طبعا كل السودان سامع عن الحرائق البتحصل في منطقة كجبار ودال ، وللماعارف ، منطقة كجبار دي هي منطقة المحس ودي الحتة العايزة تعمل فيها الحكومة سد كجبار وهي منطقة ممتدة من وسط المحس لحدي الحدود الشمالية لدنقﻻ وطبعا كلها مرشحة للاغراق ، اما منطقة دال هي منطقة الشﻻل الثالث على نهر النيل وهي بتقع في الحدود الشمالية لمنطقة السكوت وهي بداية منطقة وادي حلفا ، ومقترح فيها اقامة سد دال ، وطبعا في حالة قيام سد دال كل منطقة السكوت حتغرق بما فيها منطقة شمال المحس لحدي سد كجبار ، وطبعا المسافة بين السدين ما كتيرة ، كلها ساعة بالسيارة يعني ما فايتة ليها 100كيلو ، ودا بيقودنا لي نتيجة خطيرة بتقول انو السدين الهدف منهم ما التنمية وﻻ الكهرباء ، ودا كﻻم مفروغ منو ، ﻻنو اساسا بعد المنطقة تغرق !! تنمية شنو ، الا تكون تنمية تحت الموية ، وفي زول ( كرزاي ) ممكن يجي ناطي ويقول ليك حيرحلوكم وحيبنوا ليكم بيوت سمحة وحيعوضوكم تعويضات مجزية ، والرد المناسب للكرزايات الزي ديل طوالي هو تحكي للجنبك الحصل للحلفاويبن والحصل للمناصير ، وقلت تحكي للجنبك لانو الكرزاي دا اساسا مقتنع جواه بعدم جدوى السد اقتصاديا لكن طبعا ﻻنو كوز بتحرك بي تعليمات من فوق ، طبعا ما نسيت اوريكم كرزاي يعني شنو ، الكرزاي دا لقب اطلق من قبل المناهضون للسدود على الناس المندسين بين الناس وبيعملو فتن والحاجة دي انتشرت بين الناس بدرجة كبيرة بسبب الكرزايات ديل ، وهو لقب منسوب لحامد كرزاي وكدا وضحت المسالة .. !!
* المهم .. نرجع لي موضوعنا ، عن جدوى السد ، قلنا انو السد ما هدفو تنموي ، وهو طبعا في المقام الاول عشان ياكلو القروض بتاعتو ، وثانيا عشان يعملو حماية للسد العالي البدا يتاثر بي تراكم الطمي وكدا ، يعني سدود لحماية شعب أخر ، على حساب اهل المنطقة وارض السودان ، وطبعا للمعلومية ، وزارة الري اعلنت وقالت انو سد مروي فشل في الايفاء بمتطلبات النهضة الزراعية ، وقالو انو فشل في سد النقص في الامداد الكهربائي ، حتى في اخبار مؤكدة بتقول انو حصلت فيهو شقوق ، غير النتائج السالبة في المنطقة شمال السد ، موية النيل بقت زي مياه البرك معفنة ولونها اخضر بي كترة الطحالب ، والمياه قلت ، غير كدا تسبب في تغيرات مناخية ضرت بالبيئة ، يعني حتى فشلو في ادارة سد بعد ما شبكونا الرد السد ويا اوكامبو يا كديس ما حنسلمك حتى فطيس ، المهم لي يوم الليلة ناس المناصير ما اخدوا التعويضات وكل المشاريع المصاحبة فشلت والناس هاجرت بعد فقدت الامل بالضبط زي الحصل في حلفا الجديدة ، بعد فشل مشروع خشم القربة وحلفا الجدية الناس هاجرت لي مناطق ام عشر والكﻻكﻻت جنوب الخرطوم وهاجروا للمنافي وقرى حلفا الجديدة الليلة خرابات ، ودا الحصل لي قرى المناصير ، اما وادي حلفا هناك في اقصى الشمال كانت عايشة على الميناء النهري ، وبعد افتتاح ميناء اشكيت البري خﻻص الا يرحلوا تاني ، مافي سبب يقعد الناس هناك ، ودا مقصود طبعا وهي خطة مرسومة بدت بي تمصير حﻻيب ، وبعدها اغراق منطقة السكوت والمحس بعدما تم افراغ وادي حلفا اجمل مدن افريقيا وقتها ، المهم كدا اتخيلي في حاجات وضحت .. !!
* نرجع لي عنوانا الفوق داك ، والبقول ، حرائق النخيل وما ادراك ما حرائق النخيل ، في البداية كنا بنقول السبب هو الاوساخ وعدم تنظيف الاشجار بطريقة دورية وكدا ، وبعداك قلنا دا الاهمال ، لكن اي شي لمن يتكرر بطريقة منظمة بتبفى ظاهرة ، ومسالة حرائق النخيل بقت ظاهرة وتحولت لي كارثة ، وطبعا اتاكدت انها بفعل فاعل ، وهي بتحدث فقط في مناطق السدين ، والحاجة دي ما حصلت لاﻻف السنين في المنطقة ، و المدهش في الموضوع ، ما بتحصل في المناطق الجنوبية ليها زي دنقﻻ وجنوب دنقﻻ والباوقا وكدا ، يعني نخيل المحس بس هو المستهدف ، وبطريقة منظمة وبتم يايادي مأجورة بتاخد قروش قصاد الحرائق دي ، وفي زول ممكن يسال ، السبب شنو ، لي الجماعة ديل بحرقوا نخيل النوبيين ، الاجابة طبعا ما صعبة ، نحن في البداية قلنا السد فيهو قروض والقروض دي قروش ، ومعظم تكاليف السد ما في السيخ والاسمنت بتاع هيكل السد ، ﻻ طبعا ، النصيب الاعظم من التكاليف بتمشي للتعويضات واعادة التوطين والتهجير وكدا ، لكن البحصل في السودان غير وهي تجربتين في وادي حلفا وفي مروي ، الحصل انو التعويضات ما بتصل كاملة وفي ناس ما بتصلهم ، والسبب هو السدود دي بتتعمل في ظل الانظمة العسكرية ونظام الحزب الواحد ، يعني مافي مساءلة ومافي قانون كل الموضوع نهب منظم ، اها نرجع لدوافع الحرائق ، السبب الاول طبعا هو تخفيض التعويضات ، ولحدي اللحظة اتحرقت ما يقارب المليون نخلة ، عارفين يعني شنو مليون ، يعني الف الف نخلة ، واذا ضربنا سعر النخلة الواحدة في التعويضات ما اقل من خمسة لي عشرة مليون ، طبعا ديل ممكن يعملوها خمسمية الف لي مليون ، وفي الحالتين هي مبالغ خرافية ، ودا كلو طبعا تخفيض للتكاليف ، ( شفتو الخسة والندالة وعدم الضمير وقلة الادب ) بالضبط ، خلو باقي الاسباب التانية وال منها يخلوا المنطقة طاردة للسكان ، ويكرهوا الناس في بلدهم عشان يقبلوا بالسد ، لكن مهما كانت الندالة والخسة ، موضوع السد دا ماحيقوم لسبب بسيط ، هو .. الاهالي ما عايزين ، يعني المسالة ما قوة ، وعمرها مافي تنمية بالقوة ، والحصل في كجبار من قتل بالرصاص للمحتجين ، موثق وقاعد كجريمة في مكاتب الامم المتحدة جنبا الي جنب مع جرائم الابادة الجماعية في المناطق التانية ، المهم حاولوا يهرشوا الناس عشان يوافقو .. قالوا ﻻ للسد ، حاولوا تزوير ارادة الناس ويقولوا الناس موافقة عبر الوالي والمعتمدين واذاعة دنقﻻ ، لكن فشلوا والناس قالت ﻻ للسد ، حتى المعتمد السابق لوادي حلفا الوالي الحالي دا رفدو من الشغل عشان قال ﻻ للسد وجاب واحد بدلو ما متعلم وما تامي حتى الابتدائي عشان ينفذ من خﻻلو الخطط السرية ومن ضمنها حرائق النخيل ، وخﻻل الاسبوعين الفاتو حصلت حرائق قضت على قريب العشرة الف نخلة ، ولسة طبعا.. !!
* لكن المريح في الموضوع الناس عرفت انها حرائق مفتعلة ، وبتحصل بايادي مأجورة ، بي مقابل مادي ، وتم اكتشاف بداية الخيط الحيكشف العصابة الاجرامية ، وهسي الموضوع دا ماشي كويس لانو عرفوا ناس متورطين وفي متابعة تامة ليهم عشان يقبضوهم متلبسين ، طبعا الحكومة حتخارجهم وماحتعاقبهم ، لكن يكفي انو نفضحهم والراي العام يعرف الحقيقة والامم المتحدة تعرف الحقيقة ، لانو قضية النوبيين قضية عادلة ما بتستحمل التسويف والاهمال ، اها دا جزء صغير من القصة ، ان شاء الله الناس الماكانت فاهمة فهمت ولو شوية ، والرسالة دي طبعا وصلت للجهات المسؤولة والمتورطة في الموضوع وحيعملوا رايحين ، لكن طبعا الغيظ قاتلهم من جوة ، والي لقاء قريب .. !!
مع كل الود
نورالدين عثمان
manasathuraa@gmail.com
///////
