حال البلد حال ما بيسُر
ورٍث الخراب وحياتو مُر
مرِت سنين من العمر
كِبروا العيال فاطنة وبدر
إتربوا في القحط المورث من زمن
حال البلد شيتن كُتر
حال البلد حال مابيسر
البعض عاش ذٌل في فقر
والبعض كاس سكة سفر
ونفوس مغمسة في الصبر
وشلنا الصبر لامن فِتر
ياربي لمتين السكات
يا الله لمتين الصبر
حال البلد مدفور دفِر
والكادحين غلبم دفِر
شيلة الوجع كل يوم تزيد
ماناس تعابى وناس ضهابه
شافوا المحن
وحالنا جد شيتن يحير ومابيسر
في بيوت وناسا الكادحين
مشتاقة لهبوت رماد
ما الهم رقد كوم واستراح
عشنا الوجع
زمن الجمال في بلدنا راح
حق الهدوم حق المدارس والكراس
تمن الدوا حق العلاج
مصوا القرض هو العلاج
ضاقو المرار والعقل راح
إتذلوا توب العِزة راح
والهم رقد كوم واستراح
حق الملاح
ناسا تقوم كايسه الرزِق من الصباح
ومغطي وشهم الكفاح
وناسا تنوم حتى الضحى
في وجوه زاد الانشراح
ما شايله هم مال البلد ليهم مباح
شوفو الفرق لما الوطن بقى مستباح
ياناس عمرنا كِمل وراح
حيكومه تملا الناس جراح
شايلة السلاح
تجمع سلاح
بتصيد في روح الناس تراح
وياما كم صلبت أرواح
والذل رقد كوم واستراح
والعقل راح
والباع ضميرو وذمتو حالو اتيسر
من رزِق شعبي الفقارى
والبيضمد في الجراح
والهم رقد كوم واستراح
هدوا المدارس والمشافي
بعد ماكانت تمام
هدموا الكنايس لاتسامح
لاتعايش لاسلام
اما الجوامع ياحرام
بقى مكرفونا للنظام
وبلدنا بقت كتر كتر
ومن حيكومة الظلم الدمار
هذا الوطن بندورلو اطلاق الصراح
والهم رقد كوم واستراح
والسكة التوصل للامان غلبا المشي
ودروبنا مليانة بي عشر
سكة بتطول تبعد أمل
هو أنحنا راجين العشم من ناس منو
هو الغيرنا نحنا الموجوع منو
كان للكلام باقي الكتير
ياريتنا نوصل للفعل
لازم نكوس درب الخلاص
عمرو الخلاف ماجاب عمار
الوحدة هي التبنينا صف
لازم نفيق شان الوطن
لازم نقوم شان نرمي ساس
مخلوطة رملتو بالصفا
وفيها العفاف
بموية النيل الأمين
يسقي الزرع ويسقينا دوم
عشق الوطن
الساس يشبع كل زول
إتذلا في درب العمل
كاس الامل شان الخلاص
دربو النضال
ماشوقنا طال للازدهار
لازم نفيق شان نرمي ساس
الساس موشح بالسلام
يتلو ويرنم في ارتياح
فرض الوطن
هيا الوطن
حيا الوطن
وقت العمل
وقت الفلاح
هيا الوطن
وقت الصلاح
وقت الكفاح
حيا الوطن.
حنان ساتي
7/7/2017م
hanansf98@gmail.com
