو أن الإخفاقات المتواصلة مع الوالي الهاوي جعلتهم (يفتشو الفرح فتيش) أو كما يقول المثل (سيد الرايحة يفتش خشم البقرة) فوجدوا الرايحة في إنتقالات اللاعبين لتغطي علي مواسم الجفاف والتصحر التي عاشوها في ظل وضع عنوانه الرئيسي (التخدير للجماهير) .. (والتسجيلات مسكول)
المصيبة أن الجماهير تصدق وتهلل لإنجازات حدودها مكاتب الإتحاد العام ويصاب بعضهم (بالفلايت والقطايع) من حمل اللاعبين علي الأعناق دون أن يتوقفوا ولو للحظة ليسألوا أنفسهم ماذا جنينا من حكاية درر التسجيلات ؟ ولماذا نذهب بعيدا إذا توقفوا وسألوا ماذا فعلت لنا درر الموسم السابق لن يكلفوا أنفسهم المشوار لإنتظار توقيع اللاعب والقيام بطقوس الترحيب المعروفة لأن اللاعب يدخل كشوفات المريخ من صالة كبار الزوار ويخرج من الأبواب الخلفية زي مادخل زي ماخرج .. موسم واحد ومع السلامة مع خطاب شكر رقيق علي الزيارة السريعة علي طريقة (بارك الله في من خف وزار) فقد إستقبلت كشوفات النادي الكبير كل من ( هنو ومحمد مقدم وعاصم عابدين وصعد حمد الشجرة للفريق الأول وعاد عبدالكريم الدافي من جديد بصحبة وارغو مع حسن جزيرة وعصام الحضري) ثمانية لاعبين دفعة واحدة أين هم الآن ؟ وجميعهم من إنتقالات الموسم السابق .. وكلهم درر التسجيلات وكلهم تم حملهم علي الأعناق وكلهم (توهطو علي أكتاف الجماهير) مع تصريحات مثيرة عن السعادة والفرحة والشكر علي الثقة والتمنيات أن يكون بقدرها وبعد الهبوط لاتسمع به الجماهير إلا عند المغادرة .. لاعب مثل حسن جزيرة سجلو وشطبو دون أن يلمس الكرة قيل أنه مصاب بعد ستة أشهر لعب لمريخ بورتسودان وإنتقل قبل أيام لفريق الأمل عطبرة ( وين الإصابة) ؟
هنو ومحمد مقدم وعاصم عابدين زي مادخلو طلعو منو المسؤول؟ حمد الشجرة صعدوهو وشطبوهو منو المسؤول؟ عبدالكريم سجلوهو في 2009 وفكوهو في 2010 وأعادوهو في 2011 وشطبوهو الموسم ده ولن يلعب 2012 منو المسؤول؟ وارغو عاد من إعارة وطالع لإعارة منو المسؤول؟ الحضري شهور وإختفي منو المسؤول؟ وياما في الجراب ياحاوي .. دي فضايح موسم واحد أقصد حصيلة موسم ..
مايحدث في المريخ ذكرني بنكتة في شكل (لغز) عندنا زرافة عايزين ندخلها في عربة صالون نعمل شنو؟ في واحد ممكن يقول ليك ده الكانون .. تضطر تشرح وتقول في طريقة واحدة ممكن ندخل بيها الزرافة في العربية .. واحد زكي يقول ليك نفتح الباب وندخلها .. بالمنطق ماممكن ومابتشيل .. زول تالت يقول ليك نقطعها ونختها في أكياس .. لا نحن عايزنها حية .. ورابع يقول ليك ماعارف قول إنت ..
في تسجيلات المريخ (لغز) كبير ومافي زول عارف بجيبو اللاعبين كل موسم ويشطبوهم الموسم التاني ليه؟ ومافي زول عارف الجماهير والاعلام والإدارة واللاعبين فرحانين ليه؟ بالله مش حاجة تغيظ .. لو حاولنا نعمل إحصائية لتسجيلات المريخ كل موسم (محليين وأجانب) المفاجأة ممكن تودي أحمد شرفي وبرضو فرحانين ..
إجابة (لغز) الزرافة الحاجة الوحيدة الممكن تدخل بيها العربية .. نعمل ليها فضيحة تخلي رقبتها صغيرة .
hassan faroog [hassanfaroog@hotmail.com]