In the name of God, mercy.
في السلك
*المصريين طبعا شعب لذيذ جدا
*مابفتشوا للكلام
*ولا بتلفتوا
*حاجه كده بتحيرهم مافي
*وما بسكتوا
*فيهم وحدين في التلاوه بتكلموا
* لاحظتوا لما تكون في تلاوة والبرتل يلحن ؟؟؟؟
*لما يصل آخر الايه تلقي المصرين كلهم برددوا
*الله ….الله
*قربوا يقولوا عشرة علي عشره يا سيد
*وده الحكاية البتخلي ام كلثوم وعبدالحليم حافظ يعيدوا البيت في الغنا سته مرات
*المستمعون بنضموا اثناء الغناء
*ومن فصاحة المصريين يتخيل لي لو فتحنا خشم المصري بنلقي فيهو لسانين
*الكلام الكتير ده لازم يكون اللسان شغال ورديه
*واللسان التاني يشتغل الورديه التانيه
*لسان واحد ما بقدر علي النضمي ده
*ومافي مصري بسكت ولا في مصري بقول ماعارف
*اي حاجه يعمل ليك فيها فاهمها ولو كان اول مرة يسمع بيها
*يعني مثلا في استطلاع تلفزيوني لو قابلك مصري جهلول
*قمت قلت ليهو تتفق معاي انو السيطرة الامريكيه علي مجلس الامن هي الخالقه حقارة امريكا بالعرب
*يقول ابدا
*الحكاية مش كده
*بص وانا (أأولك )
*امريكا مسيطرة علي مجلس الامن , واخد بالك ؟؟؟
*السيطرة دي هيت هيا السبب في حقارة الامريكان بالعرب
*بس
*اسي الزول ده عمل شنو ؟؟؟
*لكن الفصاحه بس
*وافصح المصريين السماسره
*نحنا المابنحب الكلام الكتير ديل
*سماسرتنا قاعدين في الواطه ؟؟؟
*والله السمسار عندنا يقرأ ليك يقنعك انو الاتوز الفي السوق دي اقيم من برادوك الفي الميناء داك
*ويدفعك فريق كمان
*السماسره حناكين شديد
*وفيهم واحدين شماشره ما سماسره
*المهم
*المصريين فصيحين شديد
*وافصح المصريين السماسره
*مثلا السمسار في مصر تجيهو
*تقول ليهو داير لي شقه
*يقول ليك كم غرفه يا بيه ؟
*تقول ليهو غرفتين
*يقول ليك عندي مطرح في وسط البلد انما ايه
*هواء (ابلي ) وبلكونه بحري وتشطيب ديلوكس وماحدش سكن فيها (ابلك )
*السمسار بكون الشقه كلموهوا بيها وهو ماشافها اساسا
*المهم يجيب المفتاح ويوديك للشقه
*اثناء مابفتح في الباب بكون بشكر ليك في الشقه
*مطرح زيو مافيش
*ده انا عندي واحد سعودي عاوزها بس انا مابحبوش
*الت اسكن فيها واحد من اولاد النيل احسن
*في الوكت ده تكونوا دخلتوا جوه الشقه
*يمشي بيك علي الغرفه
*وينضم ما بديك فرصه تشوف الشقه سمحه ولا شينه
*جوه الغرفه يقوم يقول ليك السرير خشب
*ويرفع المرتيه
*يتضح ان السرير حديد
*مابسكت ولا بغير كلامو
*مع ظهور الحديد يقول ليك حديد اهو
*وقبلها بي ثانيه كان قال ليك خشب
*فصاحه
*المصريين ديل ذكروني ليهم كتاب الهلال
*يول ليك السرير ده خشب
*اول مايطلع ماسوره
*يقولوا ليك حديد اهو
*واليكم بعض تناقضات ناس روشا
*روشا ده فيهو عرق مصري خلي بالك
*بعد صفر الهلال الفي شندي
*روشا بقي زي الفاضل سعيد
*لسان حالو كان بقول
*الصدمه كانت علي شديد وفقدت تلاجتي الجديده
*اول حاجه بشه ختوهوا في الارض
*قال روشا
*كتب روشا من قبل
*الماشاف نيمار يشوف وليد مع الهلال
*ورجع وكتب امس
*وباتريك البلجيكي يحيرنا وهو يصر علي الناشئ وليد ويزج به في متون مثل هذه المعركه حتي نهايتها والفتي لايقدم المردود الذي يشفع له
*يشفع له يا روشا ؟؟؟؟؟
*ياشفيع الامه
*قلنا ليكم افريقيا وليد لايقوي علي مجابهة لاعبين الواحد عضلو قدر ضهر وليد
*وليد طلع حديد أهو يا روشا ؟؟؟
*وكتب روشا
*كاريكا هو كاريكا وكل من تابعه يتأسف علي الحاله التي وصلها وكيف انه بات عاله علي خط الهجوم
*حديد أهو
*وكتب روشا
*يبدو ان الجهاز الفني كان متهيبا كثيرا من الاهلي لذا منح الانطباع انه لعب للتعادل
*وقبلها يقول روشا ان سوء الطالع حرم الهلال من الفوز
*زول مخندق سوء طالع شنو يا روشا
*ولا الهواء كان (ابلي وبحري )
*حديد اهو
*والرائع خوجلي الشيخ هترش و قال
*باتريك مسؤول بشكل كبير عن هذا التعادل
*وماعارف لماذا يصر علي اقحام بشه
*ويقحمه المدرب لي اذيتنا موش ؟؟؟
*بشه زاتو طلع حديد أهو
*وجوهرة رمضان تناقض نفسها
*تكتب بالخط العريض عن تسيد الهلال للمباراه
*وفي التحليل تكتب
*حديد أهو
*ناس روشا ديل بالطريقه دي ممكن يشتغلوا سماسره في مصر بررررراحه
*المهم
*محمد عبدالماجد احتجب بلامس
*بقي يحتجب في الدرون
*زمان كان بحتجب في الهزيمه بس
*ما كان تحتجب يا حماده
*كان تكتب
*حدي أهو
*وفطومه اختي زاتها احتجبت
*انتي بتحتجبي ليه يا تفيده ؟؟؟
*أولتيلي خشب
*طلع حديد!
*طب اعتذري وأولي حديد أهو
*ايها الناس
*حديد أهو ستكون عبارة الموسم الهلالي
*بعد شهرين
*حايقولوا ليك عن كردنه
*حدي أهو
*ياحكيم امة الهلال السيد طه علي البشير
*سخن يا حبيب وكون مجلسك
*الحال في الهلال
*حديد أهو
*المهم
*بكرة في كوستي ضد ولدنا
*شعارنا لن تسقط نقطه واحده في الولايات او بالقلعه الحمراء
*خشب يعني خشب
*ماعندنا حديد أهو
*وأمسكو الخشب
*كوفي ده خطير
*ويادوبك عرفت ناس الظار بغنوا ويقولوا
*انا كوفي …انا كوفي …ليه
*ده جن احمر مصرم
*ايها الناس
*كيبي موش طلع حديد أهو ؟؟؟؟
*ايها الناس
*ان تنصروا الله ينصركم
*اها نجي لي شمارات والي الخرتوم
*كان شفت يا والينا
*كل الخطط والمشروعات القلتوها لينا
*لما نسمع عنها بتسرنا يا والينا
*ولما نشوفها تطلع حديد أهو زي قصة مصرينا
*تاني بعد تعملوا الشئ حتي تقولوا لينا
*اقضوا حوائجكم بالكتمان يا والينا
*زي القصر الجديد الافتتحتوهوا ليكم وما لينا
سلك كهربا
ننساك كيف ونصيب الشعب في القصر الجديد الدهشه
والي لقاء
سلك
